प्रेरित 1
1
पवित्र आत्मावइ ओप्रतिग्या
1माननिय थियोफिलस ज्यु, येसुइ ओदोउ एन् सोनो ओवास्पौ स्यो अस्पाँवइ ओबारेल पहिलाकाउ ङापुस्तकल नालाइ अप्सर्द ङायिंनैनि#लुका १:१-४।
2येसुइ ओल् ओवाछानिउ प्रेरितरलाइ पबित्र आत्माइ ओसक्तिवइ आग्या ओवायोउ छिंङि ओल् स्वर्गदि छेंसिद उहिंउ दिन् समकाउ स्यो अस्पाँ हो पुस्तकल अप्सर्सिउ लिज्या। 3दुख कस्तस उसिउ छिंङि येसु चालिस दिन सम गरि-गरि नोराइ यालेउक अस्तैंसिद ङा जिंदो ङालिज्या हैलेन्या पत्यारो प्रमान अस्तैंकेउ। हुकिं नोरलाइ परमेस्वरवइ ओराज्य बारेल यासथैकेउ।
4तला येसु नोरास ज्याउ ज्यान्या उचुँलेक नोरलाइ अइयादोकेउ, “जे यरुसलेम रास्द काँदि ताहिंच्यो, तर स्वर्गताउ ङाबाबुवइ ओदोउ प्रतिग्यालाइ कलेंच्यो। आउ अस्पाँ जेलाइ पहिला ब हैदासिउ ले#लुका २४:४९। 5नेलाइलेक युहन्नावइ रिवइ बप्तिस्मा यायोउ, तर अबकाउ जामावात जे पबित्र आत्मावइ ओबप्तिस्मा अस्दैन्या जेले#मत्ति ३:१; मर्कुस १:८; लुका ३:१६; युहन्ना १:३३।”
येसुलाइ स्वर्गत लाँसिउ
6अइजैद नो अस्दुसिलेउ प्रेरितराइ येसुलाइ अस्गेंकेर, “प्रभु, हुकिं ना आउ बेलाकज इस्राएलाउ अर्मिरलाइ छुतैद फिरि गेराज्य जैन्या नले?”
7येसुइ नोरलाइ हैयादोकेउ, “स्वर्गताउ ङाबाबुइ ओल् ओअधिकारल नैद ओनौ समय, सैंन्या जे जेएन् म्हा। 8तर जेत पबित्र आत्मा ओराउ छिंङि जे सक्ति अस्दैन्या जेले, हुकिं जे यरुसलेमल, यहुदियाल, सामरियाल, सोनो मादमिलाउ स्यो कुना कुनासम ङासाछि जास्न्या जेले#मत्ति २८:१९; मर्कुस १६:१५; लुका २४:२७-२८।” 9येसुइ आउ अस्पाँ हैओवादोउ छिंङि, नोराइ याराँज्याकज येसु यादि छेंसिद, बादल झिंल ङोइके#मर्कुस १६:१९; लुका २४:५०-५१।
10नोराइ येसु नम्दि उहिंज्याउ एकोरो जास्द याराँज्याक नोराइ याबरिक एक्कासि पालो क्वा कुसिउ जोर् अर्मिनि च्याँकिनि। 11नुनिइ हैयादोकिनि, “गालिल्लाउ अर्मिर, जे नेलाइ नम्दि बाल्सिद च्याँद जेले? येसुते स्वर्गत हिंके। कैजैद आर्क जे येसुलाइ स्वर्गत उहिंज्याउ जेराँके, नैजैद ज तला येसु फिरि ओल्द रान्याँ ले।”
यहुदाइ ओपोल गुँ चेला छानिसिउ
12हैजैद नोर जैतुन दाँदाङि यरुसलेम्दि ओल्केर। यरुसलेम्किं जैतुन दाँदा लगभग तकिलो मितर ह्वाकाउ तादा ले। 13नोर यरुसलेम कलेस्द या यालिज्याउ झिम्लाउ गारिताउ कोथाल अस्दुसिकेर। नोक अस्दुसिन्याँर पत्रुस, युहन्ना, याकुब, अन्द्रियास, फिलिप, थोमा, बार्थोलोमाइ सोनो मत्ति, अल्फयसवइ ओजा याकुब, देसभक्त सिमोन सोनो याकुबवइ ओजा यहुदा लेर#मत्ति १०:२-४; मर्कुस ३:१६-१९; लुका ६:१४-१६। 14खो दिदि-बहिनिर हुकिं येसुइ ओवामा मरियम सोनो येसुइ ओपार्जारास अस्दुसिद तुबु युउँ जास्द आराइ ओगोरे प्राथना दोर।
