पेरेरित 1
1
येसु स्वरगमे उठाइलगिनें
1माननिय थियोफिलस, येसुन करल काम आउर सिखाइल सब सिछ्छक बारेम मइ येहति पहिलेक किताबमे लिखसिक्ले आहुँ।#लुका १:१-४
2अपन छाँटल पेरेरितभरिन येसु पबित्र आत्मा मारफत आग्याँ दइक स्वरगमे उठाक लइजाइल रोजतकके सब बात पहिलेक किताबमे लिखल आहे। 3येसु दुख सहिके कुरुसमे मरलपाछुक येसु चालिस रोजतक ढेरे दाउँ ओइनतिरा देखा परनें आउर मेल-मेलक पक्का परमानलइक अपनकेहें जिति आहुँ कहिके दिखइनें। ओइनें येसुकेहें दिखनें आउर उ ओइनसँघे परमेस्वरके राज्यक बारेम बात करनें।
4एकदाउँ येसु ओइनसँघे खाना खाइ बइठे बखत ओइन अइसे आग्याँ दहनें, “तोइनें यरुसलेममहति कहुँ नाजाउ, पर मोर बाबा पबित्र आत्मा दहमु कहिके करल बाचाकेहें असरा लागके बइठो। येहका बारेम मइ तोइन पहिलेहें फेक कहले रुहुँ।#लुका २४:४९ 5काहिक्कि युहन्ना ते पानिलइक बप्तिस्मा दियें, पर थोरिक रोजमे तोइन पबित्र आत्मालइक बप्तिस्मा होइ।”#मत्ति ३:११; मर्क १:८; लुका ३:१६; युह १:३३
6उहिकमारे जब पेरेरितभर येसुसँघ जमा हुइनें, तउ ओइनें येसुकेहें पुछनें, “परभु, का तुम यिहि बखते हम्मर इस्राइल देसकेहें मुक्त करइबो?”
7येसु ओइन कहनें, “इ समयके बारेम जन्ना काम तोइन नाइआहे। इ समय मोर बाबा अपनें तुक्ले आहें। 8पर तोइनमे पबित्र आत्मा आइलपाछुक तोइनें सक्ति पइबो। ओहकापाछुक तोइनें यरुसलेममे, सारा यहुदियामे, सामरियामे आउर धरतिक आखरि कोनितक मोर साछि हुइबो।”#मत्ति २८:१९; मर्क १६:१५; लुका २४:४७-४८ 9येसु इ बात मनक सिकलपाछुक, ओइन दिख-दिखति उप्पर-उप्पर स्वरगघइन उठाइलगिनें। आउर बदरि उनके तोपलहल। उहिकमारे ओइनें फेर येसुकेहें देखे नाइसिक्नें।#मर्क १६:१९; लुका २४:५०-५१
10ओइनें एकटक लगाक बदरिम येसु उप्पर जाइत दिखतिरहल बखत सेत लत्ता पइंधल दुइ जनें मनइ#१:१० दुइ जनें मनइ: हिंयाँ दुइठोर मनइ कहलके स्वरगदुतभर आहें अरबरगि ओइन लिग्घे देखा परनें। 11ओइनें कहनें, “ए गालिलके मनइ, तोइनें काहिक ठरहेक बदरिघइन देखत बाटो? येसु ते स्वरगमे चलगिनें। उनके जइसे तोइनें अब्भे जाइत दिखलो, उस्तिहिं उ फेर कुइ रोज लउटके अइहें।”
यहुदा इस्करियोतके बदलामे मतियासके नियुक्ति
