२ थेसलोनिकि 2
2
बेबस्था भङ्ग करइया
1दादाभइयो, हम्मर परभु येसु खिरिस्ट फेर अइना बारेम आउर येसुकेहें भेंटेक तहन परमेस्वर हम्हिन एकसँघे जुटना बिसयमे हमरे तोइन बिन्ति करतहोइ,#१ थेस ४:१५-१७ 2अगर कुइ परभु अइना रोज आइगेल आहे कहिके कहि कहलेति, तोइनें चिन्ता नाइकरियो आउर नाइघबरइयो। उ रोजके बारेम हमरे अगम्बानि मन्के बखत, या परचार करे बखत अइसे कहले रेहें कहिके कुइ दाबि करे सिकि या कुइ हम्मर नाउँमे पत्र फेक पठाइ सिकि, पर तोइनें ओइन बातमे बिस्वास नाइकरियो। 3पर कुइ फेक कुछु बातलइक तोइन धोखा नादेहे। काहिक्कि परमेस्वरके बिरुधमे बन्ना बिद्रोह नाइआइततक आउर नास होइक परना बेबस्था भङ्ग करना मनइ नाइआइततक, परभुके रोज नाइआइ। 4उ परमेस्वरके बिरोध करि तउके मनइभर परमेस्वर मानके पुजल सब चिझके बिरोध करि आउर अपनकेहें सबति बन्ना सम्झि। उत्तेकिल नाइ उ परमेस्वरके मन्दिरमे पेलके बइठि आउर “महि परमेस्वर आहुँ” कहिके कहि।#दान ११:३६; इज २८:२
5मइ तोइनसँघ रेहेबखत इ सब बात तोइन कहले रुहुँ। का तोइनें बिस्राडरलो? 6दिन पुगलपाछुक बेबस्था भङ्ग करइया देखा परि। अब्भे ओहके कउन बातलइक रुक्ले आहे कहिके तोइनें जन्ले बाटो। 7काहिक्कि बेबस्था भङ्ग करइया अपना काम भित्रेभित्तर सुरु करसिक्ले आहे। पर ओहके थमहतिरहना सक्ति नाइहटाइततक उ खुल्ला रुपति काम करेक नाइपाइ। 8येहके थमहतिरहना सक्ति हटलपाछुक उ बेबस्था भङ्ग करना मनइ देखा परि। पर परभु येसु अपना मुहके तरबारलइक ओहके निङ्टइहें आउर उनका आगमनके महिमित परकासति नास करहें।#यसइ ११:४ 9बेबस्था भङ्ग करइया मनइ सइतानके सक्ति लइके आइ आउर सब मेलक झुठ चिन्हाभर दिखाइ आउर अचम-अचमके काम करि।#मत्ति २४:२४ 10जत्ता जनें नास होइ जाइत आहें, ओइन सब मेलक छल करके धोखा दिहि, काहिक्कि ओइनें मुक्ति दहना सत्य बचनकेहें पिरेम करना इन्कार करतियाँ। 11उहिकमारे ओइनें झुठ बातमे बिस्वास करें कहिके परमेस्वर ओइनतिरा छलके सक्ति पठइतियाँ, 12ताकि सत्य बातमे बिस्वास नाइकरके, दुस्टतामे आनन्द मनइया सब जनें दन्ड पामें।
मुक्तिक तहन छँटलभर
13परभुन पिरेम करल दादाभइयो, तोइन तहन सदा हमरे परमेस्वरकेहें धन्यबाद चरहइहिक परता, काहिक्कि परमेस्वर तोइन उद्धार देहेक तहन पहिलिहिति छँटले आहें। इ उद्धार पबित्र आत्माति पबित्र बनइना काम आउर सत्य बातमे करल बिस्वासति अइता। 14उहि मुक्तिक तहन हम्मर परचार करल सुसमाचारति परमेस्वर तोइन बुलइनें, ताकि हम्मर परभु येसु खिरिस्टके महिमामे तोइनें सहभागि होइ सिको। 15उहिकमारे दादाभइयो, बिस्वासमे बलगर होक इस्थिर रोहो आउर हम्मर मुहति सुनल होबे या पत्रति होबे, हम्मर सिखाइल सिछ्छा बरहियस पालन करो।
16अब हम्हिन पिरेम करइया आउर अनुगरह मारफत हम्हिन सदा सान्त्वना आउर बरहिया आसा दिबइया हम्मर परभु येसु खिरिस्ट आउर परमेस्वर बाबा 17तोइन उत्साह दियें आउर सब बरहिया काम आउर बचनमे बलगर बनामें।
© 2024 (Active), Mother Tongue Translators Society and Wycliffe Bible Translators, Inc. All rights reserved.