लुका 24
24
सिउङि येसु जिंदो जासो
मत्ति २८:१-१०; मर्कुस १६:१-११; युहन्ना २०:१-१०
1आइतबार छकल्या सब्यार ज नो मिमाराइ तयार याजौउ अप्चाउ उसरिफ रान्या मास् सोनो मसला दाद नोर सागरदि हिंकेर। 2नोर होक याकलेसरैक सागर खुप्सिउ घ्यो लुँ हतैसिउ राँकेर#24:2 राँकेर सागरलाइ घ्यो लुँवइ खुप्सिउ ले। हुकिं हो सिपाहिराइ अर्गुज्याउर लेर। मत्ति२७:६६। 3तर भितर्ल यापसिक नोराइ प्रभु येसुइ ओसरिर मास्दैकेर#24:3 मास्दैकेर खो ग्रिक पुस्तकल सरिर मास्दैकेर वाज लिज्या।। 4जब नोर आउ बारेल अल्मलिद याच्याँलेक एक्कासि झ्वाङ-झ्वाङ क्वा कुसिलेउ जोर्बलै सलेपानि नोराइ याछ्योक च्याँकिनि। 5नो मिमार भ्या छेकेर सोनो गोम् लेकेर, तर नो जोर् सलेपानिइ हैयादोकिनि, “जे जिंदो जासोलाइ नेलाइ सिउराइ याखार्ल जिखिम्ज्या? 6येसु आक माले तर जिंदो जास्द सोद ले। गालिल्ल उलिज्याक येसुइ जेलाइ अइदासिउ अस्पाँ सम्झिच्यो, 7‘परमेस्वरवइ उस्परिंङाउ ङा अर्मिइ ओजा पापि अर्मिराइ याकुइत परिन्या ङाले, नोराइ ङालाइ क्रुस्त झुन्दैद सैन्या लेर। हैजैद सोंला छ्याम् जिंदो जास्न्या ङाले’#मत्ति १६:२१; १७:२२-२३; २०:१८-१९; मर्कुस ८:३१; १०:३३-३४; लुका ९:२; १८:३१-३३।”
8होबेलाक चि नोराइ येसुइ हैओलेउ ओस्पाँ सम्झिकेर। 9हैजैद सागरङि ओल्द नोराइ आउ स्यो अस्पाँ एघार जना चेलार सोनो गुँ स्योरलाइ हैयादोकेर। 10नो मिमार चाहिं मरियम मग्दलिनि, योअन्ना, सोनो याकुबवइ ओवाँमा मरियम सोनो गुँ मिमार ब लेर। आराइ ज आउ अस्पाँर प्रेरितरलाइ हैदासिउ ले। 11तर नो मिमाराइ हैयालेउ अस्पाँ ए हैयालेज्याउ क्या हैलेद नोराइ म्हापतेकेर। 12तर पत्रुस झाराक जुरुक सोद जोनाद सागरदि हिंके, हैजैद सागर भितर्ल गोम्लेद ओराँक सुति क्वावइ ओपतिर वाझ राँकेउ। आउ अस्पाँर राँद नो अचम्ब मानिद उझिम्दि ओल्द हिंके।
येसु इम्माउसलाउ घ्वात
मर्कुस १६:१२-१३
13हो छ्याम् येसुइ ओचेलार मध्ये जोर् चेलानि यरुसलेम्ङि एघार किलोमितर ह्वाकाउ तादालाउ इम्माउस हैयादाज्याउ नाखाँदि हिंज्याउनि लेनि। 14नुनिइ बा जासो घतनाइ ओबारेल अस्पाँज्याउनि लेनि। 15नुनि अस्पाँइ-अस्पाँइ इंहिज्याक येसुराद नुनिस सिप् हिंके। 16तर नुनि येसुलाइ मासरेस्किनि। 17येसुइ नुनिलाइ हैयानिदोकेउ, “जिं नातिइ ओबारेल अस्पाँइ-अस्पाँइ जिंहिंज्या?” नुनि थपक् च्याँकिनि। नुनिइ इंचाँधि अर्थुम्किनि।
18नो जोर्मध्ये क्लेओपास हैयादाज्याउवइ येसुलाइ हैदोकेउ, “यरुसलेम सहर दुलिद राज्याउ जास्द ब आज्यु आछिम् नोल नाति जास्द ले हैलेन्या अस्पाँ मासैंन्या अर्मि ना वा नलेउ?”
