लूका 2
2
येशू फुन्च
(मत्ती १:१८-२५)
1होसै याकाङ रोम राज्यभरीयौ महाराजा अगस्टसे मेनो राज्यभरीयौ भर्मीकुङ जनगणना जाट्के हुकुम याहा। 2कुरेनियस सिरिया प्रदेशो मुख्य शासक लेच बेलाङ होसै रोम राज्यौ पहीला फेरौ जनगणना लेया। 3पट्टको जनगणना जाट्के मे-मेह्ल्लौ पुर्खाकुङ ठावाङ आना।
4होट छान्नीसीङ योसेफ टेच भर्मीयौ पुर्खौ ठाउँ बेथलेहेम लेचये जाट्नाङ योसेफ गालील प्रदेशो नासरत टेच ठावीङ यहुदिया प्रदेशो दाऊदो लाङ्घा#2:4 दाऊदो लाङ्घा राजा दाऊद, फुन्च लाङ्घा बेथलेहेमलाक आना। 5जनगणना जाट्के योसेफ मेन कठा विवाह छान्के पक्का छान्च मरियमके लानीसीङ बेथलेहेम नुङा। होस बेला मरीयम मीजा फुन्के लेया। 6होसोको होलाङ लेच बेलाङ न मरीयमौ मीजा फुन्च बेला राहा। 7होसोकोके पौवाङ मुच ठाउँ मालेनीसीङ होसोको गोठाङ मुमलेया हटै मरीयमे मेनो मीझार बाबुजाके होलाङ ज फुन्हा हटै होस्के बढीनाङ कुल्हुम्म डोहोटाङ मीसाका।
स्वर्गदूत हटै भेडा माहार्याको
8होसै क्षेत्र नम्सा चउराङ माहार्याकोइ मेकुङ भेडाकुङ बगालके नभी पहरा याहाम मुमलेया। 9प्रभुवो काट स्वर्गदूत होसोकोटुङ डाङ्राहा हटै प्रभुवो महानतौ ज्योति होसोकुङ वरिपरि चम्कडीसा। होसोको पट्ट बेहेरी ज बीरीया। 10बाकी र स्वर्गदूते होसोकोके टेया, “नाबीरीनीस! हीके टेहाङ ङै पट्ट भर्मीकोके ढलीङ आनन्द याहाच सेहेच समाचार नाक्कोटुङ राक्मनङ। 11छीनीङ दाऊदो लाङ्घाङ नाक्कुङ लागी काट मुक्तिदाता फुन्मलेको होस्को ज पापीङ बचडीच ख्रीष्ट प्रभु आलेको। 12नाक्कोइ काट माहार्च बाबुजाके बढीनाङ कुल्हुम्म डोहोटाङ मीसाक्म डाच डुप्डनीस हटै होट जाट्म न होस्कोके चीन्डीढनीस।”
13होसै बेला ज ढलीङ स्वर्गदूतो हुलको अघेराङो स्वर्गदूतकठा राहा। होसोकोइ परमेश्वरके इट टेम प्रशंसा जाट्म लेया,
14“पट्ट टेनाङ ढेनाम परमेश्वरके महीमा अटछाने!
