Amǝ Roma 3
3
Ɓakuli ka kǝ nggaɗi ɗang
1Nǝ mana sǝ duk ɓwa Yahudi ka kutina ban nǝi le? Ko a na raka, kasǝ-ɓatau ka kǝgìr na le? 2E, duk ɓwa Yahudi ka agir mǝɓoarne nakam kpem aɓalǝi! A tite ka Ɓakuli pea amǝ Yahudi acau male a buia.
3Mǝsǝcau ka, aɓea ɓwana aɓalǝia ka à kpata cau mala Ɓakuli kǝla mǝnana à bang ama à nǝ̀ pak ka ɗang. Sǝ ɗwanyi kpata cau malea kâ, nggaɗi domǝsǝcau mala Ɓakuli le? 4Ko bǝti! Sǝ ɓǝ̀ koyan ngga mǝ'nyir na ka, Ɓakuli ka mǝ'mǝsǝcau na. Kǝla mǝnana Malǝmce bang ngga:
<<À nǝ̀ kúmǒ nǝ mǝsǝcau,
aɓa cau mana a na ka,
sǝ ɓǝà wulio ka,
a nǝ li ɓashi.>>#3:4 Ɓalli gbal aɓa: Ang 51:4.
5Sǝ ɓǝ̀ ɓealɓikea ma'sǝm kǝ lǝmdǝ cauɓoarna mala Ɓakuli ka, aman sǝ sǝm nǝ̀ na? Sǝm nǝ̀ na ama Ɓakuli pángŋǝ̀nà kpak, yì mǝnana ɓǝ̀ so bumlulla male amur sǝm ngga le? (Mǝnia ka nê mala ɓwapǝndǝa na.) 6Ko bǝti! Ɓǝ̀ Ɓakuli ka mǝ'cauɓoarna na raka, palang sǝ nǝ̀ karǝ pakki ɓanza ɓashi? 7Sǝ ɓǝ̀ ɓwa nǝ̀ gandǝ na ɗǝm ama, <<Palang sǝ Ɓakuli nǝ̀ ɓashiam ama mǝ nda mǝ'cauɓikea, yi mǝnana ɗwanyi na mǝsǝcau mema, lǝmdǝ mǝsǝcau male a banfana, sǝ kárǝì wi ɓoarɓwa mǝgule ka?>> 8Pǝlǝa aɓea ɓwana tsǝka sǝm cau, ama sǝm na ama, <<Lidǝmba ma'sǝm aɓa cauɓikea ka, nǝ̀ nggá yinǝ gir mǝɓoarne!>> Aɓwana mǝnana à na mǝnia yì cau ka, ɓoaro ɓǝa kasǝia wia ɓashi mǝnana karǝ a rǝia ka.
Ɓwapǝndǝa kat ka amǝ cauɓikea na
9Sǝm amǝ Yahudi ado ka, sǝm nǝ̀ ne ɓamur rǝ sǝm ama sǝm kútì acili aɓwana le? Awo, sǝm kútia ɗàng ko bǝti! Acemǝnana sǝm angŋǝna dǝmba sǝm lǝmdǝna ama ɓwapǝndǝa kat, amǝ Yahudi andǝ aɓwana mǝnana amǝ Yahudi na raka, à nda aɓata rǝcandǝa mala cauɓikea. 10Kǝla mǝnana Malǝmce na ka:
<<Kǝɓwa pà kàm mana
mǝ'cauɓoarna na ka ɗàng,
ko kǝɓwa mwashat
pà kàm ɗàng.
11Kǝɓwa pà kàm
nǝ́ sǝlǝe ɗàng,
kǝɓwa pà kàm mwashat
kǝ alta Ɓakuli ɗang.
12Yia kat ka à pǝlǝni
Ɓakuli nzǝmia;
yia kat ka à uena ɓà.
Kǝɓwa pà kàm mǝnana kǝ
pak gìr mǝɓoarne ka ɗàng,
ko ɓwa mwashat
pà kàm ɗàng.>>#3:12 Ɓalli gbal aɓa: Ang 14:1-3; 53:1-3.
13<<Acau malea ka
amǝɓike na,
kǝla rǝmban mǝnana
kǝ puro aɓa ɓembe
mana à gìrì raka.
Lasǝia ka lùmsǝ nǝ nyir.>>#3:13 Ɓalli gbal aɓa: Ang 5:9.
<<Barya mala n'yau
kǝ surkio a kunia.>>#3:13 Ɓalli gbal aɓa: Ang 140:3.
14<<Kunia lùmsǝ nǝ
súban andǝ nggaro-cau.>>#3:14 Ɓalli gbal aɓa: Ang 10:7.
15<<À kǝ̀ kaurǝa aban
sukki nkila.
16Kiɗiki andǝ bumkpǝmna ka,
nda ateà a koya ban.
17Yia ka à súrǝ̀ njar mala
dorǝpwala ɗang.>>#3:17 Ɓalli gbal aɓa: Isha 59:7-8.
18<<À pànǝ ɓangciu mala
Ɓakuli ɗang, ko bǝti.>>#3:18 Ɓalli gbal aɓa: Ang 36:1.
