प्रेरित 7
7
स्तिफनसवइ ओसन्देस
1प्रधान पुजारिवइ स्तिफनसलाइ, “नोराइ नालाइ दोस यालैनिज्याउ अस्पाँ दसाज रो?” हैलेद अस्गेंकेउ।
2स्तिफनसवइ अइलेद जबाफ योकेउ, “ङादाज्यु-भाइर सोनो ङाबाबुर, ङा ङास्पाँ थैच्यो। गिपुर्खा अब्राहाम हारान हैयादाज्याउ थाउँल हिंन्या भन्दा बरिदि मेसोपोतामिया हैयादाज्याउ थाउँल उलिज्याक महिमाल बास दान्या परमेस्वरवइ दर्सन अस्तैंद योकेउ#उत्पत्ति १२:१। 3हुकिं परमेस्वरवइ अब्राहामलाइ हैदोकेउ, ‘ना नदेस सोनो नइस्तकुतुम् रास्द ङा नालाइ अस्तैंद ङायिंनिउ देसल हिंनि।’ 4हैजैद अब्राहाम कल्दिराइ यादेसलिं पुलुस्द हारानल हिंद होल लेके। नोइ ओबाबु उसिउ छिंङि परमेस्वरवइ नोलाइ जे आर्क जिलिज्याउ आउ देसल रैकेउ#उत्पत्ति ११:३१; १२:४। 5होबेलाक परमेस्वरवइ अब्राहामलाइ हो देसल भ्यामादि उखुँतिकिन्या पो ब मायोकेउ। तर परमेस्वरवइ ‘आउ देस ना सोनो नसन्तानरलाइ यान्या ङाले’ हैलेद बाचा दोकेउ। बाचा ओदाज्याक अब्राहामवइ तुबु ओसन्तान ब माजासो ले#उत्पत्ति १२:७; १३:१५; १५:१८; १७:८। 6परमेस्वरवइ अब्राहामलाइ फेरि अइदोकेउ, ‘नसन्तानर गुँराइ यादेसल हिंद लेन्या लेर। होलाउ अर्मिराइ नोरलाइ बाँदा-बाँदानि जैद चार् सय बर्स सम भ्या दुख यान्या लेर#उत्पत्ति १५:१३-१४ । 7तर नोरलाइ बाँदा-बाँदानि जैन्यारलाइ ङा दन्द यान्या ङाले। हैजैद नोर हो देसलिं पुलुस्द आउ थाउँल राद ङाआराधना दान्यालेर’#प्रस्थान ३:१२। 8हैजैद परमेस्वरवइ अब्राहामस तुबु करार भाकेउ हो करारलाइ सम्झिन्याको लागि खतना दान्या आग्या योकेउ। हैजैद अब्राहामवइ ओजा इसाहाक जास्के, ओजा आथदिन् ओयोउ छ्याम् ओखतना दाद योकेउ। इसहाकवइ ब ओजा याकुबलाइ दाद योकेउ हुकिं याकुबवइ ब बाह्र भाइ ओजाभरिरलाइ दाद यायोकेउ। अब आरज बाह्र कुलराइ गिपुर्खा जास्रैकेर#उत्पत्ति १७:१०-१४; २१:२-४; २५:२६; २९:३१—३५:१८।
9“याकुबवइ ओजा योसेफलाइ ओदाज्युराइ खिस् दाद मास्हिदुद नोलाइ मिस्र देसलाउ अर्मिराइ यालेउक वेयेकेर। तर परमेस्वर योसेफस ले#उत्पत्ति ३७:११,२८; ३९:२,२१। 10परमेस्वरवइ योसेफलाइ स्यो दुखङि छुतैकेउ। जब योसेफ मिस्र देसलाउ अर्गे फारोवइ उबरिक राके, हुकिं परमेस्वरवइ योसेफलाइ बुद्धि योकेउ। उबुद्धि राँद फारोवइ योसेफलाइ मिस्र देसलाउ सोनो दर्बारलाउ सासक जैकेउ#उत्पत्ति ४१:३९-४१। 11हो छिंङि मिस्र देस सोनो कनान देस भरि अनिकाल जास्द स्योराइ भ्या दुख अस्दैकेर। हुकिं गिपुर्खाराइ निउ अन् मास्दैकेर#उत्पत्ति ४२:१-२। 12मिस्र देसल अन् लिज्या हैलेन्या अस्पाँ थैद याकुबवइ ओजारलाइ नो देसल अन् चेंनान्या पहिलोपतक यास्परिंकेउ। 