Romans 9
9
Tupua ma na kano fenua
1Kuou e kau munakina, kuou o Christ, ma kuou si see tataangutu. Toku atamai e takina e te Mauri Tapu o Tupua e faka tonu sia fokia kuou si see tataangutu 2vasia kuou e muna atu: Ko toku fatu manava e maatea rei i te arofa ma te isu e tao ia kuou 3ki toku kano fenua, toku tino ma toku toto maori! Taku fai maanatu ake rei kuou ke faka mavaea ria ma ke motu sia mai ia Christ mo te laoi oratou. 4Koratou te kano fenua maori o Tupua, ku faka tama ria e Tupua, ma ku faka saa kia ratou na taurekareka; ma ana tongi sanga, ma ke sori kiei koa Fono ma te faka turoro maori; ma a tongi o Tupua; 5koratou e afu mai ratou puna faka Hebrew; ma Christ ne faka tino tangata i aratou afu. Ko Tupua te uru oa nea kaatoa, ke faka rausapai riaina i nga vasia katoa! E tonu.
6Kuou si see muna koa tongi a Tupua ku tooara; faina siei te kano fenua kaatoa o Israel te kano fenua patino o Tupua. 7Siei fokia koratou kaatoa ne afu mai a Abraham koa tama a Tupua. Kae tonu ia, Tupua ne muna atu kia Abraham, “Ia Isaac ko kee ka fai ou afu pea kuou ne tongi atu kia kee.” 8I take atamai: a tamariki e faanau i te riu ara o te faanau, siei a tama a Tupua, kae a tamariki e faanau i te tongi a Tupua e fai pea afu maori o Abraham. 9Maina te tongi a Tupua ku faia ia taranga nei, “I te vasia tonu kuou ka foki mai, ko Sarah ku fai tama tangata.”
10Siei fuarei konei, kae a tamariki a Rebecca rau mmana sokotasi, tatou puna ko Isaac. 11Maina te maasanga siki faka faanau pe ne fai fekauaki pe nia e laoi pe e pariki, ke naa tautari ke patino ko te atamai o Tupua, 12siei ke tautari kia fainga fekau, kae kia Tupua ku faka ari o muna atu kia Rebecca, “Te uru ka seka ma te tee.” 13Fakapera pe te Pepa Tapu e nai munakina,
“Kuou e fakapere kia Jacob,
kae kuou e kivimata kia Esau.”
14Tera nia ma tatou ka mmuna: Ko Tupua si see fai fai tonu? Siei rei nakoia! 15Maina koia ne muna atu kia Moses,
“Kuou ka manava arofa pe koai ma kuou e fifia kiei.
Kuou ka fakapere pe koai ma kuou e fifia kiei.”
16Ka tera a nea kaatoa si se naa tautari ki fifia o tangata ke fai, kae fuarei ki te arofa o Tupua. 17Maina te Pepa Tapu e muna kia Pharaoh, te tii o Egypt,
“Kuou ne kau faia ko kee ke nofo te tii kia atamai nei,
ke kau faka saa ria toku makeke ia kee
ma toku ingoa ke iroa ina ia taangata kaatoa.”
18Kae, tera, ko Tupua e nai arofa tia pe koai ma e fifia kiei, kae koia e nai faka seke atamai ria pe koai ma e fifia kiei.
Te teke o Tupua ma na manava arofa
19Se tangata ia kotou ka muna mai kia kuou, “Sea natafito ko Tupua e fai faka peinei, e faka fefea koia ka ma fai ke nai tukuakina kia kotatou?! Koai rei ka ma fai ke nai tookai ria ko te fifia o Tupua?” 20Kae koai ko kee, soavaka ee, ke tongoi ki Tupua?! Te umu fatu se ne fesiri ki tangata ne pena ia koia, “Sea natafito ko kee ne fai mai kuou faka peinei?” 21Kae arei, te tangata e pena ia umu fatu, koia e fai tana tonu ke nai pena ria koa umu fatu e rua mai te fatu kere sokotasi: take umu kia aso lasi, ma take umu kia aso vare.
22Ta tera e tonu fuarei pe nia ma Tupua ne fai. Koia ne faka tuu ke faka saa ko na teke, ma ke fai ko na makeke ke iroa ina. Kae koia ku faka suku suku ma te kaataki maatea rei ki te kano fenua e teke kiei, koratou ku pena ki ratou faka pariki tia ranga. 23Ma koia ku faka tuu ke iroa ina ko te taufenua o na taurekareka ki te kano fenua e arofa kiei, iei ku nai pena ria i mua ki na taurekareka. 24Maina kotatou ko te taufenua ku nai karanga tia, siei fuarei mai nga Jew, kae fokia mai nga Gentile. 25Tera pe ne munakina e Tupua i te Pepa a Hosea:
“Kuou ka karanga kia ratou ‘Toku Kano fenua’,
koratou see noko fai toku kano fenua;
ma te fenua kuou see noko fakapere kiei,
ka kau karanga tia kia ratou, ‘Taku Pere rei’.
26Ma i te ngangea rei koratou ku faka aria iei,
‘Kotou siei toku kano fenua,’
koratou ka atia ‘A tama a te Tupua ora’.”
27Ma ko Isaiah ne nai faka atetea ria ki nga Israel:
“Maafa rei onia ko te kano fenua o Israel e maatea sapa rei pe te one o vaevae tai,
kae see toka rava fuarei ka faka saofia.
28Maina te Ariki ka nai faka toko toko laoi ria ko tana fakataunga kia taangata kaatoa.”
29Fakapera rei pe a Isaiah ku nai munakina i mua:
“Kae pe Tupua te Uru o te Mana see nai tukuna mai ko ni afu mo tatou,
kotatou ku faia ke fai pe nga Sodom ma nga Gomorrah.”
Israel ma te Rongo Laoi
30Tera sea ma tatou ka mmuna? Ko nga Gentile, koratou si se ne ma fai ke faka tonusia maso koratou ma Tupua, ka faka tonusia ma koia i aratou fakatonu. 31Kae ko nga Israel, koratou ku faara kia fono koratou ke faka tonusia ma Tupua, si se ne ratou maua ria. 32Natafito sea e siei? Faina pe nia ma ratou ku fai, si see kave ia paanaki, kae kave ia fainga fekau. Ta tera koratou e raavea i te “fatu mafuri furi”. 33Pe tusia riaina i te Pepa Tapu:
“Pula, kuou e faka teka ko te fatu i Zion, ka nai faka raavea tia koratou,
te mato ka nai faka soroa koratou ki raro.
Kae pe koai e fakatonu kiei,
ka si see faia ria ke faka maa.”
Currently Selected:
Romans 9: TKP
Highlight
Copy
Compare
Share
Want to have your highlights saved across all your devices? Sign up or sign in
© 2025 Wycliffe Bible Translators, Inc.