Luke 17
17
Te sara
(Mat 18.6–7; 18.21–22; Mak 9.42)
1Tera ko Jesus ne muna atu ki na kau fanonga, “Pe nia ka faia ria ko te kano fenua ke feetoki ki te sara, e fai ke aumai ina. Ka e fakaruru faka arofa maatea rei kia koia ka nai faia koa nea nei ke fai! 2Tera e laoi sapa rei kia koia ke fii fatu ko na ua, kavea rei o faka too i rotonga vasa, ma kia koia ke nai furisia te nea sokotasi e vikilakea nei ke too ki te sara. 3#Mat 18.15.Tera faka matakite kia kotou!
“Pe tou taina e too ki te sara, faka ari atu kiei, kae koia e siaki, faka ngaromia ko ana sara. 4Kae koia e fai sara faka fitu atu kia kee i te aso sokotasi, ma e fai i ana vasia e au o muna atu, ‘Kuou ku siaki,’ tera ko kee ke faka ngaromia rei ko ana sara.”
Fakatonu
5A fai fekau muna atu rei ki te Ariki, “Fai mai a matou fakatonu ke sapa.”
6Tongoi atu rei ko te Ariki, “Kae otou fakatonu pe ne lasi ake pe te foi fatu kai ʻmustardʼ, ko kotou ka ma muna atu ki te raakau nei, ‘Fufuti maso kee ki runga mo ou vai aka o too maso kee i roto moana!’ tera ka tautari atu arei kia kotou.
A fainga fekau a te seka
7“Kae pe koai ia kotou e fai tana seka, koia e ranga o pe e oono ia sipi sipi. Vasia koia ka au mai te tofi, ea, ko kee ka muna atu arei kiei, ‘Faka vave o kai ko au mo kai?’ 8Siki siei arei! Kae ko kee ka muna atu kiei, ‘Poi o pena pena mai ko aku mo kai, fetari mai rei kia kuou ke kau kai ma e inu, ia tua kai raa ko kee ma e inu.’ 9Siei se fetau fangatasi ke faka ue ue ki te seka, natafito a nea ana fainga fekau. 10Tera ko kotou fakapera rei fokia, vasia ko kotou ku fai fakaoti katoa rei pe nia ne faka aria atu kia kotou ke fai, e fetau fangatasi ke mmuna, ‘Komatou a seka fuarei komatou ne fai fuarei ko amatou fainga fekau.’ ”
Jesus e ikirave kia taangata tino angafuru
11I na vasia e poi ki Jerusalem iei, koia ne poi vasia i roto oa motu ngangea o Samaria ma Galilee. 12I vasia koia ne fai ke poi ki roto noforanga, fekitei akina rei e nga taangata e ngaengae tino para. Koratou ne turaki mmao atu, 13o foorua atu kia Jesus, “Jesus te Ariki ee! Arofa mai kia matou!”
14Jesus ne nai ravea ina ma ne muna atu kia koratou, “Oro o faka ari ki nga pure fai kava ke ratou maatakina kotou.”
Ma i ratou vasia e oro iei, ratou tino ku furuna ria, ku maa. 15Te tangata sokotasi ia ratou ne ono kia koia ku laoi ko ana tino, koia ne foki mai arei, o rausapai, ma e muna forua ki Tupua i na fonga reo. 16Koia ne tokoturi ki raro kia vae o Jesus, o faka ue ue kiei. Te tangata nei te foi Samaria. 17Jesus ne fesiri atu kiei, “Ko kotou kaatoa e tino angafuru. Ko fea rei take kau e toka siva? 18Sea rei na atamai koia te nea oa ngangea rei ne foki mai maso koia fuarei, o sori tana faka ue ue ki Tupua?” 19Muna atu rei ko Jesus kiei, “Tokai ki runga o poi, tau fakatonu ku nai faia ko kee ke maroro.”
Te au ranga o te Kainanga o Tupua
(Mat 24.23–28; 24.37–41)
20Rake Pharisee ne feesiri atu kia Jesus, “Te vasia fea te Kainanga o Tupua ka au iei?”
Tongoi atu rei ko Jesus, “Te Kainanga o Tupua ka si see au ke ravea ina. 21Siei pe koai ka muna, ‘Pula, i kunei!’ pe, ‘Pula i kunaa!’, natafito te Kainanga o Tupua e naa ia kotou.”
22Tera muna atu rei koia ki na kau fanonga, “Te vasia ka au, vasia rei kotou ka fifia ke kotou ono rei kia aso o te Tama a Tangata, kae kotou ka si see ono kiei. 23Ko nga taangata ka muna atu kia kotou, ‘Pula ki ngangea!’ pe, ‘Pula ki kunei!’ Kae ka see oro o pula kiei. 24Natafito te Tama a Tangata i na aso ka faia pe te foi kamo e maripo ake maarama rei i te vaerangi mai take potu ki take potu. 25Kae koia ka maatea rei na fakarongo neaisu mua, ma ka see fifia kina ria e te kano fenua o te aso nei.
26“Koa aso o te Tama a Tangata ka faia ria pe te vasia o Noah: 27Te kano fenua ne kai ma ne inu, nga taangata ma nga faafine ne fe avanga taki oko rei ki te aso o Noah ne sopo ki te vaka iei, ma te vai tafe ne fena ifo ne nai faka ngaromia koratou kaatoa.
28“E fai fakapera rei pe i te vasia o Lot: Te kano fenua e kaikai ma e inu, fai tauvi ma e tauvi, fai sanga ma e taa paito. 29Kae te aso o Lot ne poi kese ma Sodom iei, te afi ma te ʻsulphurʼ ne fena ifo pe te ua mai te vaerangi, tera ne nai tamatea ria koratou kaatoa.
30“Tera ka fai faka peinei i te aso o te Tama a Tangata ka faka aria iei. 31#Mat 24.17,18; Mak 13.15,16.I te aso ai, pe koai e nofo i na fongo paito, koia see tau fangatasi rei ke ifo ki raro ke poi o uru ki na rota paito ke sau ko ana kope kopenga. Ia fai atamai sokotasi ki te tangata i te tofi, ka see foki rei ki muri ki na paito. 32Faka maanatu ki te nofine o Lot! 33#Mat 10.39; 16.25; Mak 8.35; Luk 9.24; Jon 12.25.Pe koai ma e fai ki na kee ora ia ke sao, ka faka lekutia. Pe koai e faka leku mai na ora, ka faka saofia. 34Kuou ka faka ari atu kia kotou, i te poo a taangata toka rua ka meeraki i rau meeranga sokotasi: Take tangata ka saua kese, kae tee rei take tangata ki muri. 35A maatua faafine toka rua ka faka soro fatu kai taanaki, take fafine ka saua ria, kae tiakina rei take fafine ki muri! 36[A taangata toka rua ka fai fekau i te tofi, take tangata ka saua ria, kae tiakina rei take tangata i muri.]”
37Te kau fanonga ne feesiri atu kia koia, “I fea te Ariki ee?”
Tongoi rei ko Jesus, “I ngangea o te tino mate e naa iei, nga manu kai tangata ka purii kiei.”
Currently Selected:
Luke 17: TKP
Highlight
Copy
Compare
Share
Want to have your highlights saved across all your devices? Sign up or sign in
© 2025 Wycliffe Bible Translators, Inc.