पृथ्वीयाङ परमेश्वर प्रसन्न छान्च भर्मीकोके शान्ति।”
15स्वर्गदूतकुङ हुल होसोकोके डास्म स्वर्गाङ ल्हेसप्याक होसै माहार्याकोइ मेल्लाकोके टेया, “परमेश्वरे कानकोके थाहा याहाच घटनौ बारेयाङ बेथलेहेम सहरलाक आनीङ हटै ओसीङ।”
16होट छान्नीसीङ होसोको झोस्म आना हटै होसोकोइ मरियम, योसेफ हटै चमचम फुन्च बाबुजाके डुपा। बाबुजाके टेहाङ डोहोटाङ डामलेया। 17माहार्याकोइ बाबुजौ बारेयाङ स्वर्गदूतकोइ टेच कुराको होँसा। 18हटै माहार्याकोइ टेच कुरा सेच पट्ट भर्मीको छक्क छाना। 19बाकी र मरियमे माहार्याकोइ टेच पट्ट कुराके मीमनाङ डा हटै होच्यौ बारेयाङ बीचार जाटा। 20हटै माहार्याकोइ होसै स्वर्गदूते टेच लख ज डाङ्के र सेके डीन्नाङ पट्ट कुरौ लागी परमेश्वरके महीमा हटै प्रशंसा याहाम चउरलाक ल्हेसा।
जजौ म्यार्मीन येशू डाच
21आठौँ याकाङ बाबुजाके इस्राएलकुङ चलन अनुसार खतना जाट्नीसीङ होस्कुङ म्यार्मीन येशू डा, होस म्यारमीन चहीन्या होस्को मरीयमौ मीटुकाङ लेके टेनाङ अघेर ज स्वर्गदूते डाके बीर्हीनमल्या। #लेवी १२:३; लूक १:३१
22मोशौ धर्मशास्त्र अनुसार मरियमो चोखडीस्च बेला#2:22 मरियमो चोखडीस्च बेला मोशौ धर्मशास्त्रै टेच लख काट माझौ लागि मीजा फुन्च चालीस दिन न्हुनीङ शुद्ध छान्च बेला छान्ले छाना। होसोकोइ येशूके यरुशलेमाङो मन्दिराङ परमप्रभुटुङ अर्पण जाट्के राका। 23हीके टेहाङ परमेश्वरो धर्मशास्त्राङ रीक्मले, “पट्ट जाहानो मीझार बाबुजा चहीन्या प्रभुके भाक्के परीस्ले।”#प्रस १३:२,१२,१५ 24हटै परमेश्वरो धर्मशास्त्रै टेच लख होसोकोइ “काट जोडी ढुकुर या परेवौ मीजा” चढडीया। #लेवी १२:६-८
25होस बेला सीमीयोन टेच काट भर्मी यरुशलेमाङ मुवोला। होस परमेश्वरके प्रसन्न जाट्म जीबन जीवाच हटै परमेश्वरके डुट्के जाक्च भर्मी लेया। होचे यरुशलेमावो भर्मीकोके बचडीच भर्मीके वाङ्म मुमल्या हटै होस भर्मीर कठा पवित्र आत्मा लेकाङ। 26पापीङ बचडीच परमेश्वरो ख्रीष्टके माडाङ्म नाङ मासीढल टेम पवित्र आत्मै सीमीयोनके थाहा यामोलेकाङ। 27पवित्र आत्मै डोरडीम सीमीयोनके परमेश्वरो मन्दिर भीट्टरी नुन्नाङ होस बखटाङ ज धर्मशास्त्रौ विधि पुरा जाट्के मरीयम हटै योसेफ बालक येशूके लानीसीङ मन्दिराङ टाराहा। 28तब सीमीयोने बाबुजा येशूके मीकुहाङ लाम परमेश्वरके इट टेम प्रशंसा जाटा,
सीमीयोनो स्तुतिल्हीङ
29“हे प्रभु, ङाके टेच बचन पुरा जाट्म नाल्नी,
अब नाकुङ नोकरके शान्तिकठा आन्के याहानी।
30हीके टेहाङ कानकोके पापीङ बचडीच ख्रिष्टके ङौ मीमीके डाङ्के ङाडीहीनाङ।
31नाकोइ होस्कोके पट्ट जातियो भर्मीकोइ डाङ्के डीन्हे टेनीसीङ बीरीन्च आले।
32होस्को गैर यहूदीकोके परमेश्वरो बारेयाङ टनाक्च ज्योति आलेको
हटै होस्को ज नाकुङ जाति इस्राएलके महीमा राक्च आल्को।”
