Luke 20

Te fesiri anga ki te tonu o Jesus

(Mat 21.23–27; Mak 11.27–33)

1Take aso, vasia o Jesus e fakaako ma e tuufaki ko te kano fenua i rota Paito Tapu ki te Rongo Laoi, nga ariki fai kava ma nga fakaako oa Fono, ma nga matapure fokia ne oomai, 2o feesiri atu kiei, “Faka ari mai kia matou: Se tonu koai ma au e fai ke fai koa nea nei? Koai ne nai soria atu te tonu nei?”

3Tongoi atu rei ko Jesus kia ratou, “Kuou ka fesiri atu fokia kia kotou, ke faka ari mai kia kuou: 4Ko John rei ne fai tana tonu ke faka uku mai Tupua pe mai nga taangata?”

5Koratou ku fakatafito o taua taranga maso koratou, “Kotatou ka mmuna faka fefea? Kae tatou ke mmuna, ‘Mai Tupua,’ koia ka muna, ‘Sea rei natafito kotou si se ne fakatonu kia John?’ 6Kae pe kotatou ke mmuna, ‘Mai nga taangata,’ te kano fenua kaatoa rei nei ka ratou tau fatua ria kotatou, natafito koratou ku atetea laoi ko John te ʻprophetʼ.” 7Tongoi atu rei koratou, “Komatou si see matou iroa ina ko na ngangea e au mai iei.”

8Tera muna atu rei ko Jesus kia ratou, “Tera kuou fokia ka see faka ari atu kia kotou, pe koai ne nai faka tonu sia ke kau fai koa nea nei.”

Te araara fanga faka tautau kia ki faoa e oono i te tofi waeni

(Mat 21.33–46; Mak 12.1–12)

9Tera ko Jesus ne araara faki ko te araara fanga faka tautau nei, “Nai take vasia te tangata ne tokaki ko na tofi fufuei raakau, sori rei ea koia ki faoa reo ke oono iei, poi rei ki te potu fenua e mmao rei, sau rei ko na vasia e roa. 10Ku oko ki te vasia ke faki koa ʻgrapeʼ, fakkau rei ea koia tana seka ki faoa reo, ke sau mai ko na vaenga. Kae faoa reo ne ratou taia ria ko te seka, ratou fakkauna rei, ke foki kae siei pe nia ne sau. 11Tera fakkau rei ea koia ko take seka, kae faoa reo ne ratou taia ria fokia, ma ne ratou faia ria ke faka ruru faka maa, ratou fakkauna rei, ke foki kae siei pe nia ne sau. 12Tera koia ne fakkau te toka toru o ana seka; nga faoa reo ne ratou taia ria fokia, ma ne ratou peia kese ki tua. 13Tera te tangata ona te tofi oa fufuei raakau ne muna, ‘A nia rei ma aku ka fai? Kuou ka fakkau taku kee tama maori rei. Matea koratou ka faka epa kiei!’ 14Kae vasia o faoa reo ne ono kiei, fai taranga rei maso koratou, ‘Teinei tana tama maori. Oomai ke tatou tamatea ria koia, ta sau raa ea tatou ko na tofi!’ 15Tera ne ratou peia kese mai tofi, ma ne tamate rei ea ratou.”

Tera fesiri atu rei ko Jesus, “Tera a nia rei ma te tangata ona te tofi ka fai ki faoa reo nei? 16Koia ka au, nai taia rei ke mmate ko nga taangata nei, kae faka ari rei ko ana tofi fufuei raakau ki rake faoa reo.”

Vasia te kano fenua ne fakarongo kiei nei, koratou ne mmuna, “Siki siei arei!”

17Jesus ne pula atu kia ratou, ma ne fesiri atu, “Tera sea rei te atamai o te Pepa Tapu nei ku tusia ria:

‘Te fatu rei ne tiakina e faoa taa paito,

ku siaki te matuaa fatu rei o te paito!’

18“Pe koai ma e feettoki ki te fatu nei ka sepe sepea riki rei. Ka te fatu nei e too pe kiai, ka kumia pala pala rei.”

Te fesiri kia tauvi o taakisi

(Mat 22.15–22; Mak 12.13–17)

19Nga fakaako oa Fono, ma nga ariki fai kava ne fai ke puke ko Jesus, natafito ku ratou iroa ina koia ne araara faki ko te araara fanga faka tautau nei e fai pariki kia ratou, kae koratou ne maattaku i te kano fenua. 20Tera koratou e ono ono ki se vasia laoi, ke tauvi rei ko ni taangata ke oro pe faoa laoi, ke titipea ea ratou ko Jesus kia fesiri. Tera e laoi ke ratou soria ina ki te manuu ma te makeke o te gavana o nga Roman. 21A taangata ono ono faka leku leku nei ne muna atu kia Jesus, “Te fakaako ee, ku matou iroa ina pe nia ma au e muna ma e fakaako e tonu, matou iroa ina ko kee si see fai koa tukunga faka taangata, kae fakaako koa tukunga maori o Tupua ki nga taangata. 22Faka ari mai kia matou, e laoi fuarei ia tatou fono ke tauvi koa taakisi ki te Empra o nga Roman, o pe siei?”

