2 Amurǝm 19
19
Hezekiya alta kwarkiru a ban mǝɓangnǝa Ishaya
(Ishaya 37:1-13)
1Lang Murǝm Hezekiya ok mǝnia yì cau ka, sàn daura rǝì sǝ oasǝ daura-doatú,#19:1 daura-doatú ko asanginagìr sǝ o a Ɓala mala Yahweh. 2Túr Eliyakim ɓwamǝgule-palta, andǝ Shepna mǝgilǝgir andǝ aɓwana-mǝgule mala apǝris, mǝnana yià gbal ka à oasǝ adaura-doatú arǝia ka, ɓǝà kyan nǝ cau mǝnia ka aban mǝɓangnǝa Ishaya, muna-ɓwabura mala Amoz ama: 3<<Mǝnia ka nda cau mǝnana Hezekiya bang ngga ama: <Pwari man yalung ngga, pwari kwanban na, pwari gimban na, sǝ pwari kyauwikiban na. Sǝm nda kǝla ɓwama mǝnana malanǝ̀ gbáshí, sǝ rǝcandǝa mala gbáshí-muna pa kàm raka. 4Earka Yahweh Ɓakuli mô nǝ̀ ok acau mala Ɓwamǝgule-lwa, mǝnana mǝtala-ɓala male murǝm Assuriya túrí ɓǝ̀ yi soabum Ɓakuli mǝyilǝmui nǝia ka, sǝ nǝ̀ gimbi ace acau mǝnana nea ka. Acemani ka, pakhiwi ace cili sǝm mǝnana sǝm ue nǝyilǝmu ka.> >>
5Lang amǝtúró-ɓadǝm Hezekiya wari aban Ishaya ka, 6Ishaya banggia wia ama, <<Wu banggi mǝtala-ɓala ma'wun mǝnia yì cau ka ama: <Mǝnia ka nda cau mǝnana Yahweh na ka: Cè ɓangciu pàkkô arǝ acauɓana mǝnana a oea a kún amuna-ɓala mala murǝm Assuriya, mǝnana à nea arǝàm ngga ɗàng. 7Mim nǝ nggearam ngga, mǝ nǝ tsǝk ɓekǝ bangŋo a ɓālǝi, mǝnana nǝ̀ ok na'ongŋale mana nǝ̀ tsǝì nǝ̀ nyar a nzali male ka. Mǝ nǝ tsǝa à nǝ̀ wal-luí aɓa nzali male nǝ nggeabyau.> >>
Nabura mala Senakerip arǝ Yahweh
(Ishaya 37:8-20)
8Lang Ɓwamǝgule-lwa mala Assuriya ok ama murǝm mala Assuriya longŋǝni nggea-là Lakish ka, pǝlǝa nyare o, sǝ kya kum murǝm male ka nda aɓa lwa arǝ nggea-là Libna. 9Zuku anzǝm mǝno ka, Senakerip, murǝm mala Assuriya ok cau ama Tirhaka murǝm mala Kush na a njar aban yiu nǝ munǝo arǝì. Pǝlǝa tasǝ amǝ'na-túrbân ɗǝm aban Hezekiya murǝm Yahuda ama, 10<<Wu ne Hezekiya murǝm Yahuda mǝnia yì cau ka: <Kǝa earî Ɓakuli mô mǝnana a gūlì arǝì ka ɓǝ̀ swarkio ama <<Urǝshalima pà nǝ̀ kpa a ɓabu murǝm mala Assuriya raka ɗàng.>> 11We nǝ nggearǝo ka a ongŋǝnace gìr mǝnana murǝm Assuriya pangnǝ anzali mǝnana kat kiɗikia kat-kat ka; a kǝ sǝni kǝla a nda mǝnana awu nǝ au ka le? 12Anzali mǝnana akêm kiɗikia, yì anzali Gozan, andǝ Haran, andǝ Rezep, andǝ amǝ Iden mǝnana à kya do a Tel-Asar ka, aɓakuli malea amsǝia le? 13Murǝm mala Hamat, andǝ mala Arpat, andǝ mala Layir, andǝ murǝm mala nggea-là Sefarvayim, andǝ Hena, sǝ Ivva ka, à nda ke?> >>
