प्रेरित 26
26
1होस न्हुनीङ अग्रिपासे पावलके टेया, “अब नाङ्के नोङो पक्षयाङ ङाक्के अनुमति ले।” हटै पावले ड मेन बचडीस्के लागी मीहुट फैलडीमो इट टेया,
2“ए राजा अग्रिपास, यहूदीकोइ ङाके लैडीच पट्ट आरोपकुङ बारेयाङ छीनीङ नाकुङ अघेर टेके डुप्नाङ ङै ङाल्लाके भाग्यमानी आर्मीट्मोन। 3यहूदीकुङ चाल-चलन र तर्क-वितर्क जाट्च्यौ बारेयाङ नाकोके सेहेमो थाहा ले होट छान्नाङ ङै ङाल्लाके ढलीङ भाग्यमानी आर्मीट्मोन। अब नाकोके ङै बिन्ती जाट्लाङ, नाकोइ ङौ कुरा धैर्य कठा सेनी।
4ङा ङौ देशाङ र यरुशलेम सहराङ यहूदीको कठा ज ङाहोराङ होट छान्नाङ जजानीङ होडा ज पट्ट यहूदीकोइ ङाके सेहेमो चीन्डीले। 5होसोकोइ पहीलीङ होडा ज ङा पहीला फरिसी टेच कट्टर धार्मिक समूहाङो भर्मी ङालेयाङ हटै होसै कट्टर धर्माङ ज जीबन ङाबीटडीयाङ टेम वार्मलेया। यदि होसोकोइ टेके जाका टेहाङ इसै कुरा मेक्कोलै ज ड टेके हेक्ले।#प्रे २३:६; फिलि ३:५ 6परमेश्वरे कानुङ पुर्खाकोके जाट्च बाचाङ ज ङै भरोसा डाच कारणे छीनीङ ङा नाक्कुङ अघेर इट टोरोस्के परीस्मोले। 7होसै परमेश्वरे जाट्च बाचा डुप्के आशाङ ज कानुङ बाह्र कुलकोइ ड नम्सीन-नभी काट गीनाङो छान्मो परमेश्वरके आराधना जाटाला। ए राजा अग्रिपास, ङै ड होसोकोइ लख ज आशा जाट्च कारणे यहूदीकोइ ङाके दोष लैडीया। 8परमेश्वरे सीचकोके फेरी जीवाट्लेको टेच कुरा नाक्कोइ हीके विश्वास जाट्के माहेक्ढनीस?
9पहीला ङै ड ह्योक्टार सम्मन नासरताङो येशूवो विरोध जाट्के परीस्ले टेमो ङार्मीटालाङ।#प्रे ८:३; २२:४,५ 10यरुशलेमाङ ड होट ज विरोध ङाजाटाङ। ङै मुख्य पूजाहारीकोटुइङ अधिकार डीन्नीसीङ येशूवाङ विश्वास जाट्च ढलीङ भर्मीकोके झ्यालखनाङ ङाठुनाङ हटै होसोकोके साट्च कामके घनीङ ङामन्डीयाङ। 11ढलीङ फेरा होसोकोके ङै, ‘अबइङ होडा नासरताङो येशूके विश्वास माजाट्लाङ’ टेके पार्डीके लागी यहूदीकुङ गुमुस्ठ इमकोवाङ जबरजस्ती जाट्मो सजाय ङायाहाटाकाङ। ङा होसोको कठा डाम्छोस्मो इडीक साहारै म्हे ङाछानाङ की ढलीङ देशो सहरकोवाङ ड आन्मो होसोकोके सटडीके ङाठालाङ।”
पावल परिवर्तन छान्च बारेयाङ बयान
(प्रेरित ९:१-१९; २२:६-१६)
12फेरी ज पावले टेया, “होट ज ङा कयाक मुख्य पूजाहारीकुङ अधिकार र आज्ञा डुप्मो दमस्कस सहरलाक आन्मो ङालेयाङ। 13हटै ङोस्नी राजा, होस दिन नम्सीन बाह्र बजेलाक कान लाम-लाम आन्नाङ-आन्नाङ नमीङ नम्खान टेनाङ ड झन चहक ज्योति ङा हटै ङौ लफाकोटाक चम्कडीसा। 14हटै कान पट्टको झाङ काखोरोवास। हटै होसै बेलाङ ज ङै हिब्रु ढुटाङ इट टेच ङासेयाङ, ‘शाऊल, ए शाऊल, नेङे ङाके हीके सटडीडल? नोङो मालिको डाङ्गाके लाट्ठै ङाप्नाङ लख नाङ्लै नाङ्लाके चोट याहाडल।’ 15हटै ङै ङागीनाङ, ‘प्रभु, नाको कुस नाल्नी?’ हटै प्रभुये टेकाङ, ‘ङा येशू आले जस्के नेङे सटडीमो नाले। 16अब सोन, ङै नाङ्के ङौ सेवक हटै ङौ गवाही याहाच भर्मी जाट्के जाक्लाङ। होट छान्नाङ ङा नाङटुङ देखा परीस्स आला। नेङे ङौ बारेयाङ डाङ्च कुराको र ङै नाङ्के न्हुनीङ टनाक्च कुराको घनीङ नेङे अरु भर्मीकोके सेटाक्के परीस्ले। 17ङै नाङ्के यहूदीकोवाङ र मायहूदीकोवाङ बीरीन्लाङ। नाङ्के ङै होसोकोटुइङ जोगडीलाङ। 18नेङे होसोकुङ मीमीक खोल्डीमो अन्धकारो कुराकोइङ ज्योति लाक राक्के परीस्ले। हटै नेङे होसोकोके शैतानो शक्तिलाकीङ ल्हेट्मो परमेश्वरो लाक ल्हेट्के परीस्ले। हटै होसोकोइ ङाके विश्वास जाट्ले र होसोकुङ पाप क्षमा छान्ने र होसोको परमेश्वरे छान्डीच सेवकको कठा मुके डीन्ने।’