13छिंङि फिरि नोर अन् चेंनान्या याहिंक योसेफवइ ओदाज्यु-भाइरलाइ ङा योसेफ हैलेद हैयादोकेउ। होबेला ज फारोवइ योसेफवइ ओपर्यालिरलाइ यासरेस्केउ।#उत्पत्ति ४५:१,१६ 14योसेफवइ ओबाबु याकुबलाइ ‘स्यो पर्यालिरलाइ दाद मिस्र देसल ओराक’ हैलेद खबर अस्परिंकेउ। हैजैद याकुबवइ पचहत्तर जना ओपर्यालिरलाइ दाद मिस्र देसल हिंके। 15अइजैद याकुब मिस्र देसल हिंद होल सिके हुकिं गिपुर्खार ब होल ज सिकेर। 16हुकिं नोराइ यामोरोलाइ सकेम हैयादाज्याउ थाउँल लाँद यागादिकेर। हो जगा अब्राहामवइ हमोरवइ ओजाराइ यालेउक चेंसिउ ले।#उत्पत्ति २३:३-१६; ३३:१९; ५०:७-१३; यहोसु २४:३२
17“परमेस्वरवइ अब्राहामस ओदोउ करार पुरा जास्न्या बेला जासो ले। होबेलाक मिस्र देसल गिर्मिराइ यासंख्या भ्या जासो ले#प्रस्थान १:७-८ । 18योसेफ उसिउ भ्या बर्स छिंङि मिस्र देसल योसेफलाइ मासरेस्ज्याउ तुबु सारो अर्गेवइ राज्य चलैकेउ। 19नोइ गिपिता पुर्खारलाइ बोलो मादोकेउ। नोइ इस्राएलिराइ बा जासो सलेपा याजार गसिरक हैलेद जबर्जस्ति लाँदि बिउँ यास्परिंउ#प्रस्थान १:१०-११,२२। 20हो बेलाक ज मोसा जर्मिके। नोलाइ परमेस्वरवइ ओमन् लागिउ ले। नोलाइ ओबाबु-ओवामानिइ सोंस्या सम झिम्ल मुँद ङाकिनि#प्रस्थान २:२। 21तर छिंङि इंमामुदुउवइ खोला छ्योक जाद बनैकिंनि हुकिं फारोवइ मिमा ओजाइ अस्दैद लाँद ओल् ओजा जैद ङाकेउ#प्रस्थान २:३-१०। 22हैजैद मोसालाइ मिस्रिराइ स्यो ग्यानगुन अस्पैकेर हुकिं नो अस्पाँन्यात सोनो एन् त सक्तिसालि जास्के।
23“मोसा चालिस बर्स ओदालेक, नोइ इस्राएलि ओदाज्यु-भाइरास अस्दैसिन्या युउँ दोकेउ#प्रस्थान २:११-१५। 24तला मोसावइ तुबु मिस्रिवइ तुबु इस्राएलिलाइ ओथतैज्याउ राँकेउ। हुकिं मोसाइ नो इस्राएलिइ उदुल दाद हो मिस्रिलाइ थतैद सैकेउ। 25परमेस्वरवइ ङाकुइतिं ज इस्राएलिरलाइ दासत्वलाउ जिबनङि छुतैन्या ले हैलेद ङार्मिराइ बुजैर सिं हैलेद मोसाइ सम्झिसिउ ले। तर इस्राएलिराइ आउ अस्पाँ माबुजैकेर। 26होइ ओपराति मोसाइ जोर् इस्राएलिनि इंर्खपज्याउ यानिराँकेउ। हैजैद होक हिंद नुनिलाइ मिलौ अस्पैंद हैयानिदोकेउ, ‘जिं नेलाइ तुबु दाज्यु-भाइ जास्दब अइजैद जिंर्खप्ज्या?’ 27तर उरिजालाइ हेला दाज्याउ इस्राएलिवइ मोसालाइ गुर्चैद हैदोकेउ, ‘सुइ नालाइ न्यायदिस जैसिद गिंमामेलाल अस्पाँनि हैउदिंनिउ? 28आज्यु नो मिस्रिलाइ नसौ मालाक ङालाइ ब सौ नस्पैंज्या रो?’ 29आउ अस्पाँ थैद मोसा मिस्र देसलिं भागिद मिद्धान देसल हिंद होल प्रबासि जास्द लेके। होल उलिज्याक ज मोसाइ जोर् सलेपा ओजानि जास्किनिं#प्रस्थान १८:३-४ ।
