Romans 16
16
Te arofa e faka oko atu
1Kuou e faka patino atu kia kotou tatou kave ko Phoebe, koia te seka o te rotu i Cenchreae. 2Kuou e kaisi atu kia kotou, sau koia i te ingoa o te Ariki pe e fetau fangatasi ki te kano fenua o Tupua, ma ke sosoa kotou kiei ia ngangea e fifia kiei, faina koia ne nai soakina kuou ma te kano fenua kaatoa.
3 #
Act 18.2. Kuou e mmori koa faka afe kia Priscilla ma Aquila, oku kau fai fekau ia Jesus Christ; 4koraua ne sori rei koa rau ora kia kuou. Kuou e faka puu kia koraua, siei fuarei kuou, kae ko te kano rotu kaatoa o nga Gentile fokia. 5Te arofa e maatea fokia ki te kano rotu e taanaki i rau paito.
Te arofa e maatea ki toku soavaka ko Epaenetus, koia te mataki tangata ne tafuri mai ki te rotu i te motu ngangea i Asia ke fakatonu kia Christ. 6Te arofa e maatea kia Mary, koia ne fai fekau maatea rei kia kotou. 7Te arofa e maatea fokia kia Andronicus ma Junia, a foi Jew koraua e fakkiro ma kuou. Koraua e iroa laoi rei e te kau fai fekau ma koraua ne mua soko kia Christ ma kuou.
8Te arofa e maatea kia Ampliatus, toku soavaka i te Ariki. 9Te arofa e maatea kia Urbanus, maua e fai fekau kia fainga fekau a Christ, ma kia Stachys toku soavaka. 10Te arofa e maatea kia Apelles, tana fai maatea kia Christ ne nai faka tonusia. Te arofa e maatea kia ratou te kanoa paito o Aristobulus. 11Te arofa e maatea kia Herodion, te foi Jew ma kia taina ku soko kia Christ i te kanoa paito o Narcissus.
12Taku arofa e maatea kia Tryphaena ma Tryphosa, koraua ko nga faafine e fai fekau ia fainga fekau a te Ariki, ma ki toku soavaka ko Persis, koia ne fai fekau maatea ki te Ariki. 13#Mak 15.21.Kuou e mmori atu taku faka afe maatea kia Rufus, koia e nai iroa laoi rei koa fainga fekau a te Ariki, ma ki na nana, koia ne nai faia mau kuou pe te tama. 14Te arofa e maatea kia Asynchritus, Phlegon, Hermes, Patrobas, Hermas, ma rake taina te rotu kaatoa rei ma koratou. 15Te arofa e maatea kia Philologus, ma Julia, kia Nereus ma na kave, kia Olympas ma te kano fenua kaatoa o Tupua e fare koratou.
16Fe arofa taki ki roto ma te feesongi tapu maori. Te kano rotu kaatoa o Christ e mmori atu kia kotou ko aratou arofa maatea.
A tee taufau ranga
17Kuou e kaisi atu kia kotou, taina ma ee: faka matakite kia ratou e ratou vaevaea, ma e fai pariki ia fakatonu o te kano fenua. E ratou fakapoua koa fakaako ranga ku kotou saua ria. Faka mavae kese ma koratou. 18Maina koratou e fai koa nea faka peeraa, si see fai fekau ma tatou Ariki ko Christ, kae fai ki aratou kee fifia ia. I aratou taranga laoi e faka kara e ratou lelesia riaina ko te kano fenua siei rei ni sara ma ratou. 19Faoa kaatoa ku fakarongo ki otou tautari anga ki te Rongo Laoi, ma natafito ia atamai nei, kuou e vaki vaki maatea kia kotou. Kuou e fifia kia kotou ke purotu ia nea e laoi, kae ke tangata laoi ia nea e pariki. 20Ma Tupua, te fakkau o te roto mafora, ka nai tafakina ko Satan ki otou rafi vae.
Te roto laoi o tatou Ariki Jesus ke naa ia kotou.
21 #
Act 16.1. Timothy toku foi faoa fai fekau e mmori atu ko tana faka afe kia kotou, ma tera fokia ko Lucius, Jason, ma Sosipater, oku foi faoa faka Jew.
22Kuou ko Tertius ne tusi te leta nei, e mmori atu taku faka afe kia kotou i te Ariki.
23 #
Act 19.29; 1 Cor 1.14; 2 Tim 4.20. Ko Gaius e mmori atu kia kotou ko na arofa maatea. Koia toku foi tangata i na paito te kano rotu e taanaki kiei. Ko Erastus koia te fakatonu anga oa fatu o te noforanga, ma tatou taina ko Quartus e mmori atu ko rau arofa maatea kia kotou.
24[Te roto laoi o tatou Ariki Jesus Christ ke naa ia kotou kaatoa. E tonu!]
Te faka suku suku anga o te rotu rausapai
25Tatou faka taurekareka ki Tupua! Koia e ma fai ke kotou turaki mau i otou paanaki, tautari ki te Rongo Laoi o Jesus Christ e kau tuufakina, ma e tautari ki te faka sasa anga o te faka fufu anga maori, iei noko funa riaina mai i mua rei. 26Kae i vasia nei, ku aumai ina ki tua ke atetea ko te tonu tuu ia tusi tusi ranga a nga ʻprophetʼ, ma ia taufau ranga a te Tupua e Ora mau ku faia ke iroa ina ki nga turaurau kaatoa, tera te kanoa fenua kaatoa rei ke fakatonu ma ke tautari.
27Ki te Tupua sokotasi, koia fuarei e purotu kaatoa, ke faka taurekareka ia Jesus Christ i nga vasia katoa!
E tonu!
Currently Selected:
Romans 16: TKP
Highlight
Copy
Compare
Share
Want to have your highlights saved across all your devices? Sign up or sign in
© 2025 Wycliffe Bible Translators, Inc.