15जामावात नोक गोइमादि तसय बिस्जना वा प्रभु येसुत बिस्वास दान्या अर्मिर अस्दुसिउर लेर। पत्रुस नोराइ याखर्ल च्याँद हैयादोकेउ, 16“दाज्युभाइर, परमेस्वरवइ ओबचनल ब पबित्र आत्मावइ अर्गे दाउदवइ ओयाङि येसुलाइ कोलोन्याराइ याअगुवा यहुदावइ ओबारेल अस्पाँसिउ ले। आउ अस्पाँर पुरा जासो ज परिन्या ले सोनो पुरा ब जास्के। 17नेलाइलेक नो गेस ज खिसिउ ले। सोनो गेमालाक ज प्रभुइ ओएन् दान्या नो ब छानिसिउ ले।”
18यहुदावइ अधर्मङि ओकमौ रुप्यावइ तुबु याँबाँ चेंकेउ, हो याँबाँल नो उँधोसर्यान् जास्द तेद सिके हैजैद नोइ उभुँदि अर्फोद उप्जिं-ओदाँ पुलुस्के#मत्ति २७:३-८ । 19आउ अस्पाँ यरुसलेम्लाउ स्यो बासिन्दाराइ सैंकेर हैजैद नोराइ नो याँबाँवइ उर्मि याखाम्ङि आखेल्दामा नैकेर। नोइ ओअर्थ “झिलेउ याँबाँ।”
20पत्रुसवइ हैलेक, “नेलाइलेक भजनसंग्रहलाउ पुस्तकल अम्दिउ अप्सर्सिउ लिज्या,
‘नोइ उझिम् रितो ओजास्क,
सोनो होल लेन्या सु ताजास्रक,
नोइ ओदाज्याउ एन्वइ उजिम्मा गुँवइ ओरौक#भजनसंग्रह ६९:२५; १०९:८।’
21-22“ होकारन गेस लिज्याउ अर्मिर मध्ये तुबुलाइ छानिन्या खाँचो लिज्या, जो अर्मि युहन्नावइ बप्तिस्मा ओयोउ समयकिं रैद प्रभु येसु स्वर्गदि उहिंउ छयाम् सम गेस ले। सोनो येसु गेस ओस्बारिज्याक गेसंगतल ले। हो अर्मि गेस सिप्सिप् येसु सिउङि फिरि जिंदो ओजासो अस्पाँवइ ओसाछि जासो परि#मत्ति ३:१६; मर्कुस १:९; १६:१९; लुका ३:२१; २४:५१।”
23आउ अस्पाँ याथौ छिंङि नोकाउ अस्दुसिलेउ अर्मिराइ जोर्निलाइ बरिदि यारैकेर। तुबु बार्साबास हैयादाज्याउ योसेफ, होलाइ ज युस्तस ब हैदोर सोनो तुबुइ उर्मि मतियास ले। 24नोराइ अइलेद प्राथना दोकेर, “स्यो अर्मिराइ यायुउँलाउ अस्पाँ सैंन्या प्रभु, आउ जोर्मध्ये ना कदिउनिलाइ नानि रुजि नै हो गेलाइ अस्तैंद यासिको, 25हैजैद होइज आउ सेवा सोनो प्रेरितलाउ एन् ओदोउक, यहुदावइ आउ एन्लाइ रास्द ओल् ओपोक हिंद सिके।” 26हैजैद नोराइ नो जोर्निइ इंर्मित गोला जाकेर, नो गोला मतियासवइ उर्मित परिके, हैजैद नो एघार प्रेरितरास खिसिके।
Currently Selected:
प्रेरित 1: MAIK
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
