Acts 22
22
1“Oku soavaka faka Jew, fakarongo mai kia kuou ka muna atu i toku kee faasi i otou a raro!” 2Vasia oratou ne fakarongo kiei e araara kia ratou ia taranga faka Hebrew, koratou ku faka turi kaatoa rei. Tera ko Paul ne araara,
3 #
Act 5.34–39. “Kuou te foi Jew, ne faanau i Tarsus o Cilisia, kae kuou ne faka saerea i Jerusalem nei, ne akona e Gamaliel kia tukunga o tatou puna, ma ne soria kaatoa rei ki Tupua, fakapera rei pe kotou kaatoa i te aso nei. 4#Act 8.3; 26.9–11.Te kano fenua e tautari kia tukunga nei ne kau faia ke tamatea ia ratou fakarongo neaisu anga, ma ne kau taria ina ko nga taangata ma nga faafine o raku ki fare pono pono. 5Te Maurunga o nga Pure Fai kava ma te Kau Fono fono e ratou iroa ina aku araara fanga e tonu. Kuou noko tari ko aratou araara fanga e tusi ki nga taina faka Jew i Damascus. Tera kuou ne poi ki te kano fenua nei ke faka seni mai ko aratou rima o fokisaki mai ki Jerusalem ke fakkiro.
Te furisia anga o Paul
(Act 9.1–19; 26.12–18)
6“Toku vasia ku au ku piri piri mai ki Damascus i te avatea mangaarie rei, te maarama rei ne rere ifo kia kuou mai te vaerangi. 7Kuou ne faka tokia arei ki te kunga kere ma ne kau rangona ko te reo e karanga mai kia kuou, ‘Saul ee, Saul ee! Sea natafito e kee fai pariki tia kuou?’ 8Kuou ne fesiri, ‘Ko kee koai te Ariki ee?’ Koia ne tongoi mai kia kuou, ‘Kuou, ko Jesus o Nazareth, e kee fai pariki tia.’ 9Nga taangata e oro komatou ne pula ki te maarama kae si se ne fakarongo ki te reo o koia e karanga mai kia kuou. 10Kuou ne fesiri, ‘Sea ma aku e fetau fangatasi ke fai, te Ariki ee?’ Ma te Ariki ne muna mai kia kuou, ‘Tokai ki runga o poi ki Damascus, ma Tupua ka nai faka aria atu kia kee ko ana fainga fekau e fifia ke fai fekauaki.’ 11Oku mata ne sengi, natafito te maarama ne maatea rei na ata ata, ma tera toku kau fanonga ne ttaki ia kuou ki Damascus.
12“Te tangata o te rotu, na ingoa ko Ananias, koia te tangata momooai e tautari kia tatou tukunga ma e maatea rei na faka epa riaina e nga Jew kaatoa e farenaki i Damascus. 13Koia ne au o tuu i toku faasi o muna mai, ‘Saul, taina ee, pupula ko ou mata!’ I mo vakanga oku ono ono fanga ku laoi ma kuou ku pula atu kiei. 14Koia ne muna, ‘Te Tupua o tatou puna ne nai faka patino riaina ko kee ke iroa ina ko ana tukunga, ke ono ki tana Seka tonu rei, ma ke fakarongo ki na kee reo ia. 15Natafito ko kee ka kae kae i ana taranga o faka ari ari ki nga taangata kaatoa pe nia ma au ne ono mata ma ne fakarongo kiei. 16Ma i vakanga nei, sea natafito ko kee e fetari ke roa? Tuu ki runga ke faka uku ma au sara ke furuna kese ma o rotu ki na ingoa.’
Te karanga tia o Paul ke tuufaki ki nga Gentile
17“Kuou ne foki ki Jerusalem, ma mo vasia kuou e rotu i rota Paito Tapu, kuou ne mee faka ata ata, 18iei kuou ne pula te Ariki e muna mai kia kuou, ‘Faka vave o poi kese ma Jerusalem, natafito te kano fenua i kunaa ka see fifia ke fakarongo kia aku taranga e kee araara fakina.’ 19Kuou ne tongoi, ‘Te Ariki ee, e ratou iroa ina laoi rei kuou noko poi ki nga paito taanaki o nga Jew o puke ma e taa fakarongo rongo koratou e fakatonu ki tou ingoa. 20#Act 7.58.Ma i vasia o tau seka ko Stephen ne tamatea iei, kuou ne kau ia ratou, o fakatonu ko na taia anga ma ne oono ia suru o faoa ne tamate iei.’ 21Muna mai rei ko te Ariki kia kuou, ‘Poi, natafito kuou e fakkau atu ko kee ke poi ki tua ki nga Gentile.’ ”
22Te kano fenua ne fakarongo kia Paul oko rei koia ne muna faka peinei, kae tera koratou ne fakatafito o foforua ki runga rei, “Tamatea koia naa! Koia naa ku see fetau fangatasi ke tuku ke ora!” 23Koratou ku faka oa maatea rei, ma e saaro ko aratou suru, ma e raku koa refu ki te tauroto anga. 24Te fakarongo ranga o nga Roman ne muna atu ki tana faoa ke kave ko Paul ki rota paito, ma ne faka ari atu kia ratou ke sasa, ke maataki sea natafito nga Jew ku faka oa temate rei kiei. 25Kae i vasia oratou ne rii ko ana rima ki te pou ke sasa iei, Paul ne muna atu ki te tangata reo e tuu i na faasi, “Ea si see sara ia fono kia kotou ke sasa te foi Roman koia si se ne maatakina ki se sara ma ana?”
26Vasia te tangata reo ne fakarongo kiei, koia ne poi ki te fakarongo ranga o faka ari atu kiei, “Sea ma au e fai? Te tangata naa te foi Roman!”
27Tera te fakarongo ranga ne poi kia Paul o fesiri atu kiei, “Faka ari mai kia kuou, ko kee te foi Roman?”
Tongoi atu rei ko Paul, “E tonu.”
28Tera te fakarongo ranga ne tongoi, “Kuou ne tauvi taku uuaa mane ke kau uru ki te faka Rome.”
Tongoi atu rei ko Paul, “Kae kuou te foi fua maori.”
29I mo vakanga, koratou ku fai ke fesiri siri kiei, ku oro kese arei. Te fakarongo ranga maso koia ku mataku, vasia ku nai iroa ina ko Paul te foi Roman, ma ne tuku ea koia kia seni.
Paul ia mua o te Kau Fono fono
30Te fakarongo ranga ku fifia ke mau pe nia ma nga Jew e ratou faka tautara siaina ko Paul iei. Tera i take aso koia ne sau kese koa seni o Paul ma ne kafi ki nga ariki fai kava ma te Kau Fono fono ke taanaki. Tera koia ne kave ko Paul o faka tuu ia ratou mua.
© 2025 Wycliffe Bible Translators, Inc.