1 Amurǝm 2
2
Kwarkiru mǝnana Dauda kwarkir muni Solomon ngga
1Lang pwari lú mala Dauda gbàshìnà ka, tunǝ muni Solomon sǝ pe wi mǝnia yì kwarkiru ka, ama: 2<<Mǝ ndo mǝ nǝ o a ban mǝnana koya ɓwa a ɓanza nǝ̀ u kam ngga. #2:2 Ɓalli gbal aɓa Jes 1:6-7.Kum ɓabumcandǝa, sǝ wu lǝmdǝ ɓamuro kǝla ɓwabura-ɓwa. 3Tsǝkiro arǝ pàk gìr mǝnana Yahweh Ɓakuli mô tsǝkô ama wu pe ka. Gya arǝ anjar male, sǝ wu kpata akwarkiru andǝ anê male, bwal anzongcau andǝ anggurcau male kǝla mǝnana à gilǝì aɓa Nggurcau mala Musa ka. Anggo sǝ awu nǝ̀ kum lidǝmba aɓa koman kat a pakkiyi ka andǝ ban mǝnana kat awu nǝ̀ ká kam ngga. 4Ɓǝ̀ a kpata cau mala Yahweh ka, nǝ̀ lùmsǝ pàcau male mǝnana pam ama: <Ɓǝ̀ amunio tsǝkiria arǝ do malea, sǝ à kpatam aɓa mǝsǝcau nǝ ɓabumia andǝ yilǝmia kat ka, a pà wunǝ ɗwanyi mwashat ateà mǝnana nǝ̀ do amur buno-murǝm mala Isǝrayila ka ɗàng.>
5<<Ɗǝm ngga, a ndanǝ sǝlǝe mala gìr mǝnana Jowap muna-ɓwabura mala Zeruya pakkam ngga; yì gir mǝnana pakki amǝ'sàrǝ̀ban ɓari mala amǝ'lwa mala Isǝrayila ka, yià Abǝna muna-ɓwabura mala Ner andǝ Amasa muna-ɓwabura mala Jeta, mǝnana wal-luia ace mbwegìr-akúnì nkila mǝnana à sukki aɓa lwa, a bàkú mala dorǝpwala ka, sǝ nǝ dé-nkila mǝno ka, pǝndǝkina nggur-ɓunu mǝnana a taɓuni ka andǝ ankura mǝnana a kusǝi ka. 6Pàkki wi kǝla mǝnana sǝlǝe mò lǝmdǝo ka, sǝama kǝa ɗeki ɓǝ̀ wù aɓa rǝpwala a ě male ɗàng.
7<<Sǝ lǝmdǝì amuna-burana mala #2:7 Ɓalli gbal aɓa 2Sam 19:31-38.Barzilayi ɓwa'Gilǝya pěmǝɓoarne. Nyia ɓǝà pa aɓalǝ aɓwana mǝnana à nǝ̀ nggǝ li girlina amur kpamgbang-ligirlina mô ka, acemǝnana nda anggo sǝ à yiu ace bwalam-nggam lang mǝ ndaban ɓanggi mǝ'eambo Absalom ngga.
8<<Sǝ ɗǝm ngga, cè ɓalǝo lorǝ Shimeyi muna-ɓwabura mala Gera, yì ɓwa tàu mala Benjami a là Bahurim ɗàng. Yì nda mǝnana suem nǝ ɓikina suban, a pwari mǝno ǝn wari a #2:8 Ɓalli gbal aɓa 2Sam 17:24.Mahanayim ngga. Kat andǝ amani ama, lang yiu ace kúlliam a Nggeasala Jodan ngga, ǝn kánbi wi nǝ lullǝ Yahweh ama, <Mǝ pà mǝ nǝ wal-luio nǝ nggeabyau raka,> 9adyan ngga, kǝa ɗeki ɓǝ̀ uɓà ɗàng. We ka, a nda ɓwa mǝ'kwarè. Awu nǝ súrǝ̀ gir mǝnana ɓoaro wu pakki wi ka, sǝ awu nǝ tasǝte a ɓembe nǝ sukki nkile aɓa ě male.>>
Lú mala Dauda
10Pǝlǝa Dauda paklú, sǝ à tsǝkbani a Urǝshalima, yì Nggea-là mala Dauda. 11Dauda yálmúr Isǝrayila apǝlǝa lumi-ine (40); apǝlǝa tongno-nong-ɓari (7) a Hebǝron, sǝ apǝlǝa lumi-tàrú nǝ mǝsǝi tàrú (33) a Urǝshalima. 12Nda Solomon do amur buno-murǝm mala tárrí Dauda, sǝ domurǝm male kum kusǝu-came kàngkàng.