19ङोस्नी राजा अग्रिपास, ङै स्वर्गीय दर्शनाङ डाङ्च इसै कुराको माडीहीम माजाट्मो मुके मटहेकाङ। 20पहीला दमस्कस र यरुशलेमाङ हटै होस न्हुनीङ पुरै यहुदिया देशाङ र मायहूदी देशकोवाङ ड आन्मो ङै भर्मीकोके पाप जाट्के डास्मो परमेश्वरलाक ल्हेस्नीस टेमो प्रचार ङाजाटाङ। हटै परमेश्वरलाक ल्हेस्स आला टेच प्रमाण होसोकोइ जाट्च कामकोइङ टनाक्के परीस्ले। 21होट छान्नाङ यहूदीकोइ ङाके परमेश्वरो मन्दिराङ घोनीसीङ साट्के पा। 22बाकी ड अझै सम्मन ङै परमेश्वरटुइङ ज सहायता डुप्मो लेन होसकारणे ङै इलाङ लेच कराहाङ्च-माहार्च पट्टकोके गवाही याहामो नाक्कुङ अघेर टोरोस्मो लेन। अगमवक्ता र मोशै घनीङ न्हुनीङ छान्ने टेच कुराको बाहेक ङै अरु बढी कुराको ही ड माटेमो लेन। 23पापीङ बचडीच ख्रीष्टै दु:ख भोग्डीमो सीके परीस्ले, होस्को सीठइङ जीवाचकोवाङ पट्ट टेनाङ पहीलो छान्नेको र होस्कोइ मेकुङ ज्योति यहूदीकोवाङ र मायहूदीकोवाङ फैलडीलेको, इसै कुराको च अगमवक्ताको हटै मोशै टेके भ्यामोले।#१ कोर १५:२०; यशै ४२:६; ४९:६”
24पावले टेच इसै कुराको सेनीसीङ फेस्तसे च्याक्मो टेया, “पावल, नाङ बोङ्लास्मो नालेउले! नोङो ढलीङ ज्ञाने नाङ्के बौलाहा जाटा!”
25बाकी ड पावले टेया, “माननीय फेस्तस, ङा बोङ्लास्स माला, ङा सही लेन र सत्य कुरा जाट्मो लेन। 26राजा अग्रिपासके इसै पट्ट कुराको थाहा ले। होस्कोके ङै इसै कुराको साहस कठा टेके हेक्लाङ। होस्कोइ अवश्य इसै कुराकोवाङ सेहेमो ध्यान याहामो लेको। हीके टेहाङ इसै कुराको पट्टकोइ डाङ्च गरी छान्च आला।” 27पावले राजाके टेया, “ए राजा अग्रिपास, नाकोइ अगमवक्ताकोइ रीक्च कुराकोवाङ विश्वास जाट्डनी? नाकोइ विश्वास जाट्डनी टेच कुरा ङै वार्लाङ।”
28होसै बेला ज राजा अग्रिपासे पावलके टेया, “इट्टार थोरै समयाङ नेङे ङाके ख्रीष्टियान जाट्के कोसिस जाट्मो नाले?”
29पावले टेया, “थोरै समयै अटले या ढलीङ समयै अटले, इसै ङौ मीहुटाङ लैडीच साङ्ला बाहेक छीनीङ नाको मात्रै माला बाकी ड ङाके सेच नाक्को पट्टकोइ ङा लख ज येशूवाङ विश्वास जाट्नी टेमो ङै परमेश्वर कठा प्रार्थना जाट्लाङ।”
30होसै बेला ज राजा अग्रिपास, मुख्य शासक फेस्तस, बरनिकी र होसोको कठा राहाच पट्ट भर्मीको जराक जुरुक सोवा। 31हटै बहीरीङ आन्नीसीङ इट टेमो कुरा जाटा, “इसै भर्मीये झ्यालखनाङ काके या ज्यानमारा सजाय याहाके लाइकाङो काम च ही ड माजाट्मो लेउले ट।” 32राजा अग्रिपासे फेस्तसके टेया, “इसै भर्मीये रोमी महाराजाके बिन्ती माजाट्मो लेहाङ च डास्म याहाके छानोला नी!”
© 2024 (Active), Mother Tongue Translators Society and Wycliffe Bible Translators, Inc. All rights reserved.