लुका 2
2
येसुके जलम
मत्ति १:१८-२५
1उ दिनमे रोमि महाराजा अगस्टस अपना रोम साम्राज्यक अधिनमे रहल सब देसके मनइभरिन नाउँ दरता करना हुकुम दहनें। 2इ पहिला नाउँ दरता करे बखत सिरिया इलाकक् बन्ना हाकिम कुरेनियस रेहें। 3सब जनें नाउँ दरता कराइ अपना-अपना पुरखाभरिनके गाउँ आउर सहर गिनें।
4योसेफ फेक गालिलके नासरत सहरति उप्परघइन राजा दाउदके सहर#२:४ दाउदके सहर: दाउदके सहर कहलके दाउदके राज्य करल सहर नाइआहे, पर उनका जल्मल आउर बारहल सहर आहे। यहुदियाके बेथलेहेम गिनें, काहिक्कि योसेफ दाउदके बन्सके रेहें। 5नाउँ दरता कराइ योसेफ अपनसँघ मँगनि होइल मरियमकेहें लइके गिनें। उ बखत मरियम गरहुजिउक रेहें। 6योसेफ आउर मरियम बेथलेहेम रहल बखत लरका हुइना बखत आइगिला। 7मरियम अपना बन्ना लउँरा जल्मइनें आउर लत्तालइक लपेटके डोंरामे लिटइनें, काहिक्कि धरमसालामे जगा नाइरेहे।
भिंर्रहुवा आउर स्वरगदुत
8उहि रात बेथलेहेम सहरके लिग्घे मइदानमे भिंर्रहुवाभर रातिक अपना भिंरबाभरिनके रेखदेख करत रेहें। 9तउ परभुके एकठोर स्वरगदुत अरबरगि ओइनतिरा देखा परनें, आउर परभुके तेज उजियर ओइन चारोघइन चम्कल आउर उ देखके ओइनें बहुत जोरति डरागिनें। 10पर स्वरगदुत ओइन कहनें, “नाडराउ, काहिक्कि मइ सब मनइभरिनके तहन बहुत खुसि दहना सुसमाचार लइके तोइनतिरा आइल आहुँ। 11आज दाउदके सहरमे तोइन तहन एकठोर मुक्तिदाताके जलम होइल आहे। उहि खिरिस्ट परभु आहें। 12तोइन तहन इ चिन्हा रिहि, तोइनें एकठोर लरकाकेहें लत्तालइक लपेटके डोंरामे लिटाइल पइबो।”
13हुँवाँ अरबरगि ढेरे स्वरगदुतभर देखा परनें आउर परमेस्वरके परसन्सा करति ओइनें अइसे कहनें,
14“सबति उप्पर स्वरगमे रहबइया परमेस्वरकेहें महिमा होबे,
धरतिमे जउन मनइभरिनसँघ उ खुसि आहें, ओइन सान्ति होबे।”
15स्वरगदुतभर स्वरगमे लउटके गेलपाछुक भिंर्रहुवाभर एक अउरेति कहनें, “चलो, हमरे बेथलेहेम सहरतक जाइ, आउर परमपरभुन बताइल घटनक बारेम देखि।”
16भिंर्रहुवाभर हालि-हालि बेथलेहेम गिनें, हुँवाँ मरियम आउर योसेफकेहें भिटनें आउर लरकाकेहें भर डोंरामे लिटाइल पइनें। 17जब भिंर्रहुवाभर लरकाकेहें दिखनें, तउके लरकक बारेम स्वरगदुत ओइन जा कहले रेहें ओइनें सुनइनें। 18भिंर्रहुवाभरिनके बात सुनके सब जनें अचम परनें। 19पर मरियम उ सब बात अपना मनमे धरनें आउर सुँचति रहनें। 20तउ उ भिंर्रहुवाभर स्वरगदुतभरिनके कहल ढार देखके परमेस्वरके महिमा करति आउर परसन्सा करति लउटके चलगिनें।
मन्दिरमे येसुकेहें अरपन
21लरका जल्मल अठँमा रोजुम लरकक खतना करनें आउर उनका नाउँ येसु धरनें, उ नाउँ मरियम गरहुजिउ हुइनाति पहिले स्वरगदुत दहले रेहें।#लेबि १२:३; लुका १:३१
22मोसन दहल बेबस्था ढार जब ओइन चोखा हुइना बखत पुरा होइल तउके उनका दाइ-बाबा उनके परमपरभुके आगे यरुसलेमके मन्दिरमे अरपन करे लइनें,#लेबि १२:६-८ 23काहिक्कि परमपरभुके बेबस्थामे लिखल आहे, “पहिलउठा जल्मल लरकाकेहें परमपरभुके आगे अरपन करेक परता।”#पर्स १३:२,१२,१५ 24तउके परमपरभुके बेबस्थामे कहल ढार “एक जोरि धउरि या कबुत्तरके दुइठोर बच्चा” लइके ओइनें बलि चरहाइ अइनें।#लेबि १२:८
25उहिबखत यरुसलेममे सिमियोन नाउँ रहल मनइ रेहें। उ धरमि मनइ रेहें आउर परमेस्वरके भक्ति करें। उ पबित्र आत्मक अगबाइ पाक इस्राइलिभरिन मुक्ति दिबइयक डगर देखत रेहें। 26“परमपरभुन पठाइल खिरिस्टकेहें नाइदेखततक तुम नाइमरबो” कहिके उनके पबित्र आत्मा कहले रेहें। 27सिमियोन पबित्र आत्मक अगबाइ पाक मन्दिरमे गिनें। ओहकापाछुक मरियम आउर योसेफ फेक लरका येसुकेहें लइके मन्दिरमे बेबस्थामे कहल ढार रिति पुरा करे अइनें। 28सिमियोन अपना गोदिम लरका लइके परमेस्वरके परसन्सा करति कहनें,
