Левит 19
19
Бодун ыдыктыы-биле алдынарының дүрүм-хоойлузу
1Дээрги-Чаяакчы Моисейге мынча деп чугаалаан: 2# Лев. 11:44; Иис. 24:19; 1 Пет. 1:16«Израиль чоннуң бүгү ниитилелинге мону дамчыдып чугаала. Ыдыктыы-биле чурттаңар, чүге дээрге Дээрги-Чаяакчы Бурганыңар болур Мен ыдыктыг-дыр мен.
3 # Хост. 20:8-12Кижи бүрүзү бодунуң авазы биле ачазын хүндүлезин, Мээң доктаатканым амыр-дыш хүннерин сагызын. Мен – Дээрги-Чаяакчы Бурганыңар-дыр мен.
4 # Хост. 20:3-5; Ы. х. к. 5:8Хоозун дүрзү-бурганнарга мөгейбеңер, бодуңарга шуткаан бурганнар кылбаңар. Мен – Дээрги-Чаяакчы Бурганыңар-дыр мен.
5 # Лев. 7:16-18Эп-найырал өргүлүнүң малын Дээрги-Чаяакчыга дөгерип тура, ол Аңаа таарымчалыг болур кылдыр дөгериңер: 6өргүл кылган хүнүңерде азы дараазында хүнде ону чиир ужурлуг силер, а үшкү хүнде артып калган кезээн отка өрттедир херек. 7Өргүл малының үшкү хүнде арткан кезээн чиир болза, ол бужар чүүл болу бээр, ону чиири Бурганга таарымчалыг болбас. 8Ону үшкү хүнде чиир кижи бүрүзү буруузун боду чүктээр, чүге дээрге ол Дээрги-Чаяакчыга хамааржыр ыдык өргүлдү бужартадып турар-дыр, ындыг кижини чонунуң аразынга амылыг арттырбас.
9 # Лев. 23:22; Ы. х. к. 24:19; Руф 2:1-2Бодуңарның чериңерге дүжүт ажаап тура, шөлүңерниң кыдыын чедир ажаавайн, арттырып калыңар. Ажаап турар тарааңар черже кээп дүжер болза, чыгбаңар. 10# Руф 2:1, 15Виноград шөлүнде тараан виноградыңны бүрүнү-биле ажаава. Черже кээп дүшкен каттарны-даа чыгба: ядыыларга база өскээртен келген улуска арттырып каг. Мен – Дээрги-Чаяакчы Бурганыңар-дыр мен.
11 # Хост. 20:15; Лев. 6:2-3 || Эф. 4:25; Кол. 3:9Оорланмаңар, шын эвес чүүл чугаалаваңар, бот-боттарыңарны мегелевеңер. 12# Хост. 20:7; Ы. х. к. 5:11; Мал. 3:5Мегелеп тура, Мээң адым-биле даңгыраглаваңар: Бурганыңарның адын баксыратпаңар. Мен – Дээрги-Чаяакчы-дыр мен! 13# Ы. х. к. 24:14-15; Рим. 13:8Өске кижини кызып-кыйба, үптеп-тонава, хөлезилеттинген ажылчынга төлевир бээрин дүннү өттүр тудуп, эртенге чедир соңгаарлатпа. 14Дүлей кижини бак сөглеве, согурнуң мурнунга тептиге бээр моондак салба. Бурганыңдан коргуп чор. Мен – Дээрги-Чаяакчы-дыр мен!
15 # Хост. 23:2-3; Ы. х. к. 1:17Улусту чөптүг эвес шиитпе. Ядыы-ла кижи-дир дээш, аңаа чымчак болба, күш-шыдалдыг-ла кижи-дир дээш, ооң күзелин хандырарын бодава. Өске кижини шынның туружундан шиидип чор. 16# Хост. 23:1, 7; Ы. х. к. 27:25; 3 Хаан. 21:1-11Улус аразынга хоп-меге дажыглава. Буруу чок кижини шаажылап кагзын дээш, шииткел үндүрер үеде, меге херечилел кылба. Мен – Дээрги-Чаяакчы-дыр мен! 17# Мф. 18:15; Лк. 17:3Чүрээңге ха-дуңмаңга көөр хөөн чок чорук шыгжава. Чоок кижиңни эдип-чазап сурга, ынчан ол кижиниң хайы-биле бачыттыг болбас сен. 18# У. ч. 20:22 || 1 Хаан. 20:17; Мф. 5:43; 19:19; 22:39; Мк. 12:31; Лк. 10:27; Иак. 2:8; Рим. 13:9; Гал. 5:14Өжээн негеве, чонуңнуң улузунга удур бак сагыш шыгжава, харын чаныңда кижиге бодуңга бодуң дег ынак бол. Мен – Дээрги-Чаяакчы-дыр мен!
19 # Ы. х. к. 22:9Мээң дүрүмнеримни сагыңар. Малыңны өске ук-уксаалыг мал-биле эдериштирбе. Чаңгыс шөлге ийи янзы үрезин тарыва. Янзы-бүрү пөстер холуштур даараан хеп кетпе#19:19 Ыдыктыг чүүл кавызынга, сыр дедир, холушкак пөстерни саналдап турар. Ынчалдыр Ужуражылга майгынының адаккы шывыы болгаш көжегелерин лён база дүктен аргып кылган (Хост. 26:1, 31). База-ла ындыг холушкак пөстен дээди бараалгакчының эфодун, хөрек баартыгын болгаш курун кылган (Хост. 28:6, 15; 39:29)..