Lú mala Adonija
13A ɓè pwari ka, Adonija mǝnana nggè nda Haggit ka, wari aban Basheba nggea Solomon. Basheba ɗì ama, <<A yiu jam le?>>
Adonija eari wi ama, <<E, ǝn yiu jam.>> 14Pǝlǝa Adonija na ama, <<Mǝ ndanǝ ɓè cau mǝnana ǝn nggǝ earce banggo ka.>>
Basheba ne wi ama, <<Na cê.>>
15Adonija ne wi ama, <<A sǝlǝna ama domurǝm ngga mema, sǝ Isǝrayila kat ka tsǝkɓalǝi arǝàm ama mǝ duk murǝm. Sǝama, agir nggaɗi, nda domurǝm nyare a bù mǝkyauwem ngga, acemǝnana anggo sǝ pur nǝban Yahweh ama yì ka ɓǝ̀ duk murǝm. 16Ado ka, mǝ ndanǝ zǝmba mwashat aban ká bano. Kǝa giram nǝi ɗàng.>>
Basheba eari wi ama, <<Nacau.>>
17Pǝlǝa Adonija bang ama, <<Ida, ne Murǝm Solomon ɓǝ̀ pam Abishag ɓwama Shunam ɓǝ̀ duk māmám. Yì murǝm ngga, pa nǝ̀ ɓinǝ ɗàng.>>
18Basheba eari wi ama, <<Ndanǝ ɓoaro, mǝ nǝ nacau nǝ murǝm aceo.>>
19Lang Basheba wari aban Murǝm Solomon ace nacau nǝi a kúnì Adonija ka, murǝm lo ace gingsǝe, sǝ ɓunbi wi. Pǝlǝa dumnǝdo amur buno-murǝm male, sǝ bang ama ɓǝà yinǝ buno ace nggè, sǝ nggè do a buì mǝli.
20Pǝlǝa Basheba bang ama, <<Mǝ ndanǝ zǝmba bǝti a bano; kǝa giram nǝi ɗàng.>>
Murǝm eari wi ama, <<Nâ, banggam cê, mǝ nǝ pàkkô girnì.>>
21Nda Basheba ne wi ama, <<Ɓǝà pè Adonija mǝ'eambǝo, Abishag ɓwama Shunam ɓǝ̀ duk māmí.>>
22Murǝm Solomon earî nggè ama, <<Palang sǝ a zǝm Abishag ɓwama Shunem ace Adonija? Zǝmbi wi domurǝm gbal, acemǝnana yì ka mǝgulem ma, sǝ Abiyata pǝris andǝ Jowap muna-ɓwabura mala Zeruya ka, à nda atè!>>
23Pǝlǝa Murǝm Solomon kángir nǝ Yahweh ama, <<Ɓǝ̀ Ɓakuli ɓashiàm sǝ yale ɓǝ̀ ɓǝsǝlǝi kǝ̀rkǝ́r, ɓǝ̀ mǝnia yì zǝmba ka, nunbi Adonija lú male raka! 24Sǝ ado ka, kǝla mǝnana Yahweh nakam nǝyilǝmu, yì mǝnana tamsǝna-kusǝam kàngkàng, sǝ dumsǝnam amur buno-murǝm mala tárrám Dauda, sǝ tsǝ̀ngŋǝ̀nà nggurkwar mem dumǝna tau-murǝm, kǝla mǝnana pàcau ka, dumǝna púp ama Adonija ka, à nǝ̀ wal-luí yalung!>> 25Nda Murǝm Solomon tasǝ Benaya muna-ɓwabura mala Jehoyada, sǝ wario kya zuɓi Adonija wal-luí.
26Sǝ murǝm ne Abiyata pǝris ama, <<Nyare o a Anatot là mò, a nzali mô. A karǝna ɓǝà wal-luio, sǝama pa mǝ nǝ wal-luio adyan ɗàng, #2:26 Ɓalli gbal aɓa: 1Sam 23:6; 2Sam 15:24; 2Sam 15:29.acemǝnana wun nda mǝnana wu twalkiyi Akwati Kùrcau mala Yahweh Ɓakuli aɓadǝm tárrám Dauda, sǝ acemǝnana a nda atà tárrám aɓalǝ atanni male kat ka.>> 27Nda Solomon pǝr Abiyata a túró-pǝris mala Yahweh ka. Sǝ mǝno ka lumsǝ #2:27 Ɓalli aɓa: 1Sam 2:27-36.cau mala Yahweh, mǝnana Yahweh ne a Shilo amur ɓala [nggurkwar] mala Eli ka.
28Lang Jowap ok cè gir mǝnana kum Adonija ka, kara ɓangŋa wari a Tara mǝfele mala Yahweh, kya bwal anjawe gyangŋan. Mǝno ka nda acemǝnana Jowap pu'nzǝm Adonija, sǝama pu'nzǝm Absalom ɗàng. 29À banggi Murǝm Solomon ama Jowap ɓangŋǝna warina a Tara mala Yahweh, sǝ nda a nkanggari gyangŋan. Pǝlǝa Solomon tasǝ Benaya muna-ɓwabura mala Jehoyada ama, <<Kyane, kya wal-luí!>>
30Nda Benaya wari aɓa Tara mala Yahweh, sǝ ne Jowap ama, <<Murǝm na ama wu puro.>>
Sǝ Jowap eari wi ama, <<Awo, mǝ nǝ wù kani.>>
Benaya nyare wari aban murǝm sǝ banggi wi cau mǝnana Jowap na ka.