सिमियोनके इस्तुतिगान
29“हे परमपरभु, तुम अपना बाचा करल ढार,
अब अपना दासकेहें सान्तिति मरे देउ।
30काहिक्कि तुम्हर पठाइल मुक्ति दिबइयन मइ अपना आँखिति देखेक पइनु,
31तुम उनके सब जातके मनइभर मुक्ति जानें कहिके पठइले बाटो,
32अउरे जातके मनइभरिन डगर दिखाइक तहन उजियर,
आउर हम्मर इस्राइलिभरिनके महिमा होइ।#यसइ ४२:६; ४९:६; ५२:१०”
33लरकक बारेम सिमियोनके कहल बात सुनके उनका दाइ बाबा अचम परनें। 34सिमियोन ओइन आसिरबाद दइक मरियमकेहें कहनें, “इ लरकाकेहें इस्राइलके ढेरे मनइभरिनके तहन नास आउर उद्धारके चिन्हा होबे कहिके परमेस्वर छँटले आहें, आउर ढेरे मनइभर उनका बिरुधमे मन्किहें। 35अइसे होइ तउके ओइन भित्रि मनके बात दिखाइ आउर दुखके पुइन तरबार लइके तुम्हर दिलमे गोझि।”
हन्ना परमेस्वरके परसन्सा करनें
36उहिबखत मन्दिरमे हन्ना नाउँ रहल एकठोर बुरहिया अगम्जानि रेहें। उ आसेर कुलके फनुएलके लउँरिया रेहें। बेह होइलके सात बरस पाछुक उ बिधबा हुइगेल रेहें। 37उ चउरासि बरस के बुरहिया रेहें। उ उपबास रहिके मन्दिरमे दिन रात पराथ्ना करके परमेस्वरके सेबा करें। 38उहिबखत हन्ना फेक मरियम आउर योसेफके पाँजर आक परमेस्वरकेहें धन्यबाद चरहइनें आउर यरुसलेमके उद्धारके असरा दिखइया सबके येसुके बारेम बतइनें।
39योसेफ आउर मरियम परमपरभुके बेबस्थामे कहल ढार सब काम उरबाके, ओइनें गालिलके अपना सहर नासरत लउटके चलगिनें। 40लरका येसु अक्किललइक भरपुर होक बरह्ति आउर बलगर हुइति गिनें, परमेस्वरके आसिरबाद उनकाउप्पर रेहे।#मत्ति २:२३
येसु मन्दिरमे
41येसुके दाइ-बाबा सालुक यहुदि छुटकारक पबनि मनाइ यरुसलेम जामें। 42जब येसु बारा बरसके हुइनें, सालुक ढार पबनि मनाइ येसुके दाइ-बाबा येसुकेहें लइके गिनें। 43पबनि मानके ओइनें घरघइन लउटत रेहें। पर येसु यरुसलेममे रहिगिनें आउर इ बात येसुके दाइ-बाबा पते नाइपइनें। 44येसुके दाइ-बाबा सुच्नें कि येसु अउरे यातरिभरिनसँघ हुँइहें कहिके दिन भरका डगर निङ्गनें। साँझतक येसुकेहें नाइदिखनें तउके अपना नात-पात आउर सँघरियाभरिनतिरा ढुन्हनें, 45पर ओइनें येसुकेहें नाइपइनें तउके फेर लउटके यरुसलेममे येसुकेहें ढुन्हे गिनें। 46तिन रोजपाछुक येसुकेहें मन्दिरमे यहुदि धरमगुरुभरिन बात सुनत आउर पुछत पइनें। 47येसुके अक्किलबुद्धिक जबाफ सुनके सब जनें अचम परें। 48येसुकेहें देखके येसुके दाइ-बाबा अचम परनें, आउर येसुके दाइ कहनें, “मोर लउँरा, तुम हम्मर सँघे इ का करलो? देखो, तुम्हर बाबा आउर मइ चिन्ता करति तुम्हिन ढुन्हत रिहि।” 49पर येसु ओइन कहनें, “तोइनें मोहके काहिक ढुन्हत रोहो? का मोहके अपना बाबक घरे रेहेकपरि कहिके तोइन पता नाइरेहे?”#पर्स १२:१-२७; बेबस १६:१-८ 50पर येसुन कहल बात मरियम आउर योसेफ नाइसम्खनें। 51ओहकापाछुक येसु अपना दाइ-बाबासँघ नासरत चलगिनें, आउर ओइन आग्याँ मन्ति बइठनें। उनका दाइ उ सब बात अपना मनमे धरनें। 52अइसे येसु अक्किलबुद्धि आउर देहिंमे परमेस्वर आउर मनइभरिनके अनुगरहमे बरह्ति गिनें।#१ समु २:२६; हितो ३:४
Currently Selected:
लुका 2: KTHR
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
