प्रेरित 22
22
1पावले टेया, “ङौ यहूदी डाजी-भयाको हटै बाबैको, ङौ कुराको सेहेमो ध्यान याहामो सेनीस। अब ङै नाक्कुङ अघेर ङौ पक्षयाङ टेके परीस्स कुराको इसै आले।” 2हटै जब पावले हिब्रु ढुटाङ ङाक्च सेया तब होस भर्मीको शान्त छान्मो मुवा।
हटै पावले इट टेमो ज आना, 3“ङा किलिकियाङो टार्सस सहराङ फुन्च यहूदी आला, बाकी ड इसै यरुशलेम सहराङ ज होर्च आला। ङा गुरु गमलिएलो चेला ङालेयाङ। होस्कोइ ङाके कानुङ पुर्खाकोइ मन्डीमो राहाच कानुन र धर्मौ बारेयाङ कडा शिक्षा याहाकाङ। छीनीङ नाक्को परमेश्वराङ जति कट्टर नाल्नीस ङा ड #प्रे ५:३४-३९होडीस ज कट्टर ङालेयाङ। 4ङै येशूये टनाक्च लाम डुट्चकोके सीच गरी ङासटडीयाङ। हटै माझा र लेन्जा न्हीस्वानके छ्याक्नीसीङ झ्यालखनाङ ड ङाकाङ।#प्रे ८:३; २६:९-११ 5ङै टेच इसै कुराको साँचो ज आला टेमो पट्ट पूजाहारीकुङ अगुवा र महासभाङो सदस्यकोइ ड टेके हेक्लेको। हीके टेहाङ होसोकोइ ज ङाके दमस्कसाङो यहूदी डाजी-भयाकुङ लागि रीक्च चिठीको याहा। होस चिठीको द्धारा ज ङै प्रभु येशूवाङ विश्वास जाट्च भर्मीकोके घोके अधिकार ङाढीनाङ। होस कारणे ङै होसोकोके यरुशलेमाङ साङ्लै छ्याक्म राक्नीसीङ सजाय याहाके उद्देश्य लामो ङा दमस्कसाङ ङानुङाङ।
मेन परिवर्तन छान्च बारेयाङ पावलो बयान
(प्रेरित ९:१-१९; २६:१२-१८)
6दमस्कस टुङ टाक्नाङ आधा दिन छान्मो लेया। होसै बेला ज अचानक ङाटाक नमीङ काट ज्योति ढलीङ चहक ढामो ङा वरी-परी चम्कडीसा। 7हटै ङा झाङ ङाखोरोवाङ। होसै बेला ज ङै, ‘शाऊल, ए शाऊल नेङे ङाके हीके सटडीडल?’ टेच आवाज ङासेयाङ। 8हटै ङै, ‘प्रभु, नाको कुस आले?’ ङाटेयाङ। हटै प्रभुये टेकाङ, ‘ङा नेङे सटडीच नासरताङो येशू आले।’ 9ङा कठा लेचकोइ ज्योति चम्कडीस्स च डाङा बाकी ड ङाक्च आवाज माबुझडीसा। 10हटै ङै ङाटेयाङ, ‘हे प्रभु, अब ङै ही जाटीङ?’ हटै प्रभुये ङाके टेकाङ, ‘सोन र दमस्कस सहराङ आन्न हटै नेङे जाट्के परीस्स कामको कुसै ड भर्मीये होलाङ टेमो याहाले।’ 11होस ज्योति चमकडीस्स कारणे ङा अन्धा छान्मो ङालेयाङ होट छान्नाङ ङाके लफाकोइ मीहुटाङ जीम्म दमस्कसाङ टाहा।
12होस सहराङ हननिया टेच काट भर्मी मुवोला। होस मोशै याहाच नियम डीहीम जाट्च हटै परमेश्वरके डुट्के जाक्च भर्मी लेया। दमस्कसाङ मुच यहूदी पट्टकोइ होस्के मान जाटाला। 13होसै भर्मी ज ङाटुङ राहामो टोरोसा हटै, ‘शाऊल भया, नेङे फेरी डाङ्के हेक्न’ टेया। हटै होट टेच डीक्को ङै होस्के डाङ्के हेक्च ङाछानाङ। 14हटै होचे ङाके टेया, ‘कानुङ पुर्खाकुङ परमेश्वरे नाङ्के नेङे होस्कुङ इच्छा वार्के, धर्मी येशूके डाङ्के हटै होस्कोइ ङाक्च कुराको सेके डुप्के लागि छान्डीकाङ। 15हीके टेहाङ नाङ होस्कुङ साक्षी छान्मो नेङे डाङ्च कुराको र सेच कुराको पट्ट भर्मीकुङ अघेर सेटाक्के परीस्ले। 16होट छान्नाङ अब नेङे हीके रुङ्म मुम नाले? सोन हटै बप्तिस्मा लौ हटै येशूवो म्यार्मीनाङ क्षमा ङीहीम नोङो पापीङ शुद्ध छान्न।’