19येसुइ नुनिलाइ “नाति अस्पाँ?” हैलेद यानिस्गेंकेउ। नुनिइ हैदोकिनि, “नासरतलाउ येसुइ ओबारेल। येसु तुबु परमेस्वरङि अस्पाँन्या ले। हुकिं परमेस्वर सोनो स्यो अर्मिराइ याबरिक अचम्ब लागिउ एन्र दान्या हुकिं अप्चाउ अस्पाँर अस्पैन्या अर्मि ले।” 20तर गे यहुदि घ्यो गेपुजारिर सोनो गेसासकराइ येसुलाइ सैन्या दन्द यान्याको लागि क्रुस्त जुन्दौ यास्परिंकेर। 21तर इस्राएलिरलाइ छुत्कारा यान्या ओल्ज क्या हैलेद गे आस् दासिउ ले। आउ स्यो अस्पाँ रास्द, आउ घतना घतिउ ब आछिम् सोंला जास्के। 22-23होवाकाना वाज म्हा, गेमालाकज येसुलाइ पछैन्या खो-खो गिमिमार आछिम् छकल्या ज प्रभुइ ओसागर्क हिंकेर। तर नोराइ नोक येसुइ ओमोरोलाइ माराँकेर हैजैद नोर ओल्द राद नोराइ परमेस्वरवइ ओस्पाँ हैदान्यानिलाइ याराँउ अस्पाँ सोनो परमेस्वरवइ ओस्पाँ हैदान्यानिइ नोरलाइ प्रभु जिंदो जास्दले हैलेद हैयादोउ अस्पाँवइ गे छक् परिद गेले। 24आउ थैद गे खो-खो गिरिजार ब सागर राँन्या हिंकेर, हैजैद नो मिमाराइ जो हैदासिउ ले, हदिउज अस्दैकेर, तर येसुलाइ चाहिं म्हाराँकेर।
25येसुइ नुनिलाइ हैयानिदोकेउ, “ए अबुझ अर्मिर, जे जेयुउँ आक समलाउ लुँ दाले, कि परमेस्वरङि अस्पाँन्याराइ हैयालेउ अस्पाँर जेमापते! 26आदर सोनो महिमा अस्दैन्या भन्दा बरिदि ख्रिस्तवइ दुख अस्दैन्या आबस्यक ले?” 27हुकिं मोसाकिंताउ रैद स्यो परमेस्वरङि अस्पाँन्याराइ ओबारेल परमेस्वरवइ ओबचनल याअप्सरो अस्पाँराइ याअर्थ नुनिलाइ खुलिद यानियोकेउ।
28नोर इम्माउस नाखाँइ उनजिक याकलेसरैक यालिज्याउ थाउँकिं येसु अजैब जाँ हुदि हिउँ मदिउ जैसिके। 29तर नुनिइ येसुलाइ अइलेद कर् लैकिनि, “गिंस बासिनि, नेलाइलेक दिन् भ्या दल्किके, सोनो नम् ब ज्यानाले।” हैजैद येसु नुनिस ज बासिन्या हिंके। 30नुनि ज्यान्या इंचुँलेक येसुइ भरेस तिद धन्यबाद योकेउ, हैजैद सलेद नुनिलाइ यानियोकेउ। 31होबेलाक चि नुनिइ सैंद येसुलाइ सरेसकिंनि। तर होबेलाक ज नुनिइ इंमिखिङि येसु होक ङोइके। 32हुकिं नुनिजोर् अइलेद अस्पाँकिनि, “येसु गिंस घ्वात अस्पाँउयाँ परमेस्वरवइ ओबचनल अप्सरसिउ अस्पाँराइ हैलेउ अस्पैंसिउ अस्पाँवइ ओबारेल हैओदासिज्याक गिंयुउँ भ्या आनन्द जासो ले याँ?”
