प्रेरित 18
18
पावल कोरिन्थ सहराङ
1हटै पावल एथेन्स सहरीङ बिदा छान्नीसीङ कोरिन्थ सहराङ आना। 2होलाङ होचे पोन्टस टेच क्षेत्रइङ अकिलास टेच काट यहूदीके डुपा। अकिलास चहीन्या चम-चम मेनो माझा प्रिस्किला कठा इटालिइङ राहामो लेया हीके टेहाङ रोमी महाराजा क्लौडियसे पट्ट यहूदीकोके रोमीङ ख्यौके आदेश याहामो लेया। हटै पावल होसोकोके डुप्के आना। 3होसोकोइ पाल खास्स काम जाटा। हटै पावल होसोको कठा ज मुवा हीके टेहाङ होचे ड होसोकोइ लख ज पाल खास्स काम जाटा। 4प्रत्येक म्हुङ बाट्च याकाङ पावल यहूदीकुङ गुमुस्ठ इमाङ आन्मो यहूदी र ग्रीक भर्मीको कठा तर्क-वितर्क जाट्मो होसोकोइ ड येशूके विश्वास अटजाटे टेमो बुझडीके पवला।
5सिलास र तिमोथी माकेडोनियाइङ राहानीसीङ, पावले मेनो पट्ट समय सेहेच समाचार प्रचार जाट्म बीटडीया। होचे यहूदीकोके येशू ज पापीङ बचडीच ख्रीष्ट आलेको टेमो सेहेम सेटाका। 6बाकी ड यहूदीकोइ चहीन्या पावलो विरोध जाट्मो नार्के ठाला। हटै पावले होसोकोके चेतावनी याहाके लागी मेनो बढीनाङो धुलो खरामो, “नाक्को नाश नाछानास टेहाङ ड नाक्को नाक्कुङ कारणे ज नाश छान्डनीस, होच्यौ दोष ङाके मालग्डीस्ले। अबइङ होडा ङा मायहूदीकोटुङ आन्नाङ” टेया। 7हटै पावल यहूदीकुङ गुमुस्ठ इमीङ ह्वा। हटै पावल परमेश्वरके डुट्के जाक्च भर्मी तीतस युस्तस टेच काट ग्रीक भर्मीयो इमाङ आना। होच्यौ इम यहूदीकुङ गुमुस्ठ इमो खेरेप ज लेया। 8होलाङ यहूदीकुङ गुमुस्ठ इमाङो अगुवा क्रिस्पस र होच्यौ पट्ट जहानकोइ प्रभुवाङ विश्वास जाटा। हटै पावलो शिक्षाको सेनीसीङ कोरिन्थाङो अरु ढलीङ भर्मीकोइ प्रभुवाङ विश्वास जाटा हटै बप्तिस्मा ला।
9कयाक नभी प्रभुये पावलके दर्शनाङ इट टेकाङ, “कुसै ड डाङ्मो नाबीरीन, सेहेच समाचार प्रचार जाट्मो आन्न बाकी ड चुप छान्मो नामुन। 10हीके टेहाङ ङा नाङ कठा लेन, नाङ्के कुचे ड ही ड हानी जाट्के माहेक्ले। इसै सहराङ ङौ ढलीङ भर्मीको ले।” 11होट छान्नाङ पावले डेढ वर्ष सम्मन कोरिन्थ सहराङ परमेश्वरो बचन पाहाक्मो मुवा।
12अखैया इलाकाङ गलियोन टेच भर्मी मुख्य शासक लेच बखटाङ यहूदीको खाट्नीसीङ पावलो विरोध जाट्मो घोवा। हटै होस्के मुख्य शासकटुङ नुन्हा। 13हटै होस यहूदीकोइ इट टेया, “इसै भर्मीये यहूदी कानुने टेच टेनाङ ड ठीक उल्टो तरिकै परमेश्वरो आराधना जाट्के पाहाक्मोले।”
14हटै पावल ङाक्के ज पानाङ, गलियोने होस यहूदीकोके टेया, “ए यहूदीको, इसै भर्मीये जाट्च काम साँच्चै मासेहेच र अपराधो कुराको आला टेहाङ च ङै नाक्कुङ कुरा सेके ठीक छानाला। 15बाकी ड इसै कुरा च शब्दकुङ, म्यार्मीनको र नाक्कुङ यहूदी व्यवस्थौ बारेयाङ आलेउले होट छान्नाङ नाक्कोइ नाक्कोहोलै खास्नीस। ङै इन्च कुराकुङ न्याय माजाट्लाङ।” 16होट टेमो गलियोने मेनो सिपाहीकोके होसोकोके अदालतीङ छीक्म याहाके बीरीना। 17हटै मायहूदी भर्मीकोइ गुमुस्ठ इमाङो अगुवा सोस्थेनेसके घीसार्डीम राका र अदालतो अघेर ज डरपा। बाकी ड गलियोने ही ड वास्ता माजाटा।