31Pǝlǝa murǝm ne Benaya ama, <<Pàk kǝla mǝnana na ka. Wal-luí sǝ wu tsǝî. Anggo sǝ bafe mala nkila mǝnana Jowap sukki ɓà ka, nǝ̀ upi muram andǝ múr ɓala mala tárrám. 32Yahweh nǝ̀ mbweki wi a kúnì nkila mǝnana sukki ka, acemǝnana pà nǝ sǝlǝe mala tárrám Dauda ɗàng, wal-lú aburana ɓari nǝ nggeabyau, yià Abǝna muna-ɓwabura mala Ner, mǝ'sàrǝ̀ban mala amǝ'lwa mala Isǝrayila andǝ Amasa muna-ɓwabura mala Jeta, mǝ'sàrǝ̀ban mala amǝ'lwa mala Yahuda, aburana mǝnana à kútì nǝ cauɓoarna andǝ ɓoaro ka. 33Ɓǝ̀ bafe mala nkila malea nyar amur Jowap andǝ amǝ'ke tàtǝ́k. Sǝama amur Dauda andǝ nggurkwar male, andǝ ɓala male andǝ buno-murǝm male ka, ɓǝ̀ dorǝpwala pà kam nǝban Yahweh tàtǝ́k.>>
34Pǝlǝa Benaya muna-ɓwabura mala Jehoyada wari aban gyangŋan sǝ zuɓi Jowap, wal-luí. À tsǝkbani a ɓala male a pǝɗanban. 35Murǝm twal Benaya muna-ɓwabura mala Jehoyada ɓǝ̀ duk mǝ'sàrǝ̀ban amur amǝ'lwa a kúnì Jowap, sǝ murǝm tsǝk Zadok pǝris ɓǝ̀ ak bancame mala Abiyata.
36Pǝlǝa murǝm túrban ɓǝà tunǝ Shimeyi, sǝ banggi wi ama, <<Ɓakkî ɓamúrò ɓala a Urǝshalima, sǝ wu duk kam. Sǝama kǝa purì banì ace ká a ɓekǝ ban ɗàng. 37Pwari mǝnana a nying Urǝshalima sǝ a yálì Ɓangŋaban Kidǝron ngga, sǝlǝ ama mbak-kàngkàng awu nǝ̀ wǔ, sǝ nkila mò nǝ̀ ueo amuro.>>
38Shimeyi eari murǝm ama, <<Cau mǝnana a bang ngga mǝɓoarne na. Guro mò nǝ̀ pak kǝla mǝnana ɓwamǝgule mem murǝm na ka.>> Nda Shimeyi do a Urǝshalima anonggio pas ka.
39Sǝama anzǝm apǝlǝa tàrú ka, aguro mala Shimeyi ɓari ɓangŋa à o aban Akish muna-ɓwabura mala Ma'aka, murǝm Gat. Sǝ lang à banggi Shimeyi ama, <<Aguro mò na a Gat>> ka, 40Shimeyi lo sǝ tsǝki mǝdambǝriso male gir-do a nzǝmi, sǝ o a Gat a ban Akish ace alta aguro male. Shimeyi puro wari a Gat kya nyesǝ aguro male.
41Lang à banggi Solomon ama Shimeyi nyingŋǝna Urǝshalima, warina a Gat sǝ nyarna ka, 42murǝm túrban à tunǝ Shimeyi sǝ ne wi ama, <<Ən tsǝo a kángir nǝ lullǝ Yahweh, sǝ ǝn nunkiro nǝma, <A pwari mǝnana a nying Urǝshalima sǝ a o akǝ ban ngga, mbak-kàngkàng awu nǝ wù> re? Sǝ we ka, a banggam ama, <Cau mǝnana a bang ngga mǝɓoarne na. Mǝ nǝ kpate.> 43Palang ado, sǝ a par kángir-nǝ-pàcau mǝnana a kána aɓa lullǝ Yahweh, sǝ a kpata cau mǝnana ǝn tsǝko nzongcau arǝì ka ɗàng?>>
44Murǝm nyare ne Shimeyi ama, <<A sǝlǝna a ɓabumo yì ɓealɓikea mǝnana kat a pakkì tárrám Dauda ka. Adyan ngga, Yahweh nǝ̀ nyesǝô ɓealɓikea mô amuro. 45Sǝ Yahweh ka nǝ̀ tsǝkam bù, sǝ buno-murǝm mala Dauda nǝ̀ kum kusǝu-came pepè aɓadǝm Yahweh tàtǝ́k.>>
46Pǝlǝa murǝm pe Benaya muna-ɓwabura mala Jehoyada nzongcau, nda Benaya puro wario kya wal-lú Shimeyi ka.
Adyan ngga, domurǝm kumǝna kusǝu-came kàngkàng a bù Solomon.
Currently Selected:
1 Amurǝm 2: mbu
Highlight
Copy
Compare
Share
Want to have your highlights saved across all your devices? Sign up or sign in
©️2022 The Seed Company
