Matayo 17
17
Yeesu ahindulwa eshusho
Mariko 9.2-10; Luuka 9.28-36
1Enyuma za siku ndarhu, Yeesu arhoola Petero, Yakobo na Yohaana mwene waabo Yakobo. Azamuka haguma nabo oku musozi guleehere, babera ko bonyine. 2Babeere bali kw'ogo musozi, Yeesu ahindulwa eshusho embere zaabo. Eshusho lyaage lyabaraganya nka zuuba. N'emyambalo yaage yahinduka mweru nka bulangashane.
3Ho n'aho, abo bigirizwa babona Muusa na Eliya bali baganiira na Yeesu. 4Petero ava abwira Yeesu ntya: «Nnaweerhu, kuli kwinja rhubeere hano. Kandi akaba oshondere, nayumbaka biraaro bisharhu hano, chiguma chaawe, echindi cha Muusa n'echindi cha Eliya.»
5Oku Petero achiri aderha, ho n'aho hahulukiira oluhomo lulangasheene lwabashukulira. Mw'olo luhomo mwayunvikana omulenge guli gwaderha ntya: «Oyu, ye Mwana waani muzigirwa, nsimiswa naye. Mumuyunvirize!» 6Abo bigirizwa babeere bayunva ogo mulenge, bayuubaha bweneene, bakumbagala, amalanga mahika ahashi. 7Aliko Yeesu abayegeera, abahuma ko anababwira ntya: «Muyimange, murhanayuubahaga!» 8Babeere bayinamula ameesho, barhabonaga owindi muntu arhali Yeesu yenyine.
9Yeesu n'abigirizwa baage babeere bali bayandagala kw'ogo musozi, abarhegeka ntya: «Ebi mwabwene ko, ntaaye mubibwirage guhika amango nyoono Mwene oMuntu nji nafuuka.»
10Abo bigirizwa baamubaza ntya: «Girhuma abigiriza b'amarhegeko banaderha oku bihemere Eliya arhange ayinje?» 11Yeesu abashubiza ntya: «Kubinali, bihemere Eliya arhange ayinje kubahugulira ebintu byooshi. 12Aliko leero, mbabwirire oku Eliya ahikire miira, sy'aliko abantu barhamurhegeeraga. Banamujirira nk'oku balishondere. Ko n'oko, ku naani Mwene oMuntu, nji bandibuuza.» 13Ho n'aho abo bigirizwa baage, baja bamenya oku Yeesu aliiri abashambalira elugulu wa Yohaana Mubatiiza.
Yeesu afumya omuzaana walilwere egichuli
Mariko 9.14-29; Luuka 9.37-43
14Yeesu n'abigirizwa baage bagendekera n'olugenzi, banahika ah'echigusho ch'abantu chaliiri. Muntu muguma ayegeera hoofu na Yeesu, afukama embere zaage. 15Anamubwira ntya: «Nnaweerhu! Oyunvire mugala waani obonjo, kwenge ajira endwala y'egichuli. Obo bulwala bwamulibwize bweneene. Ngasi mango anakumbagala omu muliro n'omu menji. 16Nalimulerheere abigirizwa baawe, aliko barhagalire kumufumya.»
17Yeesu abwira abigirizwa baage ntya: «Mwe bantu b'echi gisisi muli babi, murhanagwerhe chiro n'obwemeezi! Nagendekera kubeera nenyu n'okulema nayunviriza ebinwa byenyu guhika mango machi? Munderhere oyo mwana hano!»
18Yeesu akalihira oyo muzimu waliiri m'oyo mwana, n'okuva amurhenga mo. Ho n'aho oyo mwana afuma.
19Abigirizwa ba Yeesu baja bamuyegeera ey'ali yenyine n'okumubaza ntya: «Waliha! Gichi charhumaga rhwabo rhwafundwa gukuula oyu muzimu?» 20Yeesu abashubiza ntya: «Kwenge obwemeezi bwenyu buli bugeeke. Okuli mbabwirire, chiro nk'obwemeezi bwenyu bwakaba bugeeke nka hiburho higeeke hye haradaali, mwakagala kubwira ogu musozi ntya: ‹Rhenga hano oje haliira› Nago gwanaja ho. Kandi, harhakanaba echintu girhakagalika emwenyu. [21Aliko omuzimu oli ntya arhakakuulwa nk'arhali omu gusaliira n'oguchibuza kulya ebiryo.»]
Yeesu ashuba kubala elugulu w'ogufa n'ogufuuka kwage
Mariko 9.30-32; Luuka 9.43-45
22Lusiku luguma, amango abigirizwa ba Yeesu baliiri bachigushire omu gihugo ch'eGalilaaya, Yeesu ababwira ntya: «Nyoono Mwene oMuntu nahirwa omu fune z'abantu. 23Nabo bantu nji banyirha, aliko olusiku lwagasharhu, nji nafuuka gurhenga omu bafu.» Abigirizwa baage babeere bayunva ntyo, bababala bweneene.
Yeesu na Petero bafurha ekooli ly'eNju ya Nnamahanga
24Enyuma z'ebyo, Yeesu n'abigirizwa baage baaja omu gishagala ch'eGaperanahumu. Bahikire mo, abafurhiisa b'amakooli m'eNju ya Nnamahanga bayegeera Petero n'okumubaza ntya: «K'omwigiriza wenyu arhafurha ekooli ly'eNju ya Nnamahanga?» 25Petero abashubiza ntya: «Neechi analifurha.» Petero abeere aja omu nju, oku arhaza kuderha chintu, Yeesu amubaza ntya: «Simooni, bichi okengereere? Abaami ba lino gulu bafurhiisa amakooli oku bande, ka banafurhisa abaana b'egihugo changwa abahiisi?» 26Petero amushubiza ntya: «Banafurhisa abahisi bonyine.»
Yeesu aja amubwira ntya: «Abaana b'egihugo barhakwaneene gufurha ekooli. 27Aliko, nachiro ntyo, rhurhashondere kugayisa aba bantu. Cho girhumire, oje ebwa nyanja kuloba. N'efi y'oburhanzi wagwarha, oyibumbuule obuunu, wabona mo egicheri ch'efuranga. Echo gicheri, obahe cho omu gufurha ekooli lyaawe n'elyaani.»
Currently Selected:
Matayo 17: HAV
Highlight
Share
Compare
Copy
Want to have your highlights saved across all your devices? Sign up or sign in
©️2025 The Seed Company, Association de Traduction de la Bible et Alphabétisation (ATBA), and the Comittee de Langue Havu
