Luke 22
22
Te tau purenga ke tamate ko Jesus
(Mat 26.1–5; Mak 14.1–2; Jon 11.45–53)
1Te vasia ku piri piri ki te Kai kai oa Preti ne Tao Fua Fuarei, e ati te Kai kai o te Faka sara anga. 2Nga ariki fai kava, ma nga fakaako oa Fono, ku sakiri ko ni riu ara faka leku leku ke tamate ko Jesus, natafito koratou e faka mataku taku ki te kano fenua.
Judas e fifia ke sori ko Jesus
(Mat 26.14–16; Mak 14.10–11)
3Tera ko Satan ne uru kia Judas, e ati ko Iscariot, koia take tangata i te kau fanonga e tino angafuru ma rua. 4Tera ko Judas ne poi o muna atu ki nga ariki fai kava, ma nga fakarongo ranga e reo i te Paito Tapu, ke sakiri ko ni riu ara ke sori ko Jesus kia ratou. 5Koratou ku maatea rei ratou vaki vaki, ma ne fifia ke tauvi koia kia mane. 6Judas ku fifia, tera fakatafito arei o ono ono ki se vasia laoi mo ona ke nai soria ko Jesus kia ratou, kae see iroa ina e te kano fenua.
Jesus e pena ke kai te Kai kai o te Faka sara anga
(Mat 26.17–25; Mak 14.12–21; Jon 13.21–30)
7Ku oko ki te aso o te Kai kai oa Preti ne Tao Fua Fuarei, ko te vasia oa tamai manu o te Kai kai o te Faka sara anga ne taa iei. 8Jesus ne kau ea koia ko Peter ma John ke oro ma taranga, “Oro o pena mai koa mo kai ma tatou ke kai i te Kai kai o te Faka sara anga.”
9Feesiri atu rei koraua kiei, “Ko kee e fifia ke mau oro o pena mai i fea?”
10Tongoi atu rei koia kia raua, “Fakarongo! Toru vasia ka oo atu ki roto noforanga lasi, korua ka ono ki te tangata e amo tana vai, kotou ka fekitei. Tautari arei korua kiei, oro ki na paito ka uru kiei, 11ma e muna atu arei korua ki te tangata ona paito, ‘Te fakaako e muna mai kia kee, “Tefea takua te rota paito kuou ma toku kau fanonga ka kkai te Kai kai o te Faka sara anga iei?” ’ 12Koia ka faka ari atu kia korua te ngangea lasi i runga, ne pena ma ne faariki; tera ngangea korua ka pena pena koa nea kaatoa iei.”
13Koraua ne oro, ono rei a nea katoa fakapera rei pea Jesus ne faka ari atu kia raua, ta pena raa koa mo kai o te Kai kai o te Faka sara anga.
Te Kai Tapu o te Ariki
(Mat 26.26–30; Mak 14.22–26; 1 Cor 11.23–25)
14I te vasia ku oko, Jesus ne nofo ki raro ma na kau fai fekau. 15Koia ne muna atu kia ratou, “Kuou ku fifia maatea rei ke kau kai ma kotou i te Kai kai o te Faka sara anga nei, oti kae fakarongo neaisu raa kuou! 16Tera kuou e faka ari atu kia kotou: Kuou ka si see kai kiei, oko rei ku soria kiei te atamai maori i te Kainanga o Tupua.”
17Tera ko Jesus ne sau te faangongo, ne sori faka ue ue ki Tupua, ma e muna, “Sau teinei o vaevae maso kotou o inu kiei. 18Natafito kuou e faka ari atu kia kotou: Kuou ka see kau inu mia koa waeni nei i vasia nei oko rei te Kainanga o Tupua ku au.”
19Tera koia ne sau te foi preti, o sori te faka ue ue ki Tupua, totofi ea koia, tera sori rei kia ratou, o muna, “Teinei toku tino e soria atu mo otou. Fai faka peinei ma faka maanatu kia kuou.” 20Ia fai atamai sokotasi, koia ne sori ko te faangongo kia koratou, ia tua o te kai afi afi, muna rei, “Te faangongo nei ko te tongi sanga foou a Tupua ne faka maru ki toku toto, iei e ringi ki tua motou.
21“Kae, pula rei! Koia ka nai soria kuou, e kau i tatou i te tepolo nei! 22Natafito te Tama a Tangata ka mate rei tautari kia maanatu ranga a Tupua. Ka e fakaruru faka arofa maatea rei ki te tangata ka sori ea koia kuou nei kia rima o te faoa pariki!”
23Tera koratou ne fakatafito o fesiri siri maso koratou, pe koai ia ratou ka poi o fai faka peeraa.