Hiwi mala Hezekiya
(Ishaya 37:14-20)
14Hezekiya ak cautera mǝno a bu amǝ'na-túrbân, sǝ lang ɓalni ka, pǝlǝa wari a ɓala mala Yahweh sǝ sárǝí aɓadǝm Yahweh. 15Sǝ Hezekiya pakhiwi aban Yahweh ama, <<We Yahweh, Ɓakuli mala Isǝrayila, mǝnana do amur bunomurǝm amur aCerup ka! We nǝmurǝo a nda Ɓakuli mala adomurǝm mala ɓanza kat. A nda mǝnana a pak kuli andǝ nzali ka. 16We Yahweh, kwakikiro sǝ wu ó. Mǝn amǝsǝo, Yahweh, sǝ wu sǝni. Ok acau mala Senakerip, mǝnana turaban nǝi ace soabum Ɓakuli mǝyilǝmui ka! 17Mǝsǝcau, Yahweh, amurǝma mala Assuriya kiɗikina aɓwapǝndǝa andǝ anzali malea, 18sǝ à pisǝna aɓakuli malea a bǝsa; à kiɗikia acemǝnana amǝno ka aɓakuli na ɗang; atúróbù mala ɓwapǝndǝa na mǝnana à pea nǝ nggun andǝ tali ka. 19Sǝama ado ka, Yahweh Ɓakuli ma'sǝm, amsǝ sǝm a ɓabui, ace mǝnana adomurǝm mala ɓanza kat ɓǝà sǝlǝa ama, we nǝmurǝo, Yahweh, a nda Ɓakuli.>>
Nyesǝcau mala Ɓakuli nǝ kún Ishaya mǝɓangnǝa
(Ishaya 37:21-35)
20Pǝlǝa Ishaya muna-ɓwabura mala Amoz túrban nǝ cau mǝnia ka aban Hezekiya ama: <<Yahweh Ɓakuli mala Isǝrayila bang ama: <Ən ongŋǝna hiwi mǝnana wu pè abanam, amur Senakerip murǝm mala Assuriya ka.> 21Mǝnia ka, nda cau mǝnana Yahweh bang amurí ka:
<<Nsari ɓoarnsarile Siyona kǝ ɓǝsǝkio,
kǝ oalǒ;
Ɓoarnsarile Urǝshalima kǝ dǝurǝ múrí arǝò!
22Yana a soabumi sǝ a namǝɓane arǝì?
Yana a loasǝi wi gio,
sǝ yana a twani nǝ twalkirǝu?
A nda arǝ Mǝfele mala Isǝrayila!
23Nǝ kún amǝ'na-túrbân mô a soabum Mǝtalabangŋo;
a na ama:
<Nǝ awaru-pǝr mem mǝ'làkke
ǝn eauna amur ankono mǝ'dāhre,
ǝn warina arǝ ankanggariban mala Lebano.
Ən makkina anggun-seda mǝ'dāh'rike male,
andǝ anggun-sapǝre mǝɓoarne-katkat male.
Ən kutikina arǝ agíríban mala bando male,
yì patal mala ndà-nggun pusǝ aɓǝlagir male.
24Ən tǝmgina atūli-mùr aɓalǝ abǝri-nzali,
sǝ ǝn nuna mùr arǝ abanì.
Nǝ ɓakusǝam ǝn sonzǝ amyal-múr mala Masar kat.>
25Sǝama a ok mbak?
Twal a pwarian ǝn kwakì.
Ɓara-ɓara ǝn kanì,
sǝ ado ka ǝn yinanǝi ɓǝ̀ yi lùmsǝó,
ama nǝ̀ pà aɓa rǝcandǝa mò,
wu nyesǝ akanggǝrang anggea-là
ɓǝà pǝlǝ agigi mala atali.
26Aɓwana mana aɓalǝia ka,
à nǝ̀ ɗwanyi rǝcandǝa,
sǝ acemani ka,
ɓangciu nǝ̀ bwalia
sǝ múrià nǝ̀ zurì.