पावल एन्टिओखिया सहराङ ल्हेसा
18पावल ढलीङ दिन येशूवाङ विश्वास जाट्च भर्मीको कठा कोरिन्थ सहराङ मुवा। हटै होस न्हुनीङ पावल होसोको कठा विदा छान्मो प्रिस्किला र अकिलास कठा समुन्द्रौ लाम छान्मो सिरिया इलाकाङ आन्के ह्वा। बाकी ड पावले परमेश्वर कठा पहिला जाट्च भाकल इन्नाङ पुरा छाना। होसकारणे होचे पानी जहाजाङ काल्के टेनाङ पहीला किंक्रिया टेच सहराङ मेनो मीछाम खुरुका।#गन्ती ६:१८ 19हटै जब होसोको एफिसस सहराङ टाक्राहा तब पावले प्रिस्किला र अकिलासके होलाङ ज डासा। हटै होसोको चहीन्या एफिससाङ ज मुवा बाकी ड पावल चहीन्या होलाङो गुमुस्ठ इमाङ आन्नीसीङ यहूदीको कठा छलफल जाट्के ठाला। 20हटै यहूदीकोइ पावलके अझ कलाप दिन मुनी टेमो बिन्ती जाटा बाकी ड पावले मुके माढीया। 21पावले इट टेमो होसोको ड कठा विदा छाना, “यदि परमेश्वरो इच्छा छाना टेहाङ फेरी ज ङा नाक्कोटुङ राहालाङ।” हटै होस एफिससीङ पानी जहाजाङ काल्मो आना।
22हटै पावल जब कैसरिया सहराङ टाका तब यरुशलेमाङ आन्नीसीङ होलाङो मण्डलीयाङो भर्मीकोके डुपा हटै अभिवादन जाटा र एन्टिओखिया सहराङ आना। 23पावल होलाङ कलाप दिन मुवा हटै होस गलातिया र फ्रिगियाङो क्षेत्र छान्मो पट्ट चेलाकोके विश्वासाङ बलियो जाट्मो ह्वा।
अपोल्लोस एफिसस सहराङ
24होसै बखटाङ ज अलेक्जेन्ड्रिया सहराङो अपोल्लोस टेच काट यहूदी एफिससाङ राहा। होस सेहेमो ङाक्के वार्च हटै परमेश्वरो बचनो बारेयाङ ढलीङ ज्ञान लेच लेया। 25होचे येशूये टनाक्च लामो शिक्षा डीन्च कारणे आत्माङ जोशिलो छान्मो येशूवो बारेयाङ सत्य कुरा पाहाक्ढ्याङ ड होस्के यूहन्नै याहाच बप्तिस्मौ बारेयाङ मात्रै थाहा लेया। 26होचे यहूदीकुङ गुमुस्ठ इमाङ निर्धक्क कठा शिक्षा याहाके ठाला। हटै प्रिस्किला र अकिलासे होचे पाहाक्च कुराको सेनीसीङ होस्के मेनो इमाङ नुन्हा। हटै होस्के परमेश्वरे याहाच मुक्तियो बारेयाङ सत्य कुरा सेहेमो पाहाका। 27हटै अपोल्लोसे अखैया इलाकाङ नुङ्के विचार जाटा। हटै एफिससाङ लेच येशूवाङ विश्वास जाट्चकोइ होस्के आन्के उत्साह याहा र अपोल्लोसो स्वागत जाट्नीस टेमो अखैयाङ लेच चेलाकोके काट चिठी रीक्मो याहा। हटै जब अपोल्लोस अखैयाङ टाका तब होलाङ परमेश्वरो महान् दयै जाट्नाङ येशूवाङ विश्वास जाट्चकोके होचे ढलीङ डुसा। 28हीके टेहाङ होलाङ राहाच यहूदीको कठा भर्मीकुङ अघेर तर्क-वितर्क जाट्नाङ होचे परमेश्वरो बचनीङ येशू ज पापीङ बचडीच ख्रीष्ट लेको टेमो प्रमाण याहा।
© 2024 (Active), Mother Tongue Translators Society and Wycliffe Bible Translators, Inc. All rights reserved.