2 Amurǝm 12
12
Jehohash duk murǝm a Yahuda
(2 Acau la Apwari 24:1-16)
1Nda aɓa tongno-nong-ɓaria pǝlǝa mala do-bunomurǝm mala Jehu murǝm Isǝrayila sǝ Jehohash#12:1 Jehohash ka, ɓè njar mala gilǝ lullǝ <<Johash>> na. duk murǝm Yahuda, sǝ yálmúr aɓwana a Urǝshalima apǝlǝa lumi-ine. Lullǝ ngge nda Zibiya ɓwama Biyasheba. 2Jehohash pàk gìr mǝnana pwasǝbum Yahweh ka aɓa do-yilǝmu male kat kǝla mǝnana Jehoyada pǝris kàni wi ka. 3Kat andǝ amani ka, amgbangban-peri atà ankúl ka, à kiɗikia ɗàng; amǝ Isǝrayila lidǝmba nǝ ká pà gìr'nkila andǝ aɓoro amur amgbangban-peri atà ankúl.
4Jehohash banggi apǝris ama, <<Dumǝna púp wun nǝ̀ aki aboalo mǝnana kat aɓwe kǝ yinǝia ace paɓoro mǝfele a ɓala mala Yahweh ka. Wu ea andǝ aboalo mǝnana kat à kasǝî koya ɓwa mana à ɓalli ɓǝ̀ pà ka, andǝ aboalo mana aɓwana pà, nǝ eare mala ɓabum ngga. 5Koyan atà apǝris ka, ɓǝ̀ ak aboale a bù aɓwana mǝnana à súrǝì ka. Sǝ dumǝna púp ɓǝà pàktúró nǝi ace gilǝki ban mǝnana kat à sǝni kìɗìkì arǝ ɓala mala Yahweh ka.>>
6Sǝama yi bik lumi-ɓari-nong-tàruià pǝlǝa mala do-bunomurǝm mala Jehohash ka, apǝris tita pàk ɓekǝ túró gilǝki ɓalae ɗàng. 7Acemani ka, murǝm Jehohash tunǝ Jehoyada pǝris, andǝ acili apǝris sǝ ɗia ama, <<Palang sǝ wu pa aban gilǝki abân mǝnana à kìɗìkì arǝ ɓala mala Yahweh ka ɗàng? Ado ka, wu kǝa nyare wu bwal boalo mǝnana wu ak a bù aɓwana mǝnana à súrǝ̀ wun ngga ɗàng. Dumǝna púp wun nǝ̀ pà aboale ace gilǝki ɓala mala Yahweh.>> 8Nda apǝris ear ama à pà nǝ̀ ak boalo a bù aɓwe ɗǝm ɗàng, sǝ yia ɗǝm ngga à ear ama ɓǝ̀ aɓea aɓwana ak túró gilǝki ɓala mala Yahweh.
9Pǝlǝa Jehoyada pǝris twal akwati-kpamgbang sǝ tusǝ tūli amur gírkuní, sǝ kya tsǝì atà bu-mǝli mala gyangŋan, tù nǝ bankutio a ɓala mala Yahweh. Apǝris mǝnana à camyale a kún bankutio ka, à tsǝk aboalo mǝnana kat aɓwe yinǝia a ɓala mala Yahweh ka aɓalǝi. 10Pwari mǝnana kat à sǝni ama akwatinî lùmsǝ̀nà nǝ boalo ka, mǝgilǝgir mala murǝm andǝ pǝris mǝgule nǝ̀ ɓal boalo mǝnana à yinanǝi a ɓala mala Yahweh ka, sǝ à nǝ̀ kùrki aɓalǝ aluru. 11Pǝlǝa à nǝ̀ pa boalo mǝnana à kārǝkina dǝmbǝrya male ka, a bù aɓwana mǝnana à tsǝia ace sǝntà-túrô ɓala mala Yahweh ka, ace mǝnana ɓǝà mbwe ka amǝ'ɓǎ andǝ amǝ'gbàlì-gìr mana à pàk túrô a ɓala mala Yahweh ka, 12andǝ amǝ'ɓakɓa-tali, andǝ amǝ'ɓun-tali. À pàktúró nǝ boale gbal ace kúrki agbǝlang-nggea'nggun andǝ atali mǝnana à kpalikinia ka, ace gilǝki abân mǝnana à kìɗìkì arǝ ɓala mala Yahweh ka, andǝ mbwegìr ace acili atúró mǝnana kat à peǎ mala gilǝki ɓalae ka. 13Sǝama à pàktúró nǝ boalo mǝnana à yinǝi a ɓala mala Yahweh ka ace pàk ankenye, andǝ amǝmyal, andǝ atasau, andǝ agàgàtú, ko ɓekǝ tanggǝla mala bolo-njengǝlan ko bolo-azǝrfa ɗang; 14à pà boale a ɓabu amǝ'túró mǝnana à pàktúró nǝi ace gilǝki ɓala mala Yahweh ka. 15À ɗice kǝ bǝlɓacau mala aboalo a ban aɓwana mǝnana à pea wia boalo a buia ace mbwe ka amǝ'túró ka ɗàng, acemǝnana à kǝ pàktúró nǝ mǝsǝcau. 16Aboalo mǝnana aɓwe pa kǝla pàgir mala mbwegìr ace kumcau, #12:16 Ɓalli aɓa: Pǝris 5:15,18 . ko pàgir ace cauɓikea #12:16 Ɓalli aɓa: Pǝris 4:24,29 . ka, à yinǝia a ɓala mala Yahweh ɗàng; mala apǝris na.
17A bàkú mǝno ka, Hazayel murǝm Suriya lo wari nǝ munǝo arǝ nggea-là Gat sǝ e. Pǝlǝa tsǝk múrí nǝ̀ kánǝ munǝo arǝ Urǝshalima. 18Ace mgbàllì mǝno ka, Jehohash murǝm Yahuda pwan aɓoro mǝfele mǝnana kat akê Jehoshafat, andǝ Jehoram, andǝ tárrí Ahaziya, amurǝma mala Yahuda angŋa-dǝmba à pània aban Yahweh ka. Kpapia andǝ agir mǝfele mǝnana yì nǝnggearǝì angŋa-dǝmba pània aban Yahweh, andǝ bolo-njengǝlan mǝnana kat à kumi aɓalǝ andà-tsǝk agir-ɓoarna mala ɓala mala Yahweh, andǝ mala ɓala-murǝm ngga, sǝ túrban nǝ amǝnia yì agir ka aban Hazayel murǝm Suriya; nda sǝ Hazayel nyarnanǝte, yiu arǝ Urǝshalima raka.
Lú mala Jehohash
19Acili agir mǝnana à kumban a do-bunomurǝm mala Jehohash andǝ agir mǝnana kat pàkkia ka, à nda kam a gilǝe aɓa Malǝmce mala Acau-ɓaraɓara mala Amurǝma mala Yahuda. 20Amǝtè lo à kùrkunia amurí sǝ à wal-lú Jehohash a Bet-Millo, amur njar ká a Sila. 21Amǝtè mǝnana à wal-luí ka, à nda ka Jozakar muna-ɓwabura mala Shimeyat andǝ Jehozabat muna-ɓwabura mala Shoma. À tsǝklú Jehohash a ɓembe-ɓa-tali mala akê a nggea-là mala Dauda. Muna-ɓwabura male Amaziya duk murǝm a bancame male.
Currently Selected:
2 Amurǝm 12: mbu
Highlight
Copy
Compare
Share
Want to have your highlights saved across all your devices? Sign up or sign in
©️2022 The Seed Company