Faka marau raua taranga pe koai ka lasi
24 #
Mat 18.1; Mak 9.34; Luk 9.46. Te kau fanonga ne faka marauraua taranga pe koai ia ratou ka fai ke maurunga sapa. 25Jesus ne muna atu kia ratou, “Nga tii o te kano fenua pouri e fai ratou makeke i ratou kano fenua, ma nga fakarongo ranga e ati, ‘A soavaka o te kano fenua’. 26#Mat 23.11; Mak 9.35. Kae kotou si see fai faka peeraa. Pe koai ia kotou e uru matua, koia ka fai rei pe te tee ki muri, ma koia e fono fono ia kotou, ka fai pe te seka. 27#Jon 13.12–15.Koai e maurunga: ko te nea e nofo ki raro o kai, o pe te nea e fai fekau kiei? Koia rei e nofo ki raro! Kae kuou te nea e fai fekau ia kotou.
28“Kotou naa, kotatou rei noko fare i toku vasia noko mamaataki iei. 29Ma e fakapera rei pe toku Mmana ne sori mai kia kuou te tonu kau fono iei, tera kuou fokia ka sori atu kia kotou te tonu sokotasi pe ne sori mai e toku Mmana. 30#Mat 19.28.Kotou ka kai ma e inu i toku tepolo i toku Kainanga, ma kotou ka fare kia noforanga ariki, ke kotou oono kia kainanga e fuanga furu ma rua o Israel.”
Jesus e faka iro te faka fiti fiti anga a Peter
(Mat 26.31–35; Mak 14.27–31; Jon 13.36–38)
31“Simon ee, Simon ee! Fakarongo! Ko Satan ne sau te fakatau rongo ke nai maatakina ko kotou katoa, ke vae ko a nea laoi mai a nea pariki, pe te tangata tau tofi e nai firia kese ki tua koa penu penu oa witi mai ana fatu kai. 32Kae kuou ne rotu kia ko kee, Simon ee, ki tau fakatonu ka see faka too. Ma vasia ko kee ka foki mai kia kuou, ko kee ke faka makeke ria ou taina.”
33Tongoi atu rei ko Peter, “Toku Ariki ee, kuou e pena ke tau oro ki te fare pono pono, ma ke kau mate ma kee!”
34Ta muna atu rei ko Jesus kia Peter, “Kuou ka faka ari atu rei kia kee, Peter, te kio ka si see tangi i te poo nei, oko rei tou vasia ka muna faka toru ko kee se kee iroa ina kuou.”
Te tanga fao mane, te paeki, ma te rautoro
35 #
Mat 10.9,10; Mak 6.8,9; Luk 9.3; 10.4. Tera ko Jesus ne fesiri atu ki na kau fanonga, “I te vasia ne kau atu ea kuou kotou oro ki tua i vasia siei se tanga fao mane, paeki, pe ni rafi vae, ea, kotou ne sessese i pe nia?”
Tongoi atu rei koratou, “Siei rei pe nia ma matou ke fifia kiei!”
36Muna atu rei ko Jesus, “Kae i vasia nei, pe koai e fai tana tanga fao mane, ke sau rei; ma pe koai si see fai tana rautoro, ke fai tauvi rei na suru ke sau se rautoro ma ana. 37Natafito kuou ka faka ari atu rei: Te Pepa Tapu, ne nai araara fakina,
‘Koia ka faka piki tia ria ma faoa titisara,’
“ka faka maori ria ia kuou. Natafito pe nia ne tusia kia kuou, e tonu rei ka au.”
38Mumuna atu rei te kau fanonga kiei, “Te Ariki ee, pupula rei! A rautoro e rua konei!”
Tongoi atu rei koia, “E fetau fangatasi!”
Jesus e rotu i te Maunga i Olive
(Mat 26.36–46; Mak 14.32–42)
39Tera ko Jesus poi rei ki tua mai taoni lasi, o poi rei ki na ngangea e singa poi kiei, ki te Maunga i Olive, ma te kau fanonga ne oro koratou. 40Vasia oratou ne oko ki ngangea, muna atu rei koia kia ratou, “Rotu kotou ka see feetoki ki te titipea ranga.”
41Tera koia ne poi ke mavae atu, ratou fai mmao e fai pe te fatu e pee, tera tokoturi rei ki raro o rotu. 42Muna rei koia, “Pa ee, kae tou fifia rei, sau kesea ki tua ko te faangongo o fakarongo neaisu nei ma kuou. Moa rei, siei i toku fifia, kae tou kee fifia ia ke oko.” 43[Te ʻangelʼ mai te vaerangi ne faka saa atu kiei, ma ne nai faka makeke ria koia. 44Mai i na arofa maatea rei, koia ne rotu sapa rei, ko ana tino ku fiti kofu, ku tafe ifo ki raro pea toto ki te kere.]
45Ne tuu ake mai tana rotu, foki rei o poi ki te kau fanonga, mau atu rei koratou e mee rei, e losi e taia riaina mai ia ratou arofa. 46Koia ne muna atu kia ratou, “Sea na atamai kotou e mee? Tokai ki runga o rotu, kotou ka see feetoki ki te titipea.”