33मरीयम र योसेफ मेनो मीजौ बारेयाङ सीमीयोने टेच कुरा सेनीसीङ छक्क परीसा। 34हटै सीमीयोने मरियम र योसेफके आशीर्वाद याहा, हटै मीजौ बोइ मरियमके टेया, “इस मीजा इस्राएलाङ लेच ढलीङ भर्मीकोके नास जाट्के र पापीङ बचडीके लागी हटै ढलीङ भर्मीकोइ बीरोढ जाट्च काट चिन्हौ लागी छान्डीस्च आले। 35होचे जाट्नाङ ढलीङ भर्मीकुङ मीगीनाङ लेच कुराको वार्ले। हटै नो मीगीन र्हेट्च खोँडै घोँच्डीच लख न बीक्ले।”
36होलाङ काट हन्ना टेच अगमवादिनी घनीङ लेया। होसै आशेर कुलो फनुएलो माझा मीजा लेया। होस्को बेहेरी न बुढीस्च लेया हटै होस्को मेनो लेन्जाकठा विवाह छान्च सात ल्हेसाङ ज होस्कुङ लेन्जा सीनीसीङ होस्को विधवा छाना। 37विधवा छान्म ज होस्को चौरासी ल्हेस टाक्काङ। होस्कोइ सेन्ढै ज परमेश्वरो मन्दिर माडासोला, बाकी र माबाट्म उपवास र प्रार्थना जाट्म परमेश्वरो पुजा जाटोला। 38होसै बेलाङ ज, हन्ना योसेफ हटै मरीयमटुङ टाराम्ह परमेश्वरके धन्यवाद याहा हटै यरुशलेमौ उद्धारकर्ताके वाङ्म मुच भर्मीकोके होसै मीजौ बारेयाङ सेटाका।
39योसेफ र मरीयमे परमेश्वरो बचनाङ टेच लख काम जाट्म भ्यानीसीङ होसोको गालीलौ मेकोल्लाकुङ नासरत सहराङ ल्हेसा।#मत्ती २:२३ 40हटै मीजा येशू होर्काङ हटै बलीयो छान्काङ। होस्को बुद्धीमानी छान्काङ हटै परमेश्वरो महान् दया होस्को कठा लेया।
जजा येशू परमेश्वरो मन्दिराङ
41येशूवो बोइ-बाबै बर्सेनी छुट्कारौ पर्व मन्डीके टेम यरुशलेमाङ नुङ्के जाटोला।#व्यव १६:१-८; प्रस १२:१-२७ 42हटै जब येशू बाह्र ल्हेस छान्काङ, होसोको मेकुङ चलन अनुसार पर्व मन्डीके यरुशलेमाङ नुङा। 43हटै पर्व मन्डीम भ्यानीसीङ होसोको इमाङ ल्हेसा बाकी र येशू यरुशलेमाङ ज मुकाङ। बाकी र होस्कुङ बोइ-बाबैके इसै कुरा थाहा मालेया। 44येशू मेनोको हटै लाफाकोकठा ले लख सेनीसीङ होसोको कयाकभरो लाम ह्वा। हटै नमारप्याक मेनोको हटै लाफाकोटुङ येशूके पाके ठाला। 45हटै होसोकोइ येशूके माडीन्हप्याक, होसोको येशूके पाके यरुशलेमाङ ल्हेसा। 46मरीयम र योसेफे पानाङ-पानाङ सोम्याक न्हुनीङ येशूके परमेश्वरो मन्दिराङ मुम यहूदी धर्मगुरुकुङ कुरा सेम मुच हटै गीन्म लेच डीन्हा। 47होस्कुङ बुद्धि हटै होस्कोइ याहाच उत्तरको सेच भर्मीको छक्क परीसा। 48होस्कुङ बोइ-बाबै होस्कोके डाङ्म छक्क परीसा। हटै होस्कुङ बोइ मरीयमे येशूके टेया, “बाबु, नेङे हीके कान कठा इट जाट्च? नोङो बाबै र ङै कुडीक चीन्ता जाट्म नाङ्के पाम काह्वास।”
49येशूये गीन्काङ, “नाक्कोइ ङाके हीके पाच? ङा ङौ बाबैयो इमाङ#2:49 बाबैयो इमाङ बाबैयो इम टेच यरुशलेमाङ लेच परमेश्वरो मन्दिर आले लेके परीस्ले टेम थाहा माले नाक्कोके?” 50बाकी र येशूये टेच कुरा मरीयम हटै योसेफे हीड माबुझडीसा।
51हटै येशू मेनो बोइ-बाबै कठा नासरताङ ल्हेस्काङ हटै मेनो बोइ-बाबैये टेच कुराको मन्डीम आज्ञाकारी छान्म मुकाङ। बाकी र होस्कुङ बोइये चहीन्या इस पट्ट कुराकोके मेनो मीगीनाङ ज डा। 52हटै येशू बुद्धियाङ र शरीराङ हटै परमेश्वरो र भर्मीकुङ अनुग्रहाङ होर्म नुङ्काङ। #१ शमू २:२६; हितो ३:४
Currently Selected:
लूका 2: WMGR
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
