प्रेरित 28
28
माल्टा टापुवाङ
1होट न बचडीस्मो कीनाराङ राहाप्याक होस टापुवो म्यार्मीन माल्टा आल्लीसा टेमो काह्वारास। 2होलाङो भर्मीको ढलीङ मिलनसार लेलीसा। होस बेला नमस राहामज लेच कारणे हटै बेहेरी ज जुम्मो लेच कारणे होसोकोइ कानुङ लागी म्हे जोमोक्म गुप्के एटा। 3पावले कामुठा सीङ सोट्नीसीङ म्हेयाङ काच बेलाङ काट बुल म्हेये जोस्नाङ होच्यौ मीहुटाङ जीक्म चेलोसा। 4पावलो मीहुटाङ होट बुल चेलोस्म मुच डाङ्नीसीङ होलाङो भर्मीकोइ मेक्को-मेक्को कठा इट टेमो ङाक्के ठाला, “पक्का ज इस भर्मी ज्यान मारा आल्के हेक्ले। समुन्द्रइङ बचढीस्ढ्याङ ड न्याय जाट्च देवीये इस्के जीवाके मायाहालेको।” 5बाकी र पावले मेनो मीहुट खरानाङ बुल स्वाट्टै म्हेयाङ झाला। होचे पावलके ही ड हानी माजाटा। 6होलाङो भर्मीकोइ पावल बेहेरी ज विष लक्डीस्मो सीले टेमो ङोस्मो मुमोलेया। बाकी र ढलीङ न्हुनीङ ड होस्के ही र माछाना। होट छान्नीसीङ होसोकुङ गीन परिवर्तन छाना हटै होसोकोइ, “इस च देवता की आल्लीसा” टेया।
7होसै ठावीङ होस टापुवो मुखिया पब्लियसो जग्गा खेरेप ज लेया। पब्लियसे कानकोके मेनो इमाङ नुन्हा हटै कान होच्यौ इमाङ पाहुना छान्मो सोम्याक सम्मन होलाङ कामुवास। 8होस बेला पब्लियसो बाबै छान राहाम हटै मासी परीस्म छामो लेया। होट छान्नाङ पावल पब्लियसो बाबैयो कोठाङ आना हटै प्रार्थना जाट्नीसीङ मेनो मीहुट होस टाक डा हटै होस गेपा। 9होट गेप्च थाहा छान्नीसीङ होस टापुवाङ लेच पट्ट छाच भर्मीको राहा हटै पावले होसोकोके घनीङ गेपाका। 10होसोकोइ कानकोके आदर जाट्मो ढलीङ पाहुरको याहा हटै कानको ह्वाच बेलाङ लामाङ चहीस्च कुराको जहाजाङ कामोयाहा।
माल्टाइङ रोमाङ आन्च
11सोम महीना न्हुनीङ कान जुम्ल्याहा देवताको टेच पानी जहाजाङ काल्मो माल्टा टापुके डास्मो कानुङास। होस अलेक्जेन्ड्रिया सहरो जहाज चहीन्या जुम्च बेला भरी माल्टा टापुवाङ ज रुङ्मो मुमलेया। 12हटै कान सुराकुसाई टेच सहराङ टाक्नीसीङ होलाङ सोम्याक सम्मन कामुवास। 13होटै ह्वामो कान रेगियन टेच सहराङ काटाकास। हटै पीहीन लख दक्षिणलाकीङ नम्सु केसा हटै आप्र्हीन लख कान पटिओली टेच सहराङ काटाकास। 14होलाङ काने येशूवाङ विश्वास जाट्च कोही भर्मीकोके काडुपास। हटै होसोकोइ कानकोके काहप्ता सम्मन मुमो याहानी टेमो बिन्ती जाटा। हटै कान होसोकोर कठा काहप्ता सम्मन मुनीसीङ रोम सहरलाक कानुङास। 15रोमाङ लेच येशूवाङ विश्वास जाट्च भर्मीकोइ कान राहामोज लेनीङ टेच कुरा सेनीसीङ कोही-कोहीको अप्पियस बजार हटै सोम-पाटी टेच लाङ्घा सम्मन कानकोके डुप्के राहा। होसोकोके डाङ्च डीक्को पावले हौसला डीहीन्मो परमेश्वरके धन्यवाद याहा।
पावल रोम सहराङ
16कानको रोम सहराङ टाक्नीसीङ पावलके काट सिपाहीयो सुरक्षाङ कप्ताने डेरा लाम मुके याहा।
