Acts 3
3
Te tangata kaisi tino mate ne faka maroro ria
1Take aso Peter ma John ne oro ki te Paito Tapu, i te raa e toru i te avatea, i te vasia rotu. 2I ngangea e ati “Te Urufanga Taurekareka” te tangata ana tino e mmate rei i na faanau anga. I nga aso katoa e saua o kave o tuku i te urufanga nei, ke kaisi mane ki te kano fenua e fe urufi ki rota Paito Tapu. 3Vasia koia ne ono kia Peter ma John e oro ki roto, koia ne kaisi kia raua ke sori mai pe nia ma ana. 4Koraua ne tuu koa rau mata kiei, ma ko Peter ne muna atu kiei, “Pula mai kia maua!” 5Tera koia ne ono atu kia raua, e maanatu koraua ka sori pe nia ma ana. 6Muna atu rei ko Peter kiei, “Kuou siei rei ni mane ma aku, kae kuou ka sori atu kia kee pe nia ma aku e fai: I te ingoa o Jesus Christ o Nazareth kuou e muna atu kia kee: Tokai ki runga o saere!” 7Tera koia ne nai rangaia ki na rima matau, o sosoa kiei ke tuu ki runga. I mo vakanga te tangata nei ana vae ma ana fatinga vae ku makeke. 8Koia ne pelati ake ki runga, o takafaki ko ana vae ki raro, ma ne fakatafito o saere vakai. Tera koia ne oro koratou ki rota Paito Tapu, e saere ma e sopo sopo, ma e rausapai ki Tupua. 9Te kano fenua kaatoa rei ne ono kia koia e saere ma e rausapai ki Tupua, 10ma vasia ne ratou matea ina koia te tangata kaisi mane koia noko nofo i te “Urufanga Taurekareka” o te Paito Tapu, koratou ku fereki ko aratou mauri kiei, pe nia ne faia kiei.
Te araara fanga a Peter i rota Paito Tapu
11Mo vasia o te tangata e piki atu kia Peter ma John, te kano fenua kaatoa ku fereki ko aratou mauri, furi atu arei kia ratou ki te ngangea faka maru maru ne ati kia Solomon. 12Vasia o Peter ne ono ki te kano fenua, koia ne muna atu kia ratou, “Nga taangata o Israel, sea natafito kotou e fereki otou mauri kia nea nei, ma sea natafito ko kotou e tuu mai fuarei otou mata kia maua? Ea, kotou e maanatu rei a nea nei ne fai ki mau kee mana o pe ki mau kee faka tupua ia ne nai faia ko te tangata nei ke saere iei? 13Te Tupua o Abraham, Isaac, ma Jacob, te Tupua oa tatou puna, ne nai soria ko na rau ariki taurekareka ki tana Seka ko Jesus, ne kotou soria ina ki nga fakarongo ranga ke taia riaina, ma se ne kotou fifia kina ia mata o Pilate, maafa rei onia ko Pilate ku fifia rei ke faka masara ko Jesus. 14#Mat 27.15–23; Mak 15.6–14; Luk 23.13–23; Jon 19.12–15.Koia e tapu fuarei ma e laoi ko ana tukunga, kae si se ne kotou fifia kina ria, kae kaaisi kotou fuarei kia Pilate ke sara mai kia kotou ko te tangata taa taangata. 15Ta tera ne kotou tamatea ria ko te tangata e nai takina ko nga taangata ki te ora, kae ko Tupua ne nai faka masike ria mai te mate, ma komaua ne ono mata kiei. 16Te mana o na ingoa ne nai faka makeke ria ko te tangata tino mate nei. Pe nia otou e ono ma e iroa ne faia ria i te fakatonu i na ingoa. Koia e tuu i otou mua kaatoa nei, ne maroro fuarei i te fakatonu kia Jesus.
17“Ta vakanga nei, taina ma ee, kuou e kau iroa pe nia mo tou ma otou taki ne fai kia Jesus, ne fai fuarei natafito i otou seke atamai. 18Tupua ne nai rongo rongo sakina ki nga ʻprophetʼ kaatoa i vasia i mua, ko te Ariki Fakaroro ka fai ke fakarongo neaisu riaina. Ma koia ne nai faia ria ke tonu maori rei ia tukunga nei. 19Siaki, tera, ma e taafuri ki Tupua ke nai faka ngaromia otou sara. 20Tera te vasia o te makeke faka tupua ka aumai i te Ariki, ma ke nai fakkauna ko Jesus, koia te Ariki Fakaroro ku oti na faka patino kia kotou. 21Koia ke nofo rei i te vaerangi oko rei ki te vasia ka au kia nea kaatoa ka faia ke faka foou iei, pe Tupua ne nai faka aria ki ana ʻprophetʼ tapu ia vasia i mua. 22Natafito ko Moses ne muna,
‘Te Ariki Tapu totou Tupua ka nai fakkauna atu te ʻprophetʼ,
pe koia ne nai kauna mai kuou, koia ka fai te tangata ia kotou i totou kee kanofenua ia.
Kotou ke fakarongo rei kia nea kaatoa a ana ka faka ari atu kia kotou ke fai.
23Pe koai koia si see tautari ki pe nia ma te ʻprophetʼ nei e muna kiei,
ka faka mavae riaina kese mai te kano fenua o Tupua,
ma ka fai pariki tia riaina.’
24“Ko nga ʻprophetʼ kaatoa, e kau ko Samuel ma koratou e oomai i ana tua, koratou noko faka iro iro fokia pe nia ka rave ia aso nei. 25A tongi a Tupua ki ana ʻprophetʼ motou ke kotou vaevae i te tongi sanga a Tupua ne nai faia ki otou puna, pe koia ne nai munakina kia Abraham,
‘Ia ou afu ka kau fakatapu riaina ko te kano fenua kaatoa oa taangata nei.’
26“Ta tera, Tupua ne nai faka patino ria, ma ne nai mataki fakkauna riaina tana Seka kia kotou, ke nai fakatapu riaina kotou, ke nai furisia kotou kaatoa ke taafuri kese mai otou tukunga pariki.”
Currently Selected:
Acts 3: TKP
Highlight
Copy
Compare
Share
Want to have your highlights saved across all your devices? Sign up or sign in
© 2025 Wycliffe Bible Translators, Inc.