12तउके पेरेरितभर जइतुन कहना डिङ्गामहति यरुसलेम लउटनें। यरुसलेमतिति उ डिङ्गा लगभग एक किलोमिटर दुर आहे। 13यरुसलेम पुगके ओइनें अपना बइठना घरके उप्परका तल्लाके कुन्ठिमे गिनें। ओइनें पत्रुस, युहन्ना, याकुब, अन्दरियास, फिलिप, थोमा, बारथोलोमाइ, मत्ति, अल्फयसके लउँरा याकुब, देसभक्त दलके सिमोन आउर याकुबके लउँरा यहुदा रेहें।#मत्ति १०:२-४; मर्क ३:१६-१९; लुका ६:१४-१६ 14ओइनें सब जनें अक्के मनके होक लगातार पराथ्ना करति रेहें। उ भिरमे येसुके दाइ मरियम, आकुर मेहरुवाभर आउर येसुके भइयाभर फेक रेहें।
15एक रोज, जब लगभग एक सउ बिस जनें बिस्वासिभर जमा होइल बखत पत्रुस ठरहेक कहनें, 16“दादाभइयाभर सुनो, येसुकेहें पकरइयाभरिनके अगुवा यहुदा इस्करियोतके बारेम पबित्र आत्मा दाउदके मुहति धरमसास्त्रमे पहिलेहें मन्कल बचन पुरा होइक परि कहिके बतइनें। 17काहिक्कि यहुदा इस्करियोत फेक हम्मरसँघ परभुके बारा जनें पेरेरितभरिनमहति एक जनें रेहें आउर हमरे ढार परभुके काम करेक तहन छँटल रेहें।” 18यहुदा इस्करियोत अधरमति कमाइल पइंसालइक एकठोर खेत खरिदल। उहि खेतमे उ मुहके बल गिरल आउर ओहका पेट फुट्गेल, आउर ओहका सब भोंरपटिङ्गा निकरगेल। 19तउके यरुसलेमके मनइभर इ बात पता पाक खेतके नाउँ अपना भासामे “आखेल्दामा” धरनें, ओहका मतलब “रकतके खेत” आहे।#मत्ति २७:३-८
20पत्रुस फेर कहनें, “काहिक्कि भजनसङ्गरहक किताबमे अइसे लिखल आहे,
‘ओहका घरमे कुछु फेक नाहोबे,
आउर हुँवाँ बइठेक तहन कुइ नाहोबे।
अइसे फेक लिखल आहे,
ओहका करना कामके जुम्मा अउरे मनइ लेहे।’#भज ६९:२५; १०९:८
21-22“उहिकमारे हम्मरसँघ रहल मनइभरिनमहति एकठोर अइसन मनइकेहें छाँटेक परि, जउन मनइ परभु येसु हम्मरसँघ रेहे बखत हरदम रेहे। अइसन मनइ जउन युहन्नाके बप्तिस्मा तिति लइके येसु हम्मरति स्वरगमे लइजाइलगेल रोजतक हम्मरसँघ रेहे। उ मनइ हम्मरसँघे येसु फेर जिति होइल बातके साछि होइक परना आहे।”#मत्ति ३:१६; मर्क १:९; १६:१९; लुका ३:२१; २४:५१
23उहिकमारे ओइनें दुइ जनें मनइभरिन आगे लइनें। एक जनें बारसाबास कहना युसुफ रेहे, जेहका नाउँ युस्तस फेक रेहे। अउरे मनइक नाउँ भर मतियास रेहे। 24ओइनें अइसे पराथ्ना करनें, “हे परभु, तुम सब मनइक मनमे रहल बात जन्तो। उहिकमारे परभु, हम्हिन दिखादेउ, यि दुइ महति पेरेरित होक सेबा करेक तुम केहके छँटले बाटो। 25काहिक्कि यहुदा इस्करियोत भर मरके जहाँ जाइक परना रेहे, उहि जगामे चलगेल।” 26ओहकापाछुक ओइनें गोटि डरनें, उ गोटि मतियासके नाउँमे परल। तउके उ गेरा पेरेरितभरिनमे थपलगिनें।
© 2024 (Active), Mother Tongue Translators Society and Wycliffe Bible Translators, Inc. All rights reserved.