30“चालिस बर्स उबितिउ छिंङि सिनै दाँदाताउ सुमालेउ थाउँक मि चाँज्याउ पथर्कालाउ मिमुल्काल तुबु परमेस्वरवइ ओस्पाँ हैदान्या मोसाइ ओलेउक रैंके#प्रस्थान ३:१-१०। 31आउ राँद मोसा छक् परिके हैजैद नोलाइ अप्चाद राँन्याको लागि नो पथर्कावइ ओलेउक उहिंक मोसाइ परमप्रभुइ ओर्गा थैकेउ, 32‘ङा ना नपुर्खा अब्राहाम, इसहाक सोनो याकुबराइ यापरमेस्वर।’ आउ थैद मोसा ओछेउराइ कर्कर् लेद हुदि ज माबालसिदुके। 33परमप्रभुइ मोसालाइ हैदोकेउ, ‘आउ नच्याँलेउ पो पबित्र लिज्या ना नपोवला हाइको। 34मिस्र देसल लिज्याउ ङार्मिराइ दुख यास्दौ राँद ङानै सोनो नोर लावैंसिद यागर्ज्याउ ब थैद ङानै। ङा नोरलाइ छुतैन्या ङाराउ, आउ एन्को लागि ङा नालाइ मिस्र देसल अस्परिंन्या ङाले।’
35“आउ मोसा ज, जोलाइ उर्मिराइ ज, ‘सुइ नालाइ सासन दान्या सोनो न्याय दान्या ओजैनिउ?’ हैलेद इन्कार दासिउ ले। तर नो चाँज्याउ पथर्कालाउ मिमुलकाल रौं परमेस्वरवइ ओस्पाँ हैदान्याङि ज परमेस्वरवइ मोसालाइ इस्राएलिरलाइ सासन दान्या सोनो छुतैन्या अगुवा जैद अस्परिंकेउ#प्रस्थान २:१४। 36मोसाइ ज इस्राएलिरलाइ मिस्र देसलिं अस्पुलुइद यारैकेउ। हुकिं मिस्र देसल, लाल समुन्द्रल सोनो सु मालेउ थाउँयाल चालिस बर्स सम मोसाइ अचम्बलाउ एन्र दाद चिनोर यास्तैंकेउ#प्रस्थान ७:५; १४:२१; गन्ति १४:३३। 37नो मोसाइ ज इस्राएलिरलाइ हैदासिउ ले, ‘परमेस्वरवइ जे जेदाज्यु-भाइरालिं ज ङामदिउ तुबु परमेस्वरङि अस्पाँन्या जेलेउक अस्परिंन्या ले#व्यबस्था १८:१५,१८।’ 38इस्राएलिर सु मालेउ थाउँत यालिज्याउ बेला मोसा ब नोरासज ले। सिनै हैयादाज्याउ दाँदात परमेस्वरवइ ओस्पाँ हैदान्यावइ मोसालाइ हैदोउ। हैजैद परमेस्वरवइ ओस्पाँ हैदान्यावइ हैओदोउ अस्पाँ मोसाइ इस्राएलिरलाइ हैयादोउ#प्रस्थान १९:१—२०:१७; व्यबस्था ५:१-३३।
39“तर गिपुर्खाराइ मोसाइ ओस्पाँ माथैकेर, झन नोराइ मोसालाइ रास्द मिस्र देसल हिंन्या युउँ दोकेर। 40नोराइ मोसाइ ओदाज्यु हारुनलाइ हैदोकेर, ‘गेलाइ छुतैद रैन्या मोसाते उसिउ सिं ओभागिउ निउ अतोपतो माले। अब गेको लागि गिबरि-गिबरि हिन्या तुबु देउता जैद यासिको#प्रस्थान ३२:१।’ 41हैजैद नोराइ तुबु हार्जाइ उमुर्ति जैकेर, हुकिं नोलाइ पुजा दोकेर, आउ याकुइङि याजौ मुर्ति राँद खुसि मनैकेर#प्रस्थान ३२:२-६। 42होकारन परमेस्वरवइ नोरलाइ इन्कार दाद नम्ताउ सोरोर ज गापुजिज्यारक हैलेद यारास्केउ। होइ ओबारेल परमेस्वरङि अस्पाँन्याराइ परमेस्वरवइ ओबचनल अइलेद अप्सरद नैर,
‘इस्राएललाउ अर्मिर!
जे चालिस बर्स सम सु मालेउ थाउँल
जो बलि जेचरैके होक्या ङाको लागि ले?