19Sǝm sǝlǝna ama gìr mǝnana kat Nggurcau na ka, nda aban ne aɓwana mǝnana à nda aɓata Nggurcau ka, ace mǝnana ɓǝ̀ ɓwa ɓǝ̀ kǝa kum kún nacau ɗàng, sǝ ɓanza kat ka à nǝ̀ yinǝi a ɓadǝm ɓashi mala Ɓakuli. 20Kǝ ɓwa pà kàm nǝ̀ duk mǝ'cauɓoarna a ɓadǝm Ɓakuli acemǝnana bwal Nggurcau ka ɗàng. Gìr mǝnana Nggurcau pakki ka, nda lǝmdǝa sǝm ulang do cauɓikea ma'sǝm.#3:20 Ɓalli gbal aɓa: Ang 143:2; Gal 2:16.
Kǝrǝsti twalǝna atanni ma'sǝm
21Sǝ a dyan ngga Ɓakuli lǝmdǝna njargula mǝnana aɓwana nǝ̀ duk amǝɓoarne a baní nǝi ka, pa atārǝia andǝ pak gìr mǝnana Nggurcau bang ngga ɗàng, kǝla mǝnana Nggurcau mala Musa andǝ amǝ'ɓangnǝa mala Ɓakuli nakún amurí ɗiɗyal ka. 22À nǝ̀ pǝlǝ sǝm, sǝm nǝ̀ duk amǝ'cauɓoarna aban Ɓakuli ace paɓamur sǝm aban Yesu Kǝrǝsti. Mǝnia ka anggo sǝ pa nǝ koyana mǝnana paɓamuri aban Kǝrǝsti ka, tàrban pa kàm ɗàng.#3:22 Ɓalli gbal aɓa: Gal 2:16. 23Acemǝnana koyan ngga pàngŋǝ̀nà cauɓikea, sǝm kat ka sǝm gattì doɓoarɓwa mala Ɓakuli#3:23 sǝm gattì doɓoarɓwa mala Ɓakuli ko <<sǝm nda kuko nǝ bancame mǝɓoarɓwe mala Ɓakuli mana kasǝa ace kum amsǝban ngga.>>. 24Kat andǝ amani ka, Ɓakuli nǝ ɓwamuru male#3:24 Ɓakuli nǝ ɓwamuru male ko: Ɓakuli nǝ ɓwamuru male, mǝnana mbwegìr pà arǝì raka., nyesǝ sǝm, sǝm duk amǝ'cauɓoarna. Yì ka, pak mǝnia ka nǝ bu Kǝrǝsti Yesu, mǝnana akmúr sǝm ngga. 25Ɓakuli pa Yesu ɓǝ̀ sukki nkile ace mǝnana nǝ mǝno ka, aɓwana nǝ̀ kum twalban cauɓikea. Aɓwana mǝnana à paɓamuria aban Yesu ama pà yilǝmi, sukki nkile acea ka, Ɓakuli nyesǝnia amǝ'cauɓoarna na a baní. Mǝnia yì nkila à sukki ka, lǝmdǝ ama Ɓakuli ka mǝ'cauɓoarna na, acemǝnana arǝ anza mǝnana ɗiɗyal ka, pàk munyi nǝ aɓwana, tsǝkir ce acauɓikea malea ɗàng. 26Pak mǝnia ka ace lǝmdǝ do mǝsǝcau male a nza mǝnia adyan ngga, ace mǝnana yì nǝ ɓamúrì ka, ɓǝ̀ duk mǝ mǝsǝcau, sǝ nǝ̀ tsǝk amǝ'cauɓikea mǝnana kat à pà ɓamuria aban Yesu ka, ɓǝà duk amǝ'cauɓoarna a baní.#3:26 ɓǝà duk amǝ'cauɓoarna a baní: Ko <<ɓǝà esǝki acauɓikea malea mǝnana à ramba amúrià ka, ɓǝà kum akban a baní.>>
27Sǝm nǝ̀ nggori ado ama sǝm pàngŋǝ̀nà kǝgìr mǝnana tsǝa sǝ Ɓakuli ak sǝm ngga le? Awo, nggori pà kàm ɗang! Sǝ́ nda ace mana sǝ Ɓakuli ak sǝm? Nda acemǝnana sǝm kpata Nggurcau male ka le? Awo! Ɓakuli ak sǝm acemǝnana sǝm earnǝi, sǝm pa ɓamur sǝm aban Kǝrǝsti ka. 28Ace mani ka, sǝm duk amǝ'cauɓoarna aban Ɓakuli acemǝnana sǝm pa ɓamur sǝm ngga, pa ace bwal Nggurcau ɗàng. 29Sǝ ana raka, Ɓakuli ka, mala amǝ Yahudi na nǝmurǝia le? Yì ka, Ɓakuli mala acili anzali na kat gbal re? E, nda acea. 30Sǝ acemǝnana Ɓakuli ka nda mwashat amur aɓwana kat ka, kǝ tsǝk aɓwana ɓǝà pǝlǝ amǝ'cauɓoarna, yi mana ɓǝà pà ɓamuria aban Kǝrǝsti ka, ko amǝ Yahudi, ko aɓwana mǝnana amǝ Yahudi na raka.#3:30 Ɓalli gbal aɓa: Nggur 6:4; Gal 3:20. 31Sǝ acemǝnana sǝm dàrrìna arǝ pa ɓamuru aban Kǝrǝsti ka, lǝmdǝ ama Nggurcau ka sǝm turni le? Awo, ko bǝti! Aɓa mǝsǝcau ka, sǝm puna anzǝm Nggurcau.
©️2022 The Seed Company