Luuka 23
23
Yeesu asidaakwa embere za Pilaato
Matayo 27.2,11-14; Mariko 15.1-5; Yohaana 18.28,33-38
1Bala bantu booshi babaaga bali omu kabuga k'aBayaahudi bayimanga, baheeka Yeesu embere z'omwimangizi Pilaato.
2Barhondera kumusidaaka, baderha ntya: «Rhwabugaanire oyu muntu ali ararusa olubaga lwerhu; ali abuza guhaana ekooli emwa mwami mukulu Kayizaari, anali achiiderha yenyine oku ali Kirisitu, k'okuderha mwami.» 3Pilaato amubaza ntya: «Ka wooyo oli mwami w'aBayaahudi?» Yeesu amushubiza ntya: «Wooyo, we waderhere ntyo.» 4Pilaato abwira abakulu b'abadaahwa n'olubaga lw'abantu ntya: «Ntaacho nabwene emw'oyu muntu chagarhuma ahanwa.» 5Aliko, baharhiiriza n'okuderha ntya: «Enyigirizo zaage yi zaarhuma abantu balwisa abakulu omu Yudeeya yooshi. Arhangiriraga eGalilaaya, leero ali kuno.»
Yeesu embere za mwami Heroode
6Pilaato abeere ayunva ebyoola, abaza akaba oyu muntu aliiri Mugalilaaya. 7Abeere amenya oku Yeesu arhengera omu gihugo girhegekerwe na Heroode, amurhuma emwa Heroode, kwenge naye aliiri eYerusaleema mw'ezoola siku.
8 Heroode abeere abona Yeesu, ashagaluka bweneene. Gurhengera miira, aliiri ashonda kumubona kwenge abaaga ayunviirhe emyaazi yaage. Na kandi, aliiri alangaalira okubona Yeesu ajira egisomereene. 9Heroode amubaziiriza, aliko Yeesu ntaacho amushubize. 10Abakulu b'abadaahwa n'abigiriza b'amarhegeko baliiri ahoola, bamusidaaka n'obukali bunene. 11Heroode naye, haguma n'abasoda baage, bashekera Yeesu n'okumukena. Bamalire kumushekera n'okumuyambisa omwambalo gukwiriire bweneene, ashuba kugalula Yeesu emwa Pilaato. 12Olo lusiku, Heroode na Pilaato baaba beera, n'obo embere baliiri banzi.
Yeesu achiirwa olushinja mpw'afe
Matayo 27.11-26; Mariko 15.1-15; Yohaana 18.39–19.16
13Pilaato ahamagaza abakulu b'abadaahwa, abimangizi b'aBayaahudi n'abandi bantu. 14Ababwira ntya: «Mwandeerheraga oyu muntu bulaala mwaderhaga oku aliiri gurarusa olubaga. Namubazize embere zenyu aliko nyoono ntaacho namubwene ko chagarhuma ahanwa omu byooshi mwamusidakiire. 15Heroode naye ntaacho amubwene ko, kwenge arhugaluliire ye. Ntaacho omu by'ajirire chagarhuma ayirhwa. 16Boboola enyuma z'okumushuurha, namulikuula.» [17Ngasi lusiku lukulu lw'ePaasaka, Pilaato alikwaneene kubalikuulira omuntu muguma oli omu munyororo.]#23.17 Olu lukere lurhali omu bitaabu biguma bya miira by'eBibuliya.
18Abantu booshi bayaamira chaligumira ntya: «Oyirhe oyu muntu! Orhulikuulire Baraaba!» 19Baraaba abaaga ashwekerwe elugulu w'entambala yabaaga omu gishagala n'okuyirha omuntu. 20Pilaato ashuba kuderha nabo, kwenge alishondere alikuule Yeesu. 21Aliko boowe baalema bayaama ntya: «Omubambe oku musalaaba! Omubambe oku musalaaba!» 22Pilaato ababwira ntya obwa gasharhu: «Bubi buchi ajirire? Ntaacho namubwene ko chagarhuma ayirhwa. Enyuma z'okumushuurha, namulikuula.» 23Aliko bachihanda n'olwamo lunene, omu guhema abambwe oku musalaaba. Olwamo lwabo lunene lwahimana.
24Buzinda, Pilaato arhegeka oku bibe nk'oku abantu baahemaga. 25Alikuula ola bashondaga, wali wahirirwe omu munyororo elugulu w'obugome n'okuyirha omuntu; abaheereza Yeesu, bamujire nk'oku balonzaga.
Yeesu abambwa oku musalaaba
Matayo 27.31-44; Mariko 15.20-32; Yohaana 19.17-24
26Abasoda b'aBarooma babeere bali baheeka Yeesu emunda bamuyirhira, bashimaanana n'omuntu muguma oyirikwa Simooni, w'egishagala ch'eKureene, waliiri gurhenga omu shwa. Baava bamurhoola n'okumuheesa omusalaaba mpu aguheeke enyuma za Yeesu.
27Olubaga lunene lw'abantu lwali kulikiire Yeesu. Ahagarhi kaabo haliiri abakazi baliiri balira n'oguchiniguula elugulu waage. 28Yeesu abahindamukira n'okubabwira ntya: «Mwe bakazi b'eYerusaleema, murhandiriraga. Aliko muchiilirire n'abaana benyu. 29Kwenge esiku zayinjire abantu nji baderha ntya: ‹Bagishirwe abakazi b'engumba, zigishirwe enda zirhashubiraga kuburha n'amabeere marhashubiraga kuyonsa!› 30Amo mango, abantu nji barhondera okubwira emisozi ntya: ‹Murhurhogere ko!›, n'okubwira orhusozi ntya: ‹Murhuhambe!› 31Bulaala eyi bankajira ebyoola oku murhi mubishi, bichi nji byajirirwa omurhi guyuumire?»