À nǝ̀ yauwi kǝla agirpwala mala ɓawan,
kǝla lolloapì bondo mǝpwale;
sǝ kǝla bondo a múr-kurǝm,
mǝnana kaniama nǝ̀ gul ka,
gùngpi mala ɓá pǝɗanban pisǝni, imǝna ka.
27Ən súrǝ́nàrǝ lo mô andǝ do mô,#19:27 lo mô andǝ do mô kǝla mana aɓa: Isha 37:27 .
puro mô andǝ kutio mô,
andǝ bumlulla mô arǝàm.
28Sǝ acemǝnana a pak-bumlulla arǝàm,
sǝ twalɓamurǝu mô yina a kiram ngga,
mǝ nǝ kwárǒ nǝ nli mem a lullǝo
sǝ mǝ nǝ oasǝo nggwiandan mem a kuno
sǝ mǝ nǝ nyesǝo
a njar mǝnana a yiu kam ngga.
29<<Sǝ we Hezekiya ka, mǝnia ka, nda nǝ̀ duk gir'lǝmdǝa a bano ka:
<<Aɓa pǝlǝa mǝnia ka, wun nǝ̀ lì gìr
mǝnana pur atàrǝì a ɓaban
à ɓeali-nǝ-ɓeale raka,
sǝ a ɓaria pǝlǝa ka,
gìr mǝnana tò nǝ nggearǝì aɓa mǝno ka.
Sǝama a tàruià pǝlǝa ka, wu ɓealɓeale
sǝ wu pwan gir-ɓaban;
wu pandǝki anggun-anap
aɓalǝ aɓaban-anap sǝ wu lì ɓǝlea.
30Aɓwana mǝnana à auwa
sǝ à ueo a ɓala mala Yahuda ka,
à nǝ̀ soa nlerǝia a nzali ɗǝm,
sǝ à nǝ̀ pusǝ ɓǝlea a kuli.#19:30 à nǝ̀ soa nlerǝia a nzali ɗǝm, sǝ à nǝ̀ pusǝ ɓǝlea a kuli ko <<à nǝ̀ hangǝli, sǝ à nǝ̀ ɓǝl amuna pas.>>
31Acemǝnana aɓwana na kam mǝnana à ue ka
à nǝ̀ lo aɓa Urǝshalima,
aɓwana mǝnana à au ka,
à nǝ̀ pur a Nkono Siyona.
Ɓabumpina mala Yahweh nǝ̀ pàk mani.
32<<Acemani ka, mǝnia nda cau mala Yahweh amur murǝm mala Assuriya ama:
<< <Pà nǝ̀ kùtí aɓa nggea-là mǝnia,
ko nǝ̀ túr mundi kam ɗàng.
Pà nǝ̀ yiu arǝì nǝ ntongŋo,
ko nǝ̀ ɓak mgbangban arǝ sheran male
ace eau amurí ka ɗàng.
33Njar mǝnana yiu nǝi ka,
nda nǝ̀ nyar nǝi ka.
Pà nǝ̀ kùtí aɓa nggea-là man ɗang.
Mim Yahweh ka mǝ nǝ̀ ne.
34Mǝ nǝ duk ntongŋo amur mǝnia yì nggea-là ka,
ace amsǝe, ace lullǝam
sǝ ace guro mem Dauda.> >>
35Aɓa du mǝno ka, mǝturonjar mala Yahweh puro wari a kàttì mala amǝ'lwa mala amǝ'Assuriya, wal-lú aɓwana á-gbǝman-mwashat nǝ á-lumi-tongno-nong-tàrú-bwamdǝ-tongno (185,000). Ban fana nǝ dǝmbari ka, à sǝn alú aban bwamdǝo a koya ban. 36Nda sǝ Senakerip murǝm mala Assuriya, nyare o a là, kya do a Nineva ka. 37Sǝ lang nda aban peri aban ɓakuli male Nisrok ka, amuna-burana male Adǝramelek andǝ Shareza wal-luí nǝ nggeabyau, sǝ à ɓangŋa à o a nzali Ararat, sǝ muna-ɓwabura male Esarhadon duk murǝm a bancame male.
Currently Selected:
2 Amurǝm 19: mbu
Highlight
Copy
Compare
Share
Want to have your highlights saved across all your devices? Sign up or sign in
©️2022 The Seed Company
