लूका 10
10
येशूये अरु बहत्तर भर्मीकोके बीर्हीन्च
1होस न्हुनीङ, प्रभुये अरु बहत्तर#10:1 बहत्तर कुसै-कुसै संस्करणाङ चाहिँ सत्तरी मात्र टेमले। जनाकोके भाक्म हटै होसोकोके न्हीस-न्हीस जाट्म मेको आन्के पाच पट्ट सहर हटै लाङ्घाङ मेको टेनाङ अघेर बीर्हीन्काङ। 2येशूये इसै उदाहरण टेकाङ, “झुरुम्के परीस्च फसल च ढलीङ ले, बाकी र अन्न झुरूम्च ह्यामीको इट्टार ज ले। गार्हौ मीमुरुङके फसल झुरुम्के ह्यामी बीर्हीन्म याहाके लागी प्रार्थना जाट्नीस।#मत्ती ९:३७-३८ 3आन्नीस! ङै नाक्कोके राङ्सीलौ माझाङ भेडाकुङ पाठाकोके लख बीरीन्म।#मत्ती १०:१६ 4नाक्कोइ लामाङ पैसौ थैलीको, झोलाको, फेर्डीके जुत्ताको नाबुनीस, हटै लामाङ कुसै र भर्मीको कठा होडीकै ङाक्म कम्हन ज भुल्म नामुनीस। 5नाक्को कुसै इमाङ आन्ढनीस होलाङ पट्ट टेनाङ अघेर, ‘इसै इमाङ शान्ति अटछाने’ टेम आशिष याहानीस। 6होलाङ शान्ति जाक्च भर्मी ले टेहाङ नाक्कुङ आशिष होलाङ छान्ले, बाकी र हुन्च माले टेहाङ नाक्कुङ आशिष नाक्को कठा ज ल्हेस्म राहाले। 7जस इमाङ नाक्को मुढनीस होलाङो भर्मीकोइ ज ज्याके याहाच कुराको ज्याम-गाम मुनीस, हीके टेहाङ ह्यामीको मेनो ज्याला डीहीनके लायकावो छान्ने। इम-इम मापहीस्नीस।#१ कोर ९:१४; १ तिमो ५:१८ 8नाक्को जस सहराङ आन्नाङ नाक्कोके मनीटा जाट्ले, होलाङ होसोकोइ नाक्कुङ अघेर डाम याहाच ज्याच कुराको ज्यानीस, 9होलाङ लेच छाचकोके गेपाक्नीस, हटै होसोकोके टेनीस, ‘परमेश्वरे नाक्कुङ जीबनाङ राज्य जाट्च बेला छान्मले।’ 10बाकी र जस सहराङ आन्नाङ नाक्कोके होसोकोइ मनीटा माजाटा टेहाङ, होसै सहरो लामकोलाक ख्योम होसोकोके टेनीस, 11‘कानुङ मीहीलाङ लाहाच नाक्कुङ सहरो धुलो घनीङ कानकोइ नाक्कुङ विरुद्धाङ खर्हाले। टेहाङ र नाक्कोइ इसै वार्नीस, की परमेश्वरे नाक्कुङ जीबनाङ राज्य जाट्च बेला छान्मले।’#मत्ती १०:७-१४; मर्कू ६:८-११; लूक ९:३-५; प्रे १३:५१ 12ङै नाक्कोके टेलाङ, न्यायो याकाङ होसै सहरो भर्मीकोके टेनाङ सदोम सहरो भर्मीकोके परमेश्वरे ढलीङ दया जाट्लेको।”#उत १९:२४-२८; मत्ती ११:२४; मत्ती १०:१५
विश्वास माजाट्च सहरो भर्मीको
(मत्ती ११:२०-२४)
13होस न्हुनीङ येशूये टेकाङ, “ए खोराजीन हटै बेथसेदा सहरो भर्मीको नाक्कोके धिक्कार! हीके टेहाङ नाक्कुङ सहराङ जाट्च अचम्मावो कामको टुरोस हटै सीदोनाङ जाट्च आला टेहाङ होलाङो भर्मीकोइ पापीङ पश्चाताप जाट्के म्हेनाङ ज जुटो बढीन बीहील्म बडाप लेच झाङ मुवोला।#यशै २३:१-१८; इज २६:१—२८:२६; योए ३:४-८; आमो १:९-१०; जक ९:२-४ 14बाकी र न्यायो याकाङ परमेश्वरे टुरोस हटै सीदोनो भर्मीकोके टेनाङ नाक्कोके चेक दण्ड याहालेको। 15हटै नाक्को कफर्नहुमो भर्मीको, नाक्कोइ साँच्चै ज सोँच्डीढनीस की नाक्कोइ स्वर्गाङ कराहाङ्च सम्मानो ठाउँ डीहीन्डनीस? माआले! नाक्को च नरकाङ झाल्डनीस।”#यशै १४:१३-१५
