प्रेरित 1
1
पवित्र आत्मौ प्रतिज्ञा
1-2आदरणीय थियोफिलस ज्यू, ङै ङौ पहीलाङो कीटाबाङ#1:1-2 पहीलाङो कीटाबाङ: पहीलाङो कीटाब टेच लुकै रीक्च सेहेच समाचारो कीटाब आले। येशूये होस्कुङ काम सुरु जाट्च बेलाइङ होडा परमेश्वरे होस्कोके स्वर्गाङ मान्हुन्टार सम्मन ही-ही जाट्काङ हटै पाहाक्काङ होस पट्ट कुराको ङै रीक्मोन।#लूक १:१-४ परमेश्वरे होस्कोके स्वर्गाङ नुन्के टेनाङ अघेर येशूये मेकोल्लै छान्डीच प्रेरितकोके पवित्र आत्माद्वारा आज्ञा याहाकाङ। 3येशू कष्ट भोग्डीमो क्रुसाङ सीकाङ, हटै प्रेरितकोटुङ ढलीङ फेरा ढलीङ खालाङो डीहीके लाइकाङो प्रमाण द्वारा मेको फेरी जीवामो लेच कुरा मेकोल्है टनाक्काङ। हटै प्रेरितकोर कठा चालीस दिन सम्मन मुकाङ र परमेश्वरो राज्यौ विषयाङ होसोकोके सेटाक्काङ। 4काफेरा येशू होसोकोर कठा ज्यामो लेनाङ होस्कोइ होसोकोके इट टेमो आज्ञा याहाकाङ, “नाक्को यरुशलेमीङ कुलाक र नान्नीस, बाकी र ङौ परमेश्वर बाबैये नाक्कोके पवित्र आत्मा याहालाङ टेमो जाट्च बाचाके रुङ्मो मुनीस। जसो विषयाङ ङै नाक्कोके पहीला ज टेमो ङालेयाङ।#लूक २४:४९ 5यूहन्नै चहीन्या डीये बप्तिस्मा याहा, बाकी र केही दिनाङ नाक्कोइ पवित्र आत्मइङ बप्तिस्मा डीहीन्ढनीस।”#मत्ती ३:११; मर्कू १:८; लूक ३:१६; यूह १:३३
येशूके स्वर्गाङ नुन्काङ
6जब प्रेरितको भेला छाना तब होसोकोइ, “हे प्रभु, इसै बेलाङ ज फेरि इस्राएलो राज्य स्थापना जाट्डनी?” टेमो गीना।
7येशूये होसोकोके, “ङौ बाबै परमेश्वरे जुन समय हटै बेला मेकुङ अधिकाराङ डामोलेको होसै विषयाङ वार्के नाक्कुङ काम माला। 8बाकी र #मत्ती २८:१९; मर्कू १६:१५; लूक २४:४७,४८ पवित्र आत्मा नाक्कोवाङ राहाप्याक नाक्कोइ शक्ति डीहीन्डनीस, हटै नाक्को यरुशलेमाङ, पट्ट यहूदियाङ, सामरियाङ र पृथ्वीयाङो अन्तीम छेउ सम्मन ङौ बारेयाङ सेटाक्डनीस” टेकाङ। 9येशूये इसै कुरा टेके भ्यानीसीङ होसोकोइ ङोस्नाङ-ङोस्नाङ ज परमेश्वरे होस्कोके ढेमाङ स्वर्गाङ नुन्काङ हटै होस्कोके ढुडीये हुपा र होसोकोइ येशूके डाङ्के माहेका।#मर्कू १६:१९; लूक २४:५०-५१
10हटै जब होसोकोइ येशू ढेमाङ स्वर्गलाक आन्च ङोस्मो मुमलेया तब काखीनी बोच कपडा बील्च न्हीस भर्मी होसोकोटुङ टोरोस्स डाङा। 11हटै होस न्हीस भर्मीये होसोकोके, “ए गालीलाङो भर्मीको नाक्कोइ ही टीमो नमलाक ङोस्मो इलाङ टोरोस्मो मुम नाल्नीस? नाक्कोइ जसरी येशूके नाक्को टुइङ ढेमाङ-ढेमाङ स्वर्गाङ नुन्च नाडाङास होट ज फेरी होस्को ल्हेस्मो राहालेको” टेया।
मतियासके यहूदा इस्कोरियोतो सट्टाङ छान्डीच
