Ажыл-чорудулга 14

Павел биле Варнава Иконияда

1 # Аж.-ч. 13:5Иконияга Павел биле Варнава, өске черлерге кылып турганы дег, иудей синагогаже киргеш, барымдаалыы кончуг кылдыр суртаалдаарга, дыка хөй иудейлер база өске чоннар улузу бүзүрей бергеннер. 2Ындыг-даа болза, бүзүревейн барган иудейлер өске чоннар улузунга христианнарны бактап, нүгүлдээш, оларга удур ыдалапканнар. 3# Аж.-ч. 4:30; Эф. 6:19Павел биле Варнава аңаа элээн үр үеде артып калгаш, Бодунуң авыралын херечилеп, элчиннерниң холу-биле кайгамчык демдектер кылып турган Дээрги-Чаяакчының дугайында дидими-биле медеглеп келгеннер. 4# Мф. 10:34; Лк. 12:51Хоорайның чурттакчылары ийи үстү берген: чамдыызы иудейлерни, а өскелери элчиннерни деткээн. 5Өске чоннар улузу болгаш иудейлер боттарының даргалары-биле кады элчиннерге удур сүлчээлежип, оларга хора чедирер деп база оларны даш-биле соккулап каар деп барганнар. 6# Мф. 10:23А элчиннер ону билип кааш, Ликаонияның Листра биле Дервия деп хоорайларынче база оларның чоок-кавызынче дезип чоруй барганнар. 7Олар аңаа Буянныг Медээни нептередирин уламчылааннар.

Павел биле Варнава Листрада

8 # Аж.-ч. 3:2Листра хоорайга төрүмелинден бертик, кажан-даа кылаштап көрбээн, буттары бастынмас кижи турган. 9# Мф. 9:2Павел улусту өөредип турда, ол кижи база дыңнап олурган. Павел топтап көргеш, ол кижиде экирип болгу дег бүзүрел барын көрүп каан. 10# Иса. 35:6; Аж.-ч. 3:8Павел ыыткыр үн-биле: «Саң дорт туруп кел!»#14:10 Өске бурунгу сөзүглелдерде бо сөстерге «Дээрги Иисус Христостуң ады-биле сеңээ чугаалап тур мен» деп сөстерни немээн. – дээн. Бертик кижи тура халааш, кылаштап эгелээн.

11 # Аж.-ч. 28:6Улус Павелдиң чүнү кылганын көрүп кааш, ликаон дылга: «Кижи хевирлиг апарган бурганнар бисче бадып келди!» – деп алгыржып эгелээн. 12Олар Варнаваны Зевс деп, а хөй кезиинде чугааланып турган Павелди Гермес#14:12 Зевс – бурунгу грек шажын-чүдүлгеде кол бурган. Гермес – айбычы бурган. деп адап алганнар. 13# Дан. 2:46Хоорай даштында Зевс бурганның өргээзи бар чүве-дир. Ооң бараалгакчызы хоорай хаалгазынга бугалар биле өрээн дүрүг чечектер эккелгеш, чон-биле кады элчиннерге өргүл кылыр деп барган.

14 # Сан. 14:6; Мк. 14:63Варнава биле Павел ону дыңнап кааш, муңгараанындан идик-хевин ора соп каапкаш, чон аразынче кире халааш, алгыржы бергеннер: 15# Хост. 20:11 || 1 Фес. 1:9«Улус-чон! Бо канчап бардыңар? Силер-биле дөмей кижилер-дир бис! Силерге Буянныг Медээ медеглеп келдивис. Бо хоозун дүрзү-бурганнарны каапкаш, дээрниң, черниң, далайның база оларда бар бүгү чүвениң Чаяакчызы, дириг Бурганче эглириңерни күзеп тур бис. 16# Мих. 4:5Эрткен үе-шагда Бурган чон бүрүзүнге бодунуң оруу-биле чоруурун чөпшээрээн. 17# Лев. 26:4; Мф. 5:45 || Ыд. ыр. 103:15Ынчалза-даа буянныг ажыл-херээн кылып, Бодунуң дугайында үргүлчү херечилеп келген: Ол силерге дээрден чаъсты болгаш дүжүткүр өйде дүжүттү берип, а ол ышкаш аъш-чемни силерге хайырлап база чүректериңерни өөрүшкү-биле долдуруп келген». 18Олар ындыг сөстер-биле безин чонну оларга өргүл кылырындан арай боорда доктаатканнар#14:18 Өске бурунгу сөзүглелдерде бо сөстерге «Болгаш бажыңнарынче чана бээр кылдыр бүзүредип алганнар» деп сөстерни немээн..

19 # 2 Кор. 11:25Ынчалза-даа Писидияда Антиохия болгаш Икониядан иудейлер келгеш, чонну элчиннерге удур кылдыр чайгылдырыпканнар#14:19 Өске бурунгу сөзүглелдерде бо сөстерге «Элчиннер дидими-биле суртаалдап турда, иудейлер „Оларның чугаазында шын чүве чок, шуптузу меге-дир“ деп тургаш, чонну оларны каапкаш баар кылдыр бүзүредип алганнар» деп сөстерни немээн.. Түңнелинде олар Павелче халдай бергеш, ону даш-биле соп эгелээннер. Оон ону өлген деп бодааш, хоорайдан үндүр сөөртүп каапканнар. 20А кажан Антиохияда бүзүрээннер ооң чанынга чыглып кээрге, ол туруп келгеш, дедир хоорайже чоруй барган. А даартазында хүндүс ол Варнава-биле кады Дервияже чорупкан.

Элчиннерниң Сирияда Антиохияже ээп келгени

21Олар Буянныг Медээни Дервияга суртаалдааш, хөй өөреникчилерлиг апарганнар. А оон Листра, Икония база Писидияда Антиохияже ээп келгеннер. 22# Кол. 1:23 || Ин. 15:20; 1 Пет. 2:21; 5:9; 1 Фес. 3:3; 2 Тим. 3:12Аңаа олар өөреникчилерин быжыктырып, бүзүрели чайгылыш чок болур кылдыр сорук киирип: «Бис Бурганның Чагыргазынче кирерде, хөй хилинчекти көрүп эртер ужурлуг бис» – деп турганнар. 23# Аж.-ч. 13:2 || Аж.-ч. 20:32Павел биле Варнава чаа христиан ниитилел бүрүзүнге удуртукчулар томуйлааш, мөргүп, шээрленген соонда, Дээрги-Чаяакчыга бүзүрээн улусту Ооң авыралынга хүлээдип бергеннер.

24Элчиннер оон чоруткаш, Писидияны таварып эрткеш, Памфилияга келгеннер. 25Оон Пергияга суртаалдап дооскаш, Атталия хоорайже бада бергеннер. 26# Аж.-ч. 13:3А оон боттарының ам эчизинге чедирип кааны ажыл-чорудулгазын кылыр дээш, Бурганның авыралы-биле оортан айбылаттырганы хоорай – Сирияда Антиохияже эжиндирип чорупканнар. 27Олар дедир ээп келгеш, христиан ниитилелди чыггаш, Бурганның оларны дамчыштыр кылган бүгү ажыл-херээниң дугайында база Ооң өске чоннар улузунга бүзүрелдиң оруун канчаар изээнин чугаалап бергеннер. 28Оон олар Иисуска бүзүрээн улус-биле кады аңаа элээн үе дургузунда турганнар.

Currently Selected:

Ажыл-чорудулга 14: Ы.Б.2025

Highlight

Copy