20Эр кижи-биле дүгдеп каан кул херээжен-биле хойгажыр өске кижи турган дижик. Бир эвес ол кул херээженни демги кижи амдыгаа чедир садып албаан азы хоставаан болза, оларның иелдирзин кезедир#19:20 Азы: «Ол херекти истеп-хынаар ужурлуг»., ынчалза-даа өлүмге онааштырбас ужурлуг, чүге дээрге ол херээжен хостуг эвес турган-дыр. 21Ол эр кижи кем-буруузу дээш өргүл кылдыр Ужуражылга майгынынче кирер черге Дээрги-Чаяакчыга кошкарны эккеп салзын. 22Бурганның бараалгакчызы кошкарны Дээрги-Чаяакчының мурнунга кем-буруу дээш өргүл кылдыр салгаш, бачыт үүлгеткен ол кижини арыглап каар. Ынчан демги кижи үүлгеткен бачыды дээш өршээл алыр.
23Келир үеде ээлээр чуртуңарже кире бергеш, кандыг-бир кат-чимистиг ыяш тарып кагзыңарза, ооң чимистерин чиири хоруглуг деп санаңар: оларны үш чыл дургузунда чивес ужурлуг. 24А дөрткү чылда ол ыяштың хамык чимистери Дээрги-Чаяакчыны алгап-мактаарынга херек ыдыктыг өргүл болур. 25Бешки чылда ооң хамык чимистерин чип болур силер база ооң силерге бээр чимистери өзүп-көвүдээр. Мен – Дээрги-Чаяакчы Бурганыңар-дыр мен!
26 # Э. д. 9:4; Лев. 3:17; 7:26; 17:10; Ы. х. к. 12:23-24; Аж.-ч. 15:20, 29 || Ы. х. к. 18:10Ханныг эът чивеңер; канчаар-даа болза илби кылып, төлгелевеңер.
27 # Лев. 21:5Бажыңарның кыдыын долгандыр дөңгүретпеңер, салыңарның кыдыгларын таартпаңар. 28# Лев. 21:5; Ы. х. к. 14:1Өлген улус дээш кажыыдап, мага-бодуңарны чара кеспеңер база шыйбактаваңар, эът-кежиңерге кадап будаан бижимелдер кылбаңар#19:27-28 Үстүнде айыткан ёзулалдар ол үениң дүрзү-бурганнарга чүдүүр улузунуң шажынчы ёзулалдары бооп чадавас (3 Хаан. 18:28; Иер. 16:6; 41:5 көр).. Мен – Дээрги-Чаяакчы-дыр мен!
29 # Ы. х. к. 23:17Бодуңнуң урууңну самыын-садарынче албадава, оон башка чурттуң чону самыыралга алзып алыр база чуртту бузут-бактыг херектер бүргей аптар.
30 # Лев. 26:2Мээң доктаатканым амыр-дыш хүннерин сагыңар, Мээң ыдыктыг черимни хүндүлеңер. Мен – Дээрги-Чаяакчы-дыр мен!
31 # Хост. 22:18; Ы. х. к. 18:11; 1 Хаан. 28:7Өлүг улустуң сүнезиннерин кый дээр-даа, караң көрнүр-даа улуска барбаңар, арга-сүме айтырбаңар. Бодуңарны олардан бужартаарынга чедирбеңер. Мен – Дээрги-Чаяакчы Бурганыңар-дыр мен!
32 # У. ч. 20:29Буурул баштыг кижиниң мурнунга туруп кел, улуг назылыг улусту хүндүле. Бурганыңдан коргуп чор. Мен – Дээрги-Чаяакчы-дыр мен!
33 # Хост. 22:21Силерниң чериңерге чурттай берген даштыкы кижини кызып-кыйба. 34# Хост. 12:49; Лев. 24:22; Сан. 15:16; Ы. х. к. 10:19Араңарда чурттай берген өскээртен келген кижи силерге үндезин чурттакчы ышкаш болзун: аңаа бодуңга дег ынак бол, чүге дээрге силер база египет черге өскээртен келген улус бооп чораан болгай силер. Мен – Дээрги-Чаяакчы Бурганыңар-дыр мен!
35Чөптүг эвес болбаңар, хемчээп болгаш деңзилеп тура-даа, шын эвес кылбаңар. 36# Ы. х. к. 25:13; У. ч. 11:1; 20:10; Иез. 45:10Силерниң деңзилээр деңзиңер, килдериңер, төктүүчел база суук чүүлдер хемчээр саваларыңар шын хемчээр болзун. Мен дээрге силерни египет черден үндүре берген Дээрги-Чаяакчы Бурганыңар-дыр мен.
37Мээң бүгү дүрүмнерим болгаш хоойлуларымны сагып, күүседиңер. Мен – Дээрги-Чаяакчы-дыр мен!»
Currently Selected:
Левит 19: Ы.Б.2025
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2025