33नुनि होपन्याज सोद यरुसलेम्दि ओल्किनि। नोक इंकलेस्क नुनिइ एघार जना चेलारास अस्दुसिलेउ गुँ अर्मिरलाइ यास्दैकिनि। 34हैजैद नोराइ नुनिलाइ अइयादोकेर, “प्रभु दसाज सिउङि जिंदो ओजासो, सोनो सिमोन पत्रुसवइ ओलेउक ओरैंउ हो ज ओजासो।”
35हुकिं नो जोर् चेलानिइ ब घ्वात जासो अस्पाँर सोनो येसुइ भरेस ओसलेक कैजैद नुनिइ येसुलाइ सरेसकिंनि, हैलेन्या स्यो अस्पाँ होकाउ लिज्याउ गुँ चेलारलाइ ब हैयादोकिनि।
येसु चेलाराइ यालेउक रउँ
मत्ति २८:१६-२०; मर्कुस १६:१४-१८; युहन्ना २०:१९-२३; प्रेरित १:४-८
36नोराइ आउ अस्पाँ यास्पाँज्याकज येसु नोराइ याखार्ल च्याँके, हैजैद हैयादोकेउ, “जेलाइ सान्ति ओजास्क।#24:36 जेलाइ सान्ति ओजास्क आउ भाग खो ग्रिक स्रोतरात माले।”
37तर नोराइ “गेते भुतलाइ चि गेराँके” हैलेन्या सम्झिद नोर अचम्ब छेकेर। 38तर येसुइ नोरलाइ हैयादोकेउ, “जे नेलाइ अइजैद जेछेज्या, सोनो जेयुउँल नेलाइ सङ्का जेदाज्या? 39ङाखुँ-कुइ राँच्यो, ङा येसु ज, ताछेच्यो। ङा भुत म्हा हैलेद सैन्याको लागि ङालाइ छाप्द राँङाच्यो, नेलाइलेक भुतराइते यास्या सोनो यारुस् माजास्, तर ङा ङामिते लिज्या। सोनो आउ अस्पाँ जेब जेराँज्या।”
40अइदाद येसुइ नोरलाइ उकुइ सोनो उखुँ अस्तैंद यायोकेउ। 41नोर अचम्ब खुसि जास्द अजैब माप्तेदुद छक् यापरिलेक येसुइ नोरलाइ हैयादोकेउ, “जेस नाति-निउ ज्याउ मालिज्या?” 42नोराइ येसुलाइ भुतिसिउ जोर्वा ङ्हा योकेर। 43हुकिं येसुइ नो ङ्हा थाँद नोराइ याबरिकज तोइद यायोकेउ।
44येसुइ नोरलाइ हैयादोकेउ, “जेस ङालिज्याकाउ हैङादाच्योउ अस्पाँर आरज, ङाबारेल मोसाइ ओब्यबस्था, परमेस्वरङि अस्पाँन्या सोनो भजनताउ पुस्तकरात अप्सर्सिउ स्यो अस्पाँर पुरा जासो ज परि।”
45हुकिं येसुइ नोरलाइ परमेस्वरवइ ओबचन बुजैन्या सक्ति यायोकेउ। 46येसुइ नोरलाइ हैयादोकेउ, “परमेस्वरवइ ओबचनल अमदिउ अप्सर्सिउ लिज्या, ख्रिस्तवइ दुख अस्दैद सिउपरि, सोनो सोंलात सिउङि जिंदो जास्न्याले। 47हुकिं यापापलाइ सम्झिद पाप दान्या रास्द परमेस्वरवइ पाप छेमा यासिउ हैलेन्या अस्पाँ येसु ख्रिस्तवइ उर्मित यरुसलेम्ङि सुरु दाद मादमिलाउ स्यो अर्मिरलाइ हैदाउपरि। 48जेज आउ स्यो अस्पाँवइ ओसाछिर ज। 49राँच्यो, ङा ङाबाबु परमेस्वरवइ जेलाइ यान्या ङाले हैओलेउ पबित्र आत्मा ङा जेलेउक अस्परिंन्या ङाले। तर पबित्र आत्मा जेमास्दौवा जे आउ यरुसलेम सहरल ज लेच्यो#प्रेरित १:४।”
येसु स्वर्ग हिउँ
मर्कुस १६:१९-२०; प्रेरित १:९-११
50हैजैद येसुइ चेलारलाइ बेथानिया नाखाँ सम यालोंकेउ, सोनो उकुइ छेंद नोरलाइ आसिर्बाद यायोकेउ। 51येसुइ नोरलाइ आसिर्बाद ओवायाज्याक, येसु नोराङि छुतिके हैजैद स्वर्गदि छेंसिद हिंके। 52नोराइ येसुइ ओप्रसंसा दोकेर हुकिं ए खुसि जास्द यरुसलेम सहरदि ओल्केर। 53हुकिं नोर ओगोरे परमेस्वरवइ उझिम्ल अस्दुसिद परमेस्वरवइ ओप्रसंसा दोर।
Currently Selected:
लुका 24: MAIK
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
