Matayo 2
2
aBanyabwenge bahika guharamya Yeesu
1Yeesu aburhwaga omu gishagala ch'eBeteleheemu, omu gihugo ch'eYudeeya. Amo mango, mwami Heroode ye waliiri murhegesi. Enyuma z'okuburhwa kwa Yeesu, aBanyabwenge#2.1 aBanyabwenge: Baliiri bantu basomere ebiyekeere enyenyeezi n'ebindi bimoleka omu chaalege. barhengeraga eBushoshookero bw'ezuuba bahika omu gishagala ch'eYerusaleema. 2Baabaza ntya: «Hali omwana waburhirwe mpu ye mwami w'aBayaahudi. Ngahe ali? Rhwalibwene enyenyeezi yaage ebushoshookero bw'ezuuba, ntya ku rhwayinjire kumuharamya.»
3Mwami Heroode abeere ayunva ogoola mwazi, ahahaala haguma n'abantu booshi b'eYerusaleema. 4Aja agusha abadaahwa bakulu booshi n'abigiriza b'amarhegeko, ababaza ngahe Kirisitu alikwaneene aburhirwe. 5Bamushubiza ntya: «Omu gishagala ch'eBeteleheemu omu gihugo ch'eYudeeya. Kwenge by'ebiyandikirwe n'omuleebi ntya:
6‹Wooyo Beteleheemu, gishagala ch'omu gihugo ch'eYudeeya,
arhali wooyo we mugeeke omu bishagala by'egihugo ch'eYudeeya;
kwenge emwawe nji harhengera omurhegesi
nj'alanga Israheeli, lubaga lwani.›»
7 Heroode aja ahamagala aboola banyabwenge omu bwibisho, anababaziriza egihe eyoola nyenyeezi yabonekaga. 8Enyuma abarhuma eBeteleheemu, ababwira ntya: «Mugende mubazirize bwinja emyaazi y'oyoola mwana. Hano muba mwamubwene, mumenyeese yi naani nje yo kumuharamya.»
9Bamalire kuyunviriza mwami, bagenda. Elaala nyenyeezi babaaga babwene eBushoshookero bw'ezuuba, yalema yagenda embere zaabo. Yabeere yahika elugulu w'ahantu omwana aliiri, yayimanga. 10Babeere babona eyoola nyenyeezi, basiima bweneene.
11Baaja omu nju, baabona omwana haguma na nyina, Mariya. Bafukama embere z'omwana bamuharamya. Babohoola eshaho zaabo bahemba oyo mwana ehooro, obubaani n'amarashi.
12Nnamahanga aja ababuza omu biloorho oku barhachigalukaga emwa mwami Heroode. Ntyo, baja bagaluka emwabo kugerera eyindi njira.
Yozefu, Mariya n'omwana Yeesu bashagira eMiisiri
13Abo banyabwenge b'eBushoshookero bw'ezuuba bayuusize kugenda, malahika wa Nnaweerhu abonekera Yozefu omu biloorho anamubwira ntya: «Yimanga, rhoola omwana na nyina oshaagire eMiisiri. Obeere yo guhika amango nji nakubwira oku ogaluke, kwenge mwami Heroode ashondere kuyirhiisa omwana.» 14Yozefu ava ayimanga mw'oboola budufu, arhoola omwana na nyina baaja eMiisiri. 15Abeera yo guhika amango mwami Heroode afaaga. Ebyoola byabaaga yi bijirike ebi Nnaweerhu aderhaga ntya kugerera omuleebi: «Nahamageere mugala waani arhenge eMiisiri#2.15 Osome Oseya 11,1..»
Abaana b'obuzaana bayirhwa
16 Heroode abeere abona oku abanyabwenge bamurhebekere, akaliha bweneene. Arhuma abantu omu Beteleheemu n'omu bishagala by'eburhambi bw'ahoola, bagende kuyirha abaana booshi b'obuzaana, gurhengera okuburhwa guhika myaaka ebiri. Ajiraga ntyo gukulikirana n'emyaazi abanyabwenge babaaga bamubwirire. 17Chaaja chajirika echinwa omuleebi Yeremiya aderhaga ntya:
18«Omulenge gwayunvikeene eRaama,
Rakeeli yeli alirira abaana baage bweneene;
arhanashondere asiriirizwe, bulaala barhachiri ho.»#2.18 Osome Yeremiya 31,15.
Yozefu, Mariya na Yeesu barhenga eMiisiri
19Enyuma z'ogufa kwa Heroode, malahika wa Nnaweerhu abonekera Yozefu omu biloorho eyo Miisiri. 20Amubwira ntya: «Yimanga, rhoola omwana na nyina, ogaluke omu gihugo ch'eIsraheeli, kwenge abashondaga kuyirha omwana bafiire.»
21Yozefu ayimanga, arhoola omwana na nyina, agaluka omu gihugo ch'eIsraheeli.
22Aliko Yozefu abeere ayunva oku Arikelaayo ye yimireeYudeeya ahaali h'eshe Heroode, ayuubaha kuja yo. Enyuma z'oguhanuulwa omu biloorho, aja omu gihugo ch'eGalilaaya. 23Aja kulama omu gishagala chiyirikwa Nazareeti, yi bijirike ebyaderhwaga n'abaleebi ntya: «Alema ayirikwa Munazareeti.»
Currently Selected:
Matayo 2: HAV
Highlight
Share
Compare
Copy
Want to have your highlights saved across all your devices? Sign up or sign in
©️2025 The Seed Company, Association de Traduction de la Bible et Alphabétisation (ATBA), and the Comittee de Langue Havu
