Romans 6
6
Tamatea ia sara kae faka orangia i te soko ranga kia Christ
1Nia ma tatou ka mmuna kiei? Kotatou ke fai fai sara arei, tera ko te roto laoi o Tupua ke ato arei ki mua? 2Siei rei nakoia! Kotatou ku tamatea ia sara, ta tatou ka fare arei i te sara?! 3Ea si see kotou iroa ina i vasia kotatou ku faka uku riaina o soko kia Jesus Christ, kotatou ne faka uku riaina i na mate ranga?! 4#Col 2.12.Tera ia tatou faka uku anga, kotatou ku tanumia ma koia, ma ne kau i na mate, ia fakapera rei, pea Christ ku faka masike riaina mai i te mate i te makeke taurekareka o te Mmana, tera fokia kotatou ke ma fare i te ora foou.
5Ta tera kotatou ku taanaki fangatasi ma koia i na mate ranga, ia riu ara sokotasi kotatou ka taanaki fangatasi ma koia i na masike mai ranga ki te ora. 6Tatou iroa ina tatou tukunga tuei ku tamatea riaina ma Christ i na tuki ranga i fongo raakau, tera ko te makeke oa sara o tatou tino faka taangata ke fai pariki tia, ma kotatou ka see lupea riaina ia sara. 7Maina vasia te tangata e mate iei, koia ku sao mai te makeke o te sara. 8Faina kotatou ku tamatea ma Christ, tera kotatou e fakatonu fokia kotatou ka ora ma koia. 9Maina ku tatou iroa ina ko Christ ku faka masike riaina mai te mate, ma ka see tamatea riaina rei foki, tera te mate ka si se nai ariki tiaina koia. 10Maina koia ne faka mate, koia ne tamatea kia sara faka sokotasi fuarei. Ma te ora koia e nai nofo ria, te ora ki Tupua. 11Ia riu ara sokotasi, kotou ke maanatu maso kotou pe ne tamatea kia sara, kae e ora ki Tupua ia faka piki anga ma Jesus Christ.
12Tera ka see tuku koa sara ke nai takina otou tino faka taangata, kae ka see tuku ki te fifia o te tino. 13Ka see tukuna rei ko se ngangea i otou fongo tino kia sara ke fai fekauaki kia tukunga pariki. Kae tonu ia, tuku maso kotou ki Tupua pe nga taangata ku aumai ina mai te mate ke ora, ma ke tuku maso kotou ke fai fekauaki kia tukunga tonu. 14Ko te sara ka see tuku ke nai ariki tiaina kotou, faina ku kotou nofo riaina i araro o te roto laoi o Tupua, kae siei ia raro oa Fono.
A seka o te tonu tuu
15Tera sea rei? Kotatou ka fare arei ia sara, faina tatou see fare ia raro oa Fono, kae ia raro o te roto laoi o Tupua? Siei rei nakoia! 16E tonu rei kotou iroa ina, totou vasia e sori maso kotou ki take tangata ke tautari kiei, kotou e seka ki te tangata e tautari kiei. Kotou e ma fai ke seka kia sara, iei e nai takina kotou ki te mate, pe kotou e ma fai ke tautari ki Tupua, iei e nai takina kotou ke tukuna tonu ki Tupua. 17Kae tangi faka ue ue ki Tupua! Ko kotou noko seka ia sara i vasia i mua, kae kotou ku tautari motou fatu manava katoa rei kia fakaako ranga maori ku soria atu kia kotou. 18Kotou ku faka atea riaina mai ia sara, ma ku faia kotou ke seka ki te tonu tuu.
19(Kuou e araara faka taangata, faina kotou e losi i otou tino faka taangata.) I vasia i mua kotou noko fai o sori otou fongo tino ke seka kia tukunga kere kere ma kia tukunga pariki. Ia riu ara sokotasi, i vasia nei sori kotou ke seka maso kotou kia tukunga tonu tuu ma kia tukunga tapu.
20Vasia kotou noko seka kia sara, kotou ku atetea mai te tonu tuu. 21Nia ne kotou maua riaina ia nea ne kotou faia, koa nea ku faka maa iei i vasia nei? Te faka suku suku ranga oa nea nei te mate! 22Kae vasia nei kotou ku atetea mai ia sara ma ku faia ke seka ki Tupua. Otou ngangea laoi e fai i vasia nei e nai takina ki te fakatapu ki Tupua, ma te faka suku suku ranga, te ora mau. 23Maina te sara e faka suku suku riaina ki te mate, kae te sori a Tupua ko te ora mau ia faka piki anga ma Jesus Christ tatou Ariki.
Currently Selected:
Romans 6: TKP
Highlight
Copy
Compare
Share
Want to have your highlights saved across all your devices? Sign up or sign in
© 2025 Wycliffe Bible Translators, Inc.