17सोम्याक न्हुनीङ पावले रोमाङ लेच यहूदीकुङ अगुवाकोके एटा। हटै होसोको जम्मा छान्नाङ पावले टेया, “डाजी-भयाको, ङै कानुङ जाती हटै कानुङ पुर्खाकोइ डास्मो राहाच रीतीरिवाजो विरुद्धाङ ही ड मटजाटाङ। टेहाङ र यहूदी डाजी-भयाकोइ ङाके यरुशलेमाङ घोनीसीङ रोमीकुङ जिम्माङ याहा। 18रोमीकोइ ङाके केरकार जाट्नीसीङ डास्मो याहाके पा, हीके टेहाङ होसोकोइ ङाके ज्यान सजाय याहाके लाइकाङो ही ड दोष माढीना। 19बाकी र यहूदी डाजी-भयाकोइ ङाके डास्म याहाके जाक्ड-माजाक्चये ङै रोमी महाराजाटुङ बिन्ती जाट्के कर लग्डीसा। टेहाङ र ङौ यहूदी डाजी-भयाकुङ बिरुद्धाङ दोष लैडीके परीस्स ही ड कुरा माले।#प्रे २५:११ 20इसै कुरा नाक्कोइ वार्के हटै नाक्को कठा डुप्के टेमो ङै नाक्कोके इलाङ ङाएटाङ। कान इस्राएलीकोइ आशा जाट्च भर्मीके#28:20 कान इस्राएलीकोइ आशा जाट्च भर्मीके: पावले ख्रीष्ट राहाम भ्याकाङ टेम विश्वास जाटाला। बाकी ड यहूदीकोइ ख्रीष्ट राहाम भ्याकाङ टेमो विश्वास माजाटोला। होट छान्नीसीङ होसोको पावलो विरुद्धाङ लेया। विश्वास जाट्च कारणे ज ङाके इट साङ्लै छ्याक्मोले।”
21हटै होसोकोइ टेया, “नाकुङ बारेयाङ यहूदिया देशीङ कानकोइ ही ड चिठी र माडीहीन्मोनीङ। न कुसै र यहूदी डाजी-भयाको राहानीसीङ नाकुङ बिरुद्धाङ ही ड मासेहेच कुरा ङाक्मो सेटाका। 22बाकी र कानकोइ नाकोटुइङ नाकुङ विचार सेके जाक्लीङ हीके टेहाङ पट्टलाक नाकुङ समुहौ बिरुद्धाङ टेच कुराको चहीन्या कानकोके थाहा ले।”
23हटै होसोकोइ पावले टेच कुरा सेके टेमो समय टोक्डीया। हटै होस टोक्डीच समयाङ पहीला टेनाङ र ढलीङ यहूदीको जम्मा छान्मो पावल मुच ठावाङ राहा। हटै होस दिनाङ पावले गोराक होडा नभी सम्मन परमेश्वरो राज्यौ बारेयाङ शिक्षा याहा। होचे परमेश्वरो बचनाङ मोशै हटै अगमवक्ताकोइ रीक्च कुराको लाम होसोकोके येशूवो बारेयाङ बुझडीम विश्वासाङ राक्के प्रयास जाटा। 24कोहीकोइ चहीन्या होचे टेच कुरा सेनीसीङ विश्वास जाटा बाकी र कोहीकोइ चहीन्या विश्वास माजाटा। 25होट छान्नाङ होसोकुङ कुरा माखाटा। होसोको होटै ह्वाके टेनाङ पहिला पावले होसोकोके इट टेया, “पवित्र आत्मै नाक्कुङ पुर्खाकोके टेच कुराको सत्य आला। हीके टेहाङ परमेश्वरे यशैया अगमवक्ता मार्फत इट टेमो लेकाङ,
26‘इसै भर्मीकोटुङ आन्नीसीङ टेनीस,
“नाक्कोइ सेके च सेडनीस बाकी र मावार्डनीस,
ङोस्के च ङोस्डनीस बाकी र माडाङ्डनीस।”
27हीके टेहाङ इस भर्मीकुङ गीन कठोर छान्मोले,
इसोकोइ मेनेकेपे सेके मापाले
हटै मीमीके ङोस्के मापाले।
मन्याङ च होसोकोइ मीमीके डाङोला, मेनेकेपे सेयाला, गीनीङ बुझडीसाला,
हटै होसोकोइ मेक्कुङ गीन ङालाक ल्हेटाला
हटै ङै होसोकोके ङागेपाकोलाङ।’#यशै ६:९,१०”
28अन्तिमाङ पावले टेया, “होट छान्नाङ अब ङै नाक्कोके टेलाङ, पापीङ बचडीच परमेश्वरो सेहेच समाचार होस्कोइ मायहूदीकोटुङ बीरीन्मलेको हटै होसोकोइ सेले।” 29[पावले इसै कुरा टेके भ्यानीसीङ होसोको मेक्को-मेक्कोवाङ तर्क-वितर्क जाट्मो ह्वा।]
30पावल न्हीस बर्ष सम्मन रोमाङ बाहालो इमाङ ज मुवा। होचे मेन्के डुप्के राहाच पट्टकोके स्वागत जाटाला। 31होचे माबीरीमो परमेश्वरो राज्यौ बारेयाङ प्रचार जाट्मो प्रभु येशू पापीङ बचडीच ख्रीष्टौ बारेयाङ पाहाकोला र कुचे र होस्के मारोक्डीयाला।
© 2024 (Active), Mother Tongue Translators Society and Wycliffe Bible Translators, Inc. All rights reserved.