16हटै येशूये चेलाकोके टेकाङ, “जस भर्मीये नाक्कोइ टेच सेले, होचे ङाके सेले। जस भर्मीये नाक्कोके इन्कार जाट्ले, होचे ङाके इन्कार जाट्ले। हटै जसे ङाके इन्कार जाट्ले, होचे ङाके बीर्हीन्च परमेश्वरके घनीङ इन्कार जाट्ले।”#मत्ती १०:४०; मर्कू ९:३७; लूक ९:४८; यूह १३:२०
बहत्तर जना चेलाको ल्हेस्म राहाले
17बहत्तर जना चेलाको मराङ्म ल्हेस्म राम्ह येशूके टेया, “हे प्रभु, नाकुङ म्यार्मीनाङ दुष्ट आत्माको घनीङ कानुङ अधिकाराङ राहा।”
18येशूये होसोकोके टेकाङ, “ङै शैतानके स्वर्गइङ बिजुलीलख झाल्म लेच ङाडाङाङ। 19इलाङ सेनीस, ङै नाक्कोके बुलको हटै बिच्छीकोके फेट्म ह्वाच शक्ति याहामनाङ, हटै नोङो शत्रु शैतानो पट्ट शक्तिढेनाम अधिकार याहामनाङ। हीये र नाक्कोके ही र माजाट्ले।#भजन ९१:१३ 20टेहाङ र दुष्ट आत्मा नाक्कुङ अधिनाङ ले टेम मराङ्के माआले, बाकी र नाक्कुङ म्यार्मीन स्वर्गाङ रीक्च कुरै मराङ्नीस।”
येशूये परमेश्वर पिताके धन्यवाद याहाकाङ
(मत्ती ११:२५-२७; १३:१६-१७)
21होसै बेला ज येशू पवित्र आत्मै पीङ्म मराङ्म टेकाङ, “ए परमेश्वर बाबै, स्वर्ग हटै पृथ्वीयो मीमुरुङ, ङै नाकोके धन्यवाद याहालाङ हीके टेहाङ नाकोइ ज्ञानी हटै वार्चकोटुइङ आर्चीच कुराको जजा ढीन्चकोके टन्हाक्म याहाम नाल्नी। हीके टेहाङ नाकोइ इसै ज ठीक नासेयास।”
22येशूये होलाङो भर्मीकोके टेकाङ, “पट्ट कुरौ अधिकार ङौ बाबैये ङाके याहामलेको। मीजा कुसै आले? टेम बाबैये मत्रै चीन्डीलेको। बाबै कुसै आले टेम मीजै, हटै मीजै जसके चीन्डीटाक्के मीगीन जाट्लेको होसोकोइ मत्रै बाबैके चीन्डीले।”#यूह ३:३५; यूह १०:१५
23येशूये मेकुङ चेलाकोलाक ल्हेस्म कारूङ्जा टेकाङ, “इसै कुराको डाङ्के डीहीन्च नाक्को आशिषित आले! 24हीके टेहाङ ङै नाक्कोके टेलाङ, ढलीङ अगमवक्ताकोइ हटै राजाकोइ नाक्कोइ डाङ्च कुराको बेहेरी ज डाङ्के पामलेया, बाकी र डाङ्के माडीहीना। होसोकोइ नाक्कोइ सेच कुराको बेहेरी ज सेके पामलेया, बाकी र सेके माडीहीना।”
सामरीयो बारेयाङ सेहेच आहान
25काट धर्मगुरुये येशूके फसडीके टेम राहा हटै होचे टेया, “गुरु ङै सेन्ड माडुहुम्च जीबन डीन्के ही जाट्के परीस्लेनी?”
26येशूये होस्के गीन्काङ, “इच्यौ बारेयाङ नेङे मापढीस्म नाले मोशौ व्यवस्थाङ ही टेमले?”
27होस भर्मीये टेया, “परमप्रभु नोङो परमेश्वरके नोङो पट्ट मीगीनीङ होडा, पट्ट प्राणीङ, पट्ट मीबले हटै पट्ट मनीङ रोह जाटो। हटै नेङे नाङलाके लख ज नोङो लाङ्घालीके रोह जाटो।#व्यव ६:५; लेवी १९:१८”
28येशू प्रभुये होस भर्मीके टेकाङ, “नेङे ठीक नाटेया। अब नेङे ड होट न जाटो हटै नेङे सेन्ढै माडुम्च जीबन डीन्ढल।”#मत्ती २२:३५-४०; मर्कू १२:२८-३४; लेवी १८:५
29होस धर्मगुरुये मेन्के सेहेच टनाक्के टेम गीना, “होट आले टेहाङ ङौ लाङ्घाली कुस आले नी?”