43जे मोलेख हैयादाज्याउ देउताइ ओपाल जेलाँके
हुकिं रेफन देउता हैयादाज्याउ सोरोवइ उमुर्ति ब जेलाँके।
नो स्यो जे ज्याजौ मुर्तिर लेर।
होकारन ङा जेलाइ दन्द यान्या बेबिलोनकिं ब हुदि अस्परिंन्या ङाले।’
44“सु मालेउ थाउँल गिपुर्खारास ‘परमेस्वर लिज्या’ हैलेद सबुजैन्याको लागि पवित्र पाल ले। हो पाल परमेस्वरवइ मोसालाइ ओअरौ मदिउ जैसिउ ले#प्रस्थान २५:९,४०। 45जामावात परमेस्वरवइ आउ देसल लिज्याउ गुँ जातिरलाइ याधपैकेउ। हैजैद यहोसुवइ आउ देस ओज्याउँ छिंङि हो पाल आल रैकेर, हो पाल अर्गे दाउदवइ ओपालाक सम ले#यहोसु ३:१४-१७। 46दाउदवइ परमेस्वरवइ ओदया अस्दैकेउ हैजैद याकुबवइ ओपरमेस्वरलाइ ‘ना लेन्या मन्दिर जौ ङास्दैक’ हैलेद बिन्ति दोकेउ#२समुएल ७:१-१६; १इतिहास १७:१-१४। 47तर परमेस्वरवइ ओमन्दिर चाहिं दाउदवइ ओजा सोलोमनवइ जैकेउ#१राजाहरु ६:१-३८।
48“तर परमेस्वर अर्मिराइ जैसिउ मन्दिरल माले। परमेस्वरङि अस्पाँन्यावइ ब हैलेले।
49परमेस्वरवइ हैलेज्या, ‘स्वर्ग ङा ङासिंहासन,
सोनो मादमि ङाखुँ नैन्या पो,
जे ङाको लागि कमदिउ चि मन्दिर जेजैते?
ङा नान्या थाउँ काँक लिज्या?
50आउ स्यो थोक ङा ङाजौ म्हा रो?’
51“जे हैदासिउ माथैन्या कथोर जिंयुउँ लेउ अर्मिर सोनो जेर्ना माथास्न्यार, जिपुर्खाराइ मालाक जेब पबित्र आत्माइ हैदासिउ अस्पाँ खर्क जेमाथै।#यसैया ६३:१० 52परमेस्वरङि अस्पाँन्यार मध्ये कदिउलाइ चि क्याद जिपुर्खाराइ दुख मायासिउ? नोराइ परमेस्वरवइ ओपबित्र सेबक राज्या हैलेद खबर दान्या भरिरलाइ यासैकेर। जे चाहिं रालेउ परम धर्मि जनलाइ ब धोका याद जेसैके#मत्ति ५:१२। 53परमेस्वरवइ ओस्पाँ हैदान्याराइ याकुइतिं यासिउ व्यबस्था ते जेस्दैके, तर जे नोलाइ पालन जेमादाके।”
स्तिफनसलाइ लुँइ होर्द सैसिउ
54स्तिफनसवइ ओस्पाँ थैद यहुदि अगुवाराइ घ्यो यासभालाउ अर्मिर यायुउँ चोद याप्स्या हेकेर। 55तर स्तिफनस पबित्र आत्मावइ भरिपुर्न जास्द स्वर्गदि राँकेउ। नोइ परमेस्वरवइ ओमहिमा सोनो येसुलाइ परमेस्वरवइ ओर्फताउ ओपोत घ्यो महिमाल च्याँद ओलेउ राँकेउ। 56स्तिफनसवइ हैदोकेउ, “राँच्यो, स्वर्ग फैसिलेउ ङाराँके, सोनो अर्मिइ ओजा येसुलाइ परमेस्वरवइ ओर्फताउ ओपोक च्याँद ओलेउ ङाराँके।”
57तर नोर चोइसि कलिद च्याँकेर, हुकिं यार्ना अप्सुइद स्योराइ तफेत ज स्तिफनसलाइ छुपिनाकेर। 58नोराइ स्तिफनसलाइ लुँइ होर्द सैन्याको लागि सहरकिं बाहिर तुल्द लोंकेर। होकाउ लिज्याउ साछिराइ याक्वार फियुउँद साउल उर्मिलेउ तुबु छोराइ उबरिक नैद स्तिफनसलाइ लुँइ होर्केर। 59नोराइ लुँइ याहोर्ज्याक स्तिफनसवइ प्रभुलाइ अइलेद पुकारिकेउ, “हे प्रभु येसु, ङाआत्मा लाँद याँको।” 60हैजैद स्तिफनसवइ उगुँदा तिकिद चोइसि कलिद अइलेके, “हे प्रभु, आउ पापवइ ओदोस आरलाइ तालागिक।” आकाना हैलेद नोइ उसु फ्याके।
Currently Selected:
प्रेरित 7: MAIK
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