17हटै ङा यरुशलेमाङ ङाल्हेसाङ र मन्दिराङ प्रार्थना जाट्नाङ दर्शन ङाडाङाङ। 18हटै ङै प्रभुके ङाडाङाङ र होस्कोइ ङाके टेकाङ, ‘चाँइ यरुशलेमीङ ह्वान हीके टेहाङ नेङे ङौ बारेयाङ टेच कुराको इलाङो भर्मीकोइ मासेले।’ 19हटै ङै ङाटेयाङ, ‘हे प्रभु, ङौ बारेयाङ होसोकोके पट्ट थाहा ले। ङै पट्ट यहूदीकुङ गुमुस्ठ इमाङ आन्नीसीङ नाकोके विश्वास जाट्चकोके घोम जेलाङ ङाठुनाङ हटै ङाडरपाङ। 20नाकुङ साक्षी याहाच स्तिफनसके साट्नाङ ङा होलाङ ज ङालेयाङ। होस्के साट्चको ड कठा सहमत छान्मो होसकुङ कोटको जीम्मो मुमो ङालेयाङ।’#प्रे ७:५८ 21बाकी ड प्रभुये टेकाङ, ‘नाङ आन्न, नाङ्के ङै लो-लोस मायहूदीकोटुङ बीरीन्नाङ।’”
22मायहूदीकुङ बारेयाङ टेटार सम्मन भर्मीकोइ पावलो कुरा ठनास्मो मुमोलेया। बाकी ड होस न्हुनीङ चहीन्या च्याक्मो होसोकोइ इट टेके ठाला, “इसके साट्के ज परीस्ले! साट्के ज परीस्ले! अब इस्के जीवामो डास्के माछान्ने!” 23होसोको डाम्छोस्मो मेक्कुङ कोटको पीट्नीसीङ लोहा हटै धुलो नमलाक लोम्ह च्याक्के ठाला। 24हटै सेनापतिये सिपाहीकोके टेया, “इस्के सैन्य भवनाङ आल्नीस हटै कोर्रा लैडीनीस। होट जाट्ढ्याङ यहूदीकोइ हीके मेनो विरोध जाट्मोले टेच कुरा टेले की।” 25सिपाहीकोइ पावलके कोर्रा लैडीके टेमो छ्याक्नाङ होचे होलाङ टोरोस्स कप्तानके टेया, “रोमी नागरीक दोषी माठहरडीस्मो ज कोर्रा लैडीके डीन्ले? रोमी कानुने इट जाट्के याहाले?”
26हटै इसै कुरा सेनीसीङ कप्ताने सेनापतिटुङ आन्नीसीङ इट टेया, “हजुर, नाकोइ ही जाट्के पामोनाल्नी? नाकोके थाहा ले? होस भर्मी च रोमी नागरीक आल्लीसा!”
27इसै कुरा सेनीसीङ सेनापति भित्री आना र पावलके इट टेया, “ङाके टेउ, नाङ साँच्चै ज रोमी नागरीक आला?” पावले टेया, “हजुर, आला।”
28सेनापतिये टेया, “ङा च धेरै पैसा याहामो रोमी नागरीक छान्च आला!” बाकी ड पावले टेया, “ङा चहीन्या जन्म जात ज रोमी नागरीक आला।”
29इसै कुरा सेच डीक्को पावलके केरकार जाट्के राहाच सिपाहीको हट्डीसा। हटै सेनापति ड बीरीया हीके टेहाङ होचे मेल्लै ज पावल रोमी नागरीक लेउ-लेउ ड होट साङ्लै छ्याक्के बीरीन्मो लेया।
यहूदी महासभौ अघेर पावल
30यहूदीकोइ पावलके हीके दोष लैडीमोले टेच कुरा सेनापतिये बुझडीस्के जाक्मलेया। होट छान्नाङ पीहीन लख होचे मुख्य पूजाहारीको र महासभाङो पट्ट सदस्यकोके एट्मो सभा जाट्के आदेश याहा र पावलके जेलीङ डास्म याहानीसीङ पट्टकुङ अघेर टोरोसाका।
© 2024 (Active), Mother Tongue Translators Society and Wycliffe Bible Translators, Inc. All rights reserved.