23Kae ko Jesus ku nai iroa ina ko aratou toka roto, muna atu rei kia ratou, 24“Faka ari mai rei kia kuou te foi mane. Oai koa mata ma te ingoa e faka ari iei naa?”

Tongoi atu rei koratou, “O te Empra o nga Roman.”

25Tera muna atu rei ko Jesus kia ratou, “Tera arei, tauvi ki te Empra o nga Roman pe nia ma te Empra, kae tauvi ki Tupua pe nia ma Tupua.”

26Tera ia tua te kano fenua se ne ratou maua pe nia, tera koratou ne faka turi arei, ku mmate ko aratou tino ki tana tongoi.

Te fesiri ki te masike ranga mai te mate

(Mat 22.23–33; Mak 12.18–27)

27 # Act 23.8. Rake Sadducee ne oomai kia Jesus. Koratou e mmuna ko te kano fenua ka see masike mai i te mate. Feesiri rei koratou kia Jesus, 28“Te fakaako ee, ko Moses ne tusi ko tatou fono faka peinei:

‘I vasia o te tangata ka mate iei,

kae nofo rei na nofine siei ni tama ma ana,

tera na taina ke avanga rei ki te tangi soa ke fai ko ni tama ma na taina ku mate.’

29“Take vasia nga tau faanau e toka fitu e fare. Te uru matua ne avanga, ma ne mate arei, siei ko ni tama ma ana. 30Tera na tao avanga rei ki te maatua fafine, 31ma tera tao atu arei take ratou taina. Soro fakaoti rei ko te faanaunga nei, o avanga ki te maatua fafine, koratou ne mmate fakaoti rei, siei ko ni tama ma ratou. 32Faka muri muri rei ia ratou kaatoa, ta kae mate te maatua fafine. 33Tera i te vasia o te aso ka masike ake mai te mate ki te ora, oai rei te nofine ka fai? Natafito te faanaunga e toka fitu nei ne avanga katoa rei kiei.”

34Tongoi atu rei ko Jesus kia ratou, “Nga taangata ma nga faafine o te tau tupu ranga nei e avanga, 35kae nga taangata ma nga faafine, koratou ku faka tonusia ke masike ake mai te mate ke ora ki tau tupu ranga o vasia ka au, ka si see avanga. 36Koratou e fai pe nga ʻangelʼ, ma ka si see mmate. Koratou a tama a Tupua, natafito koratou ku masike ake mai te mate. 37Tera ko Moses ne fakatonu rei ko te mate ne masike ake ki te ora. I te mo taranga o te uruvao ne vera, Moses e araara faki ko te Ariki ‘Koia te Tupua o Abraham, te Tupua o Isaac, ma te Tupua o Jacob’, kae moa rei koratou ne mmate fakaoti. 38Koia te Tupua o te ora, siei o te mate, natafito faoa kaatoa nei e ora kia koia.”

39Rake fakaako oa Fono ne karanga ake, “Te tongoi laoi, te fakaako ee!” 40Tera ia tua nei siei rei pe koai ke fesiri fokia kiei.

Te fesiri ki te Ariki Fakaroro

(Mat 22.41–46; Mak 12.35–37)

41Jesus ne fesiri atu kia ratou, “E ma fai faka fefea koratou ke mmuna, ko te Ariki Fakaroro ka faka afu ia afu o David? 42Natafito ko David maso koia ne muna i te Pepa o Psalms,

‘Tupua ne muna ki toku Ariki:

Nofo i kunei, i toku faasi matau,

43oko rei ki vasia ka kau tukuna ko ou faoa tau firi firi pe te tuuranga ki araro ou rafi vae.’

44“Tera ko David ne karanga kiei ‘toku Ariki’ e ma faia faka fefea rei, te Ariki Fakaroro ke afu mai a David?”

Jesus e faka iro ke faka matakite ia fakaako oa Fono

(Mat 23.1–36; Mak 12.38–40)

45I vasia o te kano fenua kaatoa ku fakarongo kiei, Jesus ne muna atu ki na kau fanonga, 46“Faka matakite ki nga fakaako oa Fono, koratou e fifia ke oro saere e fe urufi ki aratou suru e fingauoro ma ke rausapaia ria ma te faka epa ia ngangea makete. Koratou e fifia ke fare kia noforanga laoi ia paito taanaki, ma ke fare kia ngangea laoi ia kai kai. 47Koratou toka roto ria ko nga tangi soa, ma e ratou kaiaa tia ria ko aratou noforanga, kae moa rei koratou e fai faka peinei, koratou e fai ko aratou rotu roa o lelesi. Kae ratou fakkiro ka faia ria kia ratou kaatoa ka maatea rei na pariki!”

Currently Selected:

Luke 20: TKP

Highlight

Copy

Compare