Римчилерге 14

Бот-боттарыңарны буруу шаппаңар

1 # Рим. 15:1; 1 Кор. 8:9-11; 9:22Бүзүрели кошкак кижини хүлээп алыңар, ооң үзел-бодалдарының дугайында маргылдаа үндүрбеңер. 2# Дан. 1:12; 1 Тим. 4:3Бир кижи кандыг-даа чемни чип боор деп санаар, а оон өске, бүзүрели кошкак кижи чүгле ногаа аймаа чиир.#14:2 Чамдык христианнар базаарга эът садып аарындан коргарлар, чүге дээрге ону дүрзү-бурганнарга өргээн бооп болур турган (1 Кор. 8 эгени көр). 3# Кол. 2:16Кандыг-даа чемни чип турар кижи чем бүрүзүн чивес кижини куду көрбезин. Чем бүрүзүн чивес кижи база кандыг-даа чемни чип турар кижини буруу шаппазын. Чүге дээрге Бурган иелдириңерни хүлээп алган-дыр. 4# Мф. 7:1; Иак. 4:11Өскениң чалчазын буруу шавар кандыг ындыг эргелиг сен? Ол бут кырында турар бе азы кээп ушкан бе дээрзин ооң Ээзи боду шиитпирлезин. Ол дөмей-ле бут кырынга туруп кээр, чүге дээрге Дээрги-Чаяакчы ону тургузуптар эргелиг.

5 # Гал. 4:10; Кол. 2:16Кандыг-бир хүннү өске хүнден чугула деп санаар кижи туруп боор. Өске кижиге ол хүннерде ылгал чок. Кижи бүрүзү бодунуң угаап билген аайы-биле кылгай аан. 6# Мф. 15:36 || 1 Кор. 10:30-31Кандыг-бир хүннү онзалай көөр кижи ону Дээрги-Чаяакчыга алдар-хүндү болдуруп, ынчап турар, а шупту чемни чиир кижи ону Дээрги-Чаяакчыга алдар-хүндү болдуруп, чиир, чүге дээрге аъш-чем дээш Бурганга өөрүп четтирер болгай. Чем бүрүзүн чивес кижи Дээрги-Чаяакчыга алдар-хүндү болдуруп, чивезин, чүге дээрге ол база Бурганга өөрүп четтирер-дир.

7 # Рим. 6:2, 7; Гал. 5:24; Кол. 3:3Бистиң кайывыс-даа чүгле боду дээш амыдыравас база чүгле боду дээш өлбес болгай. 8# 1 Пет. 4:2; Гал. 2:20 || 2 Кор. 5:15; Флп. 1:20Амыдыраар болзувусса, Дээрги-Чаяакчы дээш амыдыраар бис, өлүр болзувусса, база-ла Дээрги-Чаяакчы дээш өлүр бис. Амыдыраар-даа, өлүр-даа болзувусса, Дээрги-Чаяакчының улузу боор бис. 9# 1 Фес. 5:10Христос база ол сорулга-биле өлгеш, ооң соонда катап дирилген болгай. Ол өлүг-даа, дириг-даа улустуң Дээргизи болуксаан.

10 # Мф. 7:1; Лк. 6:37 || 2 Кор. 5:10А сен чүге бүзүрээн акыңны буруу шаап турар сен? Азы сен? Чүге бүзүрээн дуңмаңны куду көрүп турар сен? Бис шупту Бурганның шииткелиниң мурнунга турар болгай бис. 11# Иса. 49:18; Иер. 22:24 || Иса. 45:23; Флп. 2:10-11Бижилгеде мынча дээн болгай:

«Дириг Бодумнуң адым-биле даңгыраглап тур мен – деп, Дээрги-Чаяакчы медеглээн. – Дискек бүрүзү Мээң мурнумга сөгүрүп олурар, дыл бүрүзү Мени Бурган деп хүлээп көөр».

12 # Мф. 12:36; 25:19; Гал. 6:5Ынчангаш бистиң аравыстан кижи бүрүзү Бурганның мурнунга боду дээш боду харыы тудар.

Бот-боттарыңарны бачыт үүлгедиринче чыгаваңар

13 # Мф. 7:1Ынчаарга бот-боттарывысты буруу шаварын соксадыылы. Харын бүзүрээн ха-дуңмавысты тептигип кээп ужарынче азы күткүлгеге алзып аарынче чыгаар чүнү-даа кылбазын кичээнзивиссе эки. 14# Лев. 11:2; Ы. х. к. 14:3; Мк. 7:15-16; Аж.-ч. 10:15; 1 Кор. 8:8Мен билир база Дээрги Иисуска башкартканым ачызында, ыяк бүзүрээр мен: алыс боду арыг эвес чүү-даа чүве чок. Харын кижиниң арыг эвес деп санаар чүвези аңаа арыг эвес апаар. 15# 1 Кор. 8:11Ынчалза-даа кандыг-бир чем чигеш, бүзүрээн ха-дуңмаңның сеткилин хомудадып турар болзуңза, ынакшылдың аайы-биле амыдыравайн турар-дыр сен. Ындыг болганда, Христостуң ол дээш өлгени ха-дуңмаңны чемиң ужун өлүмче чыгава.

16Бодуңарны эки деп бодаар чүвеңер бак атка кирбес кылдыр ап чоруңар. 17# Кол. 2:16; Евр. 9:10 || Гал. 5:22Бурганның Чагыргазы – чиир чемге, ижер суксунга хамааржыр чүүлде эвес, а Ыдыктыг Сүлдениң хайырлаары актыг-шынныг амыдырал, амыр-тайбың болгаш өөрүшкүде. 18Христоска ол бүгү-биле бараан болган кижи Бурганның сеткилинге кирер болгаш улустуң хүндүлелин чаалап алыр.

19 # 2 Тим. 2:22Ынчангаш биске амыр-тайбыңны база удур-дедир деткимчени эккээр чүүлдерже чүткүүр ужурлуг бис. 20# Тит. 1:15 || 1 Кор. 8:9-13Бурганның ажыл-херээн чем дээш бууратпаңар. Кандыг-даа чем арыг, ынчалза-даа чип турар чемиң бүзүрээн ха-дуңмаңны бачытче киирер болза, багай-дыр. 21Ха-дуңмаңны ооң-биле бачытче чыгап турар болзуңза, эът чивээни база эзиртир суксун ишпээни дээре#14:21 Чамдык бүзүрээн улустуң эът чивес база арага ишпес чылдагааны – ол чем биле суксунну ооң мурнуу чарыында меге бурганнарга өргээн турган чадавас деп, оларның сезии боор (Дан. 1:8 көр)..

22Ол дугайында бүзүрээр чүвеңни чүгле иштиңде бодап чор, ону чүгле Бурган билир болзун. Үзел-бодалдарының аайы-биле бодун буруу шаппас кижи амыр-чыргалдыг боор. 23А чип боор ирги мен бе деп чигзинзе-даа, чип турар кижи буруу шаптырар, чүге дээрге бүзүрелиниң аайы-биле кылбаан-дыр. А бүзүрелдиң аайы-биле кылбайн турар бүгү чүүл – бачыт боор#14:23 Бо домактың соонда өске бурунгу сөзүглелдер 16-гы эгениң 25-27 домактарын киирип турар..

Currently Selected:

Римчилерге 14: Ы.Б.2025

Highlight

Copy