12हटै प्रेरितको जैतुन टेच डाँडाइङ यरुशलेमाङ ल्हेसा। होसै यरुशलेमीङ काट कीलो मिटर लोस लेया। 13हटै होसोको यरुशलेमाङ टाक्नीसीङ मेक्को मुच इमो ढेम्च टालाङो काट कोठाङ जम्मा छाना। होलाङ पत्रुस, यूहन्ना, याकूब, अन्द्रियास, फिलिप, थोमा, बारथोलोमाइ, मत्ती, अल्फयसो मीजा याकूब, देश भक्त दलाङो सिमोन र याकूबो मीजा यहूदा #1:13 यहूदा: यहूदा इस्करियोत माला बाकी र यहूदा म्यार्मीन लेच आस्काट भर्मी।लेया।#मत्ती १०:२-४; मर्कू ३:१६-१९; लूक ६:१४-१६ 14हटै होसोको जहिले ड जम्मा छान्मो पट्टको कठा प्रार्थना जाट्मो मुवला। होलाङ चहीन्या येशूके डुट्च कोही माझाको हटै येशूवो मेकुङ बोइ मरियम हटै येशूवो भयाको ड लेया।
15-16कयाक होलाङ झण्डै १२० जना येशूवाङ विश्वास जाट्च भर्मीको जम्मा छान्मोलेया। हटै पत्रुस टोरोसा हटै इट टेया, “येशूवाङ विश्वास जाट्चको, परमेश्वरो बचनाङ पवित्र आत्मै राजा दाऊद द्वारा यहूदौ बारेयाङ ङाक्मो लेकाङ। इसै कुरा छान्के ज परीसाला हटै पुरा ज छाना। येशूके घोच भर्मीकुङ अगुवा चहीन्या यहूदा लेया। 17होसर कानको लख ज प्रभुवो बाह्र प्रेरित मध्याङो काट प्रेरित लेया हटै कान लख ज प्रभुवो काम जाट्के छान्डीस्मो लेया।”
18यहूदा इस्कोरियते मेनो दुष्ट कामो पैसै#मत्ती २७:३-८ काट गार्हा लोवा। होलाङ ज होसै उँधो मुन्टो छान्मो पछारडीसा हटै होच्यौ मीटुक भाट्मो मेखे-मीभुँडी ख्यौम्ह सीया। 19इसै कुरा यरुशलेमाङ लेच पट्ट भर्मीकोइ थाहा डीहीना। होट छान्नाङ होस गार्हौ म्यार्मीन होसोकोइ मेक्कुङ ढुटाङ “आखेल्दामा” डा। होच्यौ अर्थ मीहीयो गार्हा आला।
20पत्रुसे फेरी, “हीके टेहाङ भजन संग्राहो कीटाबाङ यहूदौ विषयाङ इट रीक्मले,
‘होच्यौ इम उजाड अटछाने,
हटै होलाङ बास मुच कुस ड नौटछाने’
इट र रीक्मले,
‘हटै होचे परमेश्वरके जाट्के डीहीन्च सेवा
आस्काट भर्मीये अटडीहीने।’#भजन ६९:२५; भजन १०९:८
21-22होस कारणे प्रभु येशू सीनीसीङ फेरी जीवाच कुरौ साक्षी छान्के लागी काने अब आस्काट भर्मीके छान्डीके परीस्ले। होस भर्मी चहीन्या यूहन्नै बप्तिस्मा याठइङ होडा प्रभु येशूके कानकोटुइङ स्वर्गाङ आल्च बेला सम्मन हटै येशू कान कठै ह्वानाङ होस कान कठा ज लेच छान्के परीस्ले” टेया।#मत्ती ३:१६; मर्कू १:९; लूक ३:२१; मर्कू १६:१९; लूक २४:५१
23इसै कुरा सेनीसीङ होलाङ जम्मा छान्च भर्मीकोइ बारसाबास टेच योसेफ जसके युस्तस घनीङ टेवला हटै मतियास टेच भर्मीके राका। 24होसोकोइ इट टेमो प्रार्थना जाटा, “जम्मै भर्मीकुङ गीनाङो कुरा वार्च प्रभु, इसै न्हीस मध्याङ कुस्काटके नाकोइ छान्डीमो नाल्नी नाकोइ कानकोके टनाक्नी। 25हटै होचे इसै सेवा र प्रेरितो काम जाट्के अटहेके हीकेटेहाङ यहूदै इसै प्रेरितो काम जाट्के डास्मो मेन्के जेस्स लामाङ आना।” 26हटै होसोकोइ चिठ्ठा का, र मतियासो म्यार्मीनाङ परीसा। हटै एघार जना प्रेरितकुङ समूहाङ होस घनीङ काट प्रेरित ठप्डीसा।
© 2024 (Active), Mother Tongue Translators Society and Wycliffe Bible Translators, Inc. All rights reserved.