32Kandi, abasoda bali baheekere ebishumuusi bibiri, byaali byaaja kuyirhwa haguma na Yeesu.
33Babeere baagera ahantu hayirikwa Mpanga, bamubambira ahoola oku musalaaba, na bila bishumuusi bibiri, chiguma ekulyo n'echindi ekulembe. 34[Yeesu aderha ntya: «Daarha, obababalire, kwenge barhamenyere echi bali baajira.»]#23.34 Olu lukere lurhali omu bindi bitaabu biguma bya miira by'eBibuliya. Abasoda bagabaana emyambalo yaage omu kuyeesha esimbi. 35Abantu baliyimangire ahoola, baanali baalola. Abarhegesi b'aBayaahudi boowe, bashinyagulira Yeesu, baderha ntya: «Achungwire abandi; agichungule yenyine, akaba ali Kirisitu, ola Nnamahanga agishogere!»
36Abasoda nabo baliiri bamushekera. Bayinja kumuha edivaayi y'enkala, 37n'okumubwira ntya: «Akaba oli mwami w'aBayaahudi, ogifumye wenyine!» 38Haliiri kandi elugulu waage ogu mwandiko: «Oyu ye Mwami w'aBayaahudi.»
39Muguma omu bishumuusi bibambirwe oku musalaaba amudukanga ntya: «K'orhali we Kirisitu? Ochifumye wenyine onarhufumye!» 40Aliko echindi gishumuusi chakalihira echaabo ntya: «K'orhagwerhe chiro obuuba bwa Nnamahanga, wooyo weeri waahanwa kuguma naye? 41Oku rhwewe, obuhane burhukwaneene, kwenge rhuli rhwayankirira egikwaneene ebijiro byeerhu. Aliko oyuula nta chibi n'echiguma ajirire.» 42Ashuba kuderha ntya: «Yeesu, onyibuke hano nj'oja omu Bwami bwawe.» 43Yeesu amushubiza ntya: «Okuli, nkubwirire, zeene waaba haguma naani omu Paradizo#23.43 Paradizo hali hantu abeera ba Nnamahanga balama embere zaage enyuma z'ogufa kwabo..»
Olufu lwa Yeesu
Matayo 27.45-56; Mariko 15.33-41; Yohaana 19.28-30
44Zaali zikola zashonda kuba saa ndarhu; haaba omwizimya oku gihugo chooshi kugera aha saa mwenda, 45kwenge ezuuba lyalihirimire. N'omwenda#23.45 Ogo mwenda gwali gabire ahatagatiifu n'ahatagatiifu bweneene omu Nju ya Nnamahanga. Osome Lubunguluko 26.31-33; Baheburaniya 10.19-22. gw'omu Nju ya Nnamahanga gwachisharhula ahagarhi. 46Yeesu ayaama ntya: «Daarha, mpirire omurhima gwani omu fune zaawe.»#23.46 Osome Nanga 31.5-6. Amalire kuderha ebyoola, asimuuka.
47Omukulu w'abasoda abeere abona ebyabeere, akuuza Nnamahanga n'okuderha ntya: «Okuli, oyu muntu aliiri okwaneene!» 48Abantu booshi balichigushire ahoola kulola kw'eyo myaazi, babwene ebyabeere, bagaluka emwabo n'amaganya manene.
49Booshi baliyinji Yeesu, n'abakazi baliiri bamuherekeeze gurhengera eGalilaaya, bayimanga hale, baalola ebiri byaaba.
Yeesu ahambwa
Matayo 27.57-61; Mariko 15.42-47; Yohaana 19.38-42
50-51Haliiri mulume muguma oyirikwa Yozefu wahulukiraga eHarimateya, gishagala chiguma ch'aBayaahudi. Aliiri muntu mwinja onakwaneene, anagendaga alinga obwime bwa Nnamahanga. Aliiri muguma w'akabuga k'aBayaahudi, aliko arhaali yemereere omuhigo n'ebijiro byaabo by'okuyirha Yeesu. 52Aja emwa Pilaato, ahema omubiri gwa Yeesu. 53Aguyandagaza oku musalaaba, aguzingira kw'edaraape, aguhira omu shinda yajokolwaga omu baale. Mweyo shinda, mwabaaga murhashubiraga guhaabwa muntu. 54Olo lusiku, lwaliiri lwagarhaano, lo lwanaliiri lusiku l'ogurheganya eSaabato, n'eSaabato yali kola gurhondera.
55Balaala bakazi baliiri barhengeere eGalilaaya haguma na Yeesu, bakulikira Yozefu. Baabona eshinda n'obulyo bahiraga mo omubiri gwa Yeesu. 56Bagaluka gurheganya amavurha n'amarashi. Olusiku lw'eSaabato, bahumuuka, gukulikirana n'eRhegeko lya Nnamahanga.
Currently Selected:
Luuka 23: HAV
Highlight
Copy
Compare
Share
Want to have your highlights saved across all your devices? Sign up or sign in
©️2025 The Seed Company, Association de Traduction de la Bible et Alphabétisation (ATBA), and the Comittee de Langue Havu
