John 2

Te avanga i Cana

1Ia tua oa foi aso e rua, te avanga ku fai i Cana i roto i Galilee. Te nana o Jesus e nofo i kuraa. 2Tera ko Jesus ma na kau fanonga fokia ne kaafia riaina ki te avanga nei. 3I te vasia o te waeni ku tuufakina ku oti, te nana o Jesus ne muna atu kia koia, “A ratou waeni ku oti.”

4Tongoi atu rei ko Jesus, “Nau ee, ko kee ka see muna mai rei pe nia ke fai, toku vasia siki oko mai.”

5Tera muna atu rei te nana o Jesus ki te faoa fai fekau, “Fai tautari pe nia ma ana ka muna atu kiei.”

6Nga Jew e fai a ratou tukunga ki te faasi o faka maa, tera a umu fatu faka nupu nupu vai e ono e turaki i te ngangea, te umu fatu sokotasi na fakataunga nai okotia fua te rau sokotasi. 7Tera muna atu rei ko Jesus ki te faoa fai fekau, “Utufaki koa umu nei kia vai.” Tera utufaki arei ea ratou ke fonu pii rei. 8Tera, muna atu rei koia kia koratou, “I te vasia nei, ringi ko mo vai ki tua ki te faangongo, kave rei o sori ki te fakarongo ranga o te kai kai nei.” Tera sau rei ea ratou koa mo vai kiei. 9Vasia tangata ku maataki ake iei, a vai ku taafuri kia waeni, ku see nai iroa ina pe mai fea (kae faoa fai fekau ne ringi koa mo vai e ratou iroa ina fuarei). Tera karanga atu rei koia ki te pure foou, 10ma ne muna atu rei kiei, “Ko nga taangata katoa rei e mataki faa inu kia matuaa waeni, ta kia muri te fenua kaafia ku maatea rei ratou inu, faa inu rei kia waeni e inu mau kiei, kae ko kee noko faka pini arei koa matuaa waeni oko arei ki vasia nei!”

11Te mataki furisanga nei ne faka saa e Jesus i Cana i roto i Galilee; tera i kuraa ne faka ari koia ki tua na taurekareka, ma na kau fanonga ne fakatonu kiei.

12 # Mat 4.13. Ia tua nei, Jesus, na nana ma ana taina ma te kau fanonga oro arei ki Capernaum. Koratou ne fare rei i kuraa a foi aso.

Jesus e poi ki te Paito Tapu

(Mat 21.12–13; Mak 11.15–17; Luk 19.45–46)

13Vasia ku piri ki te Kai kai o te Faka sara anga o nga Jew, tera ko Jesus ne poi ki Jerusalem. 14Tera i te roto Paito Tapu koia ne nai maua ina ko fenua e fai tauvi ko aratou manu a buluka, sipi sipi, ma rupe, ta ma faoa siaki mane e fare ia ratou noforanga. 15Tera koia ne sau tana potu maea, nai faka taa ria kese rei a manu katoa ki tua mai roto Paito Tapu, nga sipi sipi ma nga buluka. Koia ne nai furi furi sia ina koa noforanga o faoa siaki mane, ma ne nai sevekina ko aratou mane. 16Ta faka ari atu arei koia ki faoa e fai tauvi koa rupe, “Tari kese ki tua ma kunei! Fakaoti ka see fai te paito o toku Mmana te ngangea fai fai tauvi o pe nia!” 17Na kau fanonga ku ratou maanatua riaina raa ko te Pepa Tapu e araara faki, “Tupua ee, taku faka napa sapa ki tou paito e kaa ia kuou pe te afi.”

18A fakarongo ranga o nga Jew ne foki mai kia koia ma te fesiri, “Se furisanga koai ma au ka fai, ke faka ari mai kia komatou, te ngangea nei tau tonu e fai iei?”

19 # Mat 26.61; 27.40; Mak 14.58; 15.29. Ta tongoi atu rei ko Jesus, “Ofa akina ki raro te Paito Tapu nei, kae ia foi aso e toru ka kau faka tuu riaina ki runga fokia.”

20Ta feesiri atu rei koratou kia koia, “Te Paito Tapu nei ne taa e fua faa ma ono ko ana tau. Ko kee ka kee taia riaina ia foi aso e toru fuarei?!”

21Kae te Paito Tapu ko Jesus e araara kiei nei na kee tino ia. 22Ta i te vasia koia ne faka masike ria mai te mate, na kau fanonga ratou maanatua riaina raa pe nia koia noko muna atu kiei, ta ratou fakatonu sia raa koa taranga te Pepa Tapu ma pe nia ma Jesus ne muna atu kiei.

Jesus e poto ia tukunga o nga taangata kaatoa

23I te vasia ko Jesus i Jerusalem, ia aso i te Kai kai o te Faka sara anga o nga Jew, e kapi rei faoa ne fakatonu kia koia, natafito koratou ne ono mata rei kiei ki aana furisanga. 24Kae tera ko Jesus si se ne paanaki atu rei kia ratou, natafito koia e nai iroa ina laoi rei koratou kaatoa. 25Ta tera si see fetau fangatasi fuarei ki se nea ke muna atu kia koia, natafito koia maso koia e nai iroa ina pe nia ia ratou fatu manava.

Currently Selected:

John 2: TKP

Highlight

Copy