30येशूये होस धर्मगुरुके टेकाङ, “काट भर्मी यरुशलेम लाकीङ यरीहोलाक आन्मलेया। होस भर्मीके डाँकूकोइ घोवा हटै होस्के नाङ्गै पार्डीनीसीङ बेहेरी डडुपार बेहोस जाट्नीसीङ झाङ खोरोक्म डा। 31चेक कलापाङ होस बेहोस छान्च भर्मी लेच लामीङ ज काट यहुदी पुजाहारी राहा हटै होस भर्मीके डाङ्नीसीङ होस पुजाहारी माडाङ्च लख छान्म आस्काटच लाकीङ आना। 32होट ज परमेश्वरो मन्दिराङ काम जाट्च काट लेवी भर्मी होसै लाम ज राहा बाकी र होस लेवी र होस भर्मीके डाङ्नीसीङ माडाङ्च लख छान्म आस्काटच लाकीङ नुङा। 33होस न्हुनीङ यहुदीकोइ माजाक्च सामरीयावो काट भर्मी होसै ज लामीङ आन्मलेया हटै आन्नाङ-आन्नाङ होसै बेहोस छान्म लामाङ लेच भर्मीके डाङा र होस भर्मीके रोम सेया। 34हटै होस सामरी होस भर्मीलाक आना र होच्यौ घावाङ जैतुनो सीडी र अंगुरो हान#10:34 जैतुनो सीडी र अंगुरो हान होस बेलाङ, न्हीसवान्के उस्हौ रुपाङ केटोला। बीक्च गेप्के सीडी मोल्के जाटोला टेहाङ घाउके पीङ्के मायाहाके टेम अंगुरो हाने सफा जाटोला। मल्नीसीङ पट्टी छ्याक्म याहा। हटै होस बेहोस छान्च भर्मीके मेनो गधाङ काल्हाक्नीसीङ नुन्हा र काट ठाँटीयाङ डानीसीङ होस्के उसाहा जाट्म मुवा।#२ इति २८:१५ 35पीहीनलख होस सामरी आन्के पानाङ ठाँटीयो मीमुरुङ्के चाँदीयो न्हीस सिक्का#10:35 चाँदीयो न्हीस सिक्का इस्के न्हीस्याको ज्यालाटार मन्डीवला। याहाटासो टेया, ‘इस्के सेहेम ङोस्नी है। इच्यौ लागी अरु ढलीङ पैसा चैडीसा टेहाङ ङा ल्हेस्मरानाङ नाकोके ङै याहालाङ।’”
36इसै आहान टेके भ्यानीसीङ येशूये होसै धर्मगुरुके गीन्काङ, “इसै सोम भर्मी मध्येयाङ डाँकूकोइ डडुप्नीसीङ बेहोस जाट्म डाच भर्मीके कुस्काटे सेहेच लाङ्घालीये लख डुसा होला?”
37होचे टेया, “रोमो सेच भर्मीये!”
येशूये टेकाङ, “आन्न नेङे ड होट न जाटो।”
येशू मार्था हटै मरियमो इमाङ आन्काङ
38येशू हटै होस्कुङ चेलाको आन्मज जाट्नाङ काट लाङ्घाङ टाक्काङ। होलाङ मार्था टेच माझै होसोकोके मेनो इमाङ एटा हटै होसोको होच्यौ इमाङ आना। 39होच्यौ मरियम टेच काट बहिनी लेया। होसै येशूवो मीहीलटुङ खेरेप मुम होस्कुङ बचन सेम मुवोला।#यूह ११:१ 40बाकी र मार्था पाहुनाकोके सेवा जाट्च कामाङ भुल्म मुमलेया। होचे येशूटुङ राम्ह टेया, “हे प्रभु, ङौ बहिनीये ङाके ङाल्ला खाट जाट्च नाकोइ माडाङढनी? होस्के राम्ह ङाके डुस्के बीर्हीन्म याहानी।”
41बाकी र येशूये टेकाङ, “ए मार्था, मार्था, नेङे ढलीङ कुरौ चिन्ता हटै फिक्री जाट्ढल 42बाकी र चहीस्च काट मत्रै कुरा आले। होसै ज सेहेच कुरा मरियमे रोज्डीया जसके होसटुइङ स्याट्के माछान्ले।”
Currently Selected:
लूका 10: WMGR
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