Jesus ku pukea ria
(Mat 26.47–56; Mak 14.43–50; Jon 18.3–11)
47Vasia o Jesus e koi muna iei, te vasia rei o te kano fenua e oko mai, e taki mai e Judas, te faka tino angafuru ma rua o te kau fanonga. Au arei koia o songi kia Jesus. 48Kae muna atu rei ko Jesus, “Judas i tau songi anga nei, e kee soria ina te Tama a Tangata?”
49Vasia o te kau fanonga, koratou ma Jesus ne ono pe nia ka fai, koratou ne mmuna, “Te Ariki ee, a matou rautoro ka soka?” 50Kae te tangata ia ratou, ne sepe arei tana rautoro ki te seka a te Maurunga o nga Pure Fai kava, o nai sepea kese ko na taringa i faasi matau.
51Tera ko Jesus muna atu rei, “Ku laoi!” Kae poo atu rei koia o faka piki ko na taringa ma e faka maroro koia.
52Tera ko Jesus ne muna atu ki nga ariki fai kava, ma nga fakarongo ranga o te Paito Tapu ma nga matapure, koratou ne oomai ki ngangea ke kave koia, “Ea rei kotou e oomai motou rautoro, ma otou raakau taua, pe kuou te tangata saeaki ia fono? 53#Luk 19.47; 21.37.Kuou noko fare mau rei kotatou i te rota Paito Tapu i nga aso katoa, kae kotou rei se ne kotou pukea kuou. Kae teinei totou vasia, ko te vasia o te makeke o te kau pouri ngiti ku oko.”
Te peupeu ranga a Peter
(Mat 26.57–75; Mak 14.53–72; Jon 18.12–27)
54Tera ratou pukea ria ko Jesus, ka kave rei ea ratou ki te paito o te Maurunga o nga Pure Fai kava. Ko Peter e tautari atu arei i muri. 55Te afi ne tafu i rottonu o ta fafare, tera soko atu rei ko Peter kia ratou e fare riikofi kiei. 56Vasia te fafine i nga maatua faafine fai fekau ne nai ravea ina koia e nofo i vae afi, koia ne ono tonu atu rei kiei, kae muna rei, “Te tangata nei fokia koraua ma Jesus!”
57Kae ko Peter ne peupeu kiei, “Maatua fafine ee, kuou si see kau iroa ina koia naa!”
58Ia tua si see roa ake, te tangata ne nai matea ria koia, tera muna atu arei, “Ko kee fokia take tangata ia ratou!”
Kae tongoi atu rei ko Peter, “Tangata ee, kuou siei!”
59A mo vasia si see roa ake, take tangata ne meeaki atu rei kiei, “Siei rei se mata mata saranga mo te tangata nei, koia ma Jesus, natafito koia fokia mai Galilee!”
60Kae tongoi atu rei ko Peter, “Tangata ee, kuou si see kau iroa ina pe nia ma au e muna kiei naa!”
I mo vasia koia e koi muna iei, te kio ne tangi ake. 61Te Ariki ne tafuri ake, ono tonu atu rei kia Peter, ta ko Peter ku fiti ake i na roto koa taranga a te Ariki, ne muna atu kiei, “Te vasia te kio siki tangi i te poo nei, ko kee ka muna faka toru, ko kee se kee iroa ina kuou.” 62Peter poi ki tua arei, ma e tangi fai ngutu maatea rei.
Jesus e fai faka kata ria ma e saia ria
(Mat 26.67–68; Mak 14.65)
63A taangata noko reosaki ko Jesus, fai faka kata kiei, ma ne ratou saia ria. 64Ratou nootia ria ko ana mata, ma ne feesiri atu kiei, “Koai ne tuki ia kee? Faka iro mai kia matou!” 65Ma koratou ne mmuna pariki maatea rei kiei.
Jesus ia mua te Kau Fono fono
(Mat 26.59–66; Mak 14.55–64; Jon 18.19–24)
66Maarama ake take aso, ko nga matapure, ma nga ariki fai kava, ma nga fakaako oa Fono ne taanaki ki roto, ma ko Jesus ne aumai kia ratou. 67Koratou ne feesiri atu, “Faka ari mai kia matou pe ko kee te Ariki Fakaroro?”
Tongoi atu rei koia, “Kae kuou ke faka ari atu kia kotou, kotou ka si see fakatonu, 68ma ke kau fesiri atu kia kotou, kotou ka si see ma tongoi. 69Kae i te vasia nei, te Tama a Tangata ka nai nofo riaina ko te faasi matau o Tupua te Uru o te Mana.”
70Koratou ne feesiri atu, “Ko kee tera, te Tama a Tupua?”
Tongoi atu rei koia kia ratou, “Teenaa rei ko kotou e mmuna kuou koia.”
71Ma koratou ne mmuna, “Tatou ka see fai ni faoa ono mata fokia! Tatou maso kotatou ne songoi fakarongo ki ana taranga naa!”
Currently Selected:
Luke 22: TKP
Highlight
Copy
Compare
Share
Want to have your highlights saved across all your devices? Sign up or sign in
© 2025 Wycliffe Bible Translators, Inc.
