Acts 2
2
Te au ranga o te Mauri Tapu
1Vasia te aso o Pentecost ne oko iei, te kano rotu kaatoa rei ku taanaki i ratou ngangea sokotasi. 2I mo vakanga te ooro ku fena ifo mai te vaerangi, pe te matangi e tairi makeke, ma ku utufaki ko ratou rota paito e fare iei. 3Tera ku ratou ravea ina koa nea e fai pe ni alelo o te afi, e purou taki tasi ia ratou kaatoa. 4Koratou ku urufia ina e te Mauri Tapu, ku fakatafito o araara i rake taranga tautari pe te Mauri o Tupua e nai faia koratou ke mmuna iei.
5Ko nga Jew e fare i Jerusalem, nga taangata o te rotu, ratou ne oomai mai nga fenua kaatoa oa taangata nei. 6I vasia oratou ne fakarongo ki te faka oa nei, te kano fenua lasi ne taanaki mai ki roto. Koratou ku fereki ko aratou mauri, natafito koratou taki tasi ku fakarongo atu ki te kano rotu ku araara mai ia ratou kee arataranga. 7Ku faka mate tino ma ku fereki ko aratou mauri, o mmuna, “Ko nga taangata e araara nei ko nga Galilee fuarei! 8E ma fai faka fefea rei, tera, kotatou kaatoa ke fakarongo atu kia ratou ke araara mai ia tatou arataranga maori rei?! 9Kotatou mai Parthia, Media, ma Elam, mai Mesopotamia, Judea ma Cappadocia, mai Pontus ma Asia, 10mai Phrygia ma Pamphylia, mai Egypt ma te motu ngangea i Libya e piri piri ki Cyrene; rake faoa ia tatou e oomai mai Rome, 11nga Jew ma nga Gentile e soko ki te kano rotu faka Jew, ma rake faoa ia tatou mai Crete ma Arabia, maafa rei, kotatou e fakarongo atu kia ratou e araara mai ia tatou arataranga maori rei koa nea e maatea a Tupua ku fai!” 12Ne fereki ko aratou mauri, koratou e koi fesiri siri maso koratou, “Sea te atamai nei?”
13Kae rake taangata ne fai faka kata ki te kano rotu nei o mmuna, “Ko faoa nei noko inu ku maua!”
Te araara fanga a Peter
14Tera ko Peter ne tuu ake ki runga ma te tino angafuru ma tasi o te kau fai fekau, ma ne fakatafito o karanga forua ki te kano fenua, “Te kanoa paito maori o Israel, ma kotou kaatoa e farenaki i Jerusalem nei, fakarongo mai kia kuou, ma e tuku mai ke kau araara fakina atu pe nia na atamai nei. 15Ko nga taangata nei si see varea pe kotou e maanatu, natafito te raa e siva fuarei i pongi pongi nei. 16Kae konei tonua a nea a te ʻprophetʼ Joel ne nai araara fakina,
17‘Konei aku ngangea ka fai ia aso ki muri.
Kuou Tupua, ka ringi toku Mauri Tapu ki nga taangata kaatoa.
Otou tama ma otou tama afine ka rongo rongo saki taku taranga.
Otou taangata muri ka mee faka ata ata,
ma otou taangata matua ka mee miti.
18E tonu, aku seka fokia ko nga taangata ma nga maatua faafine,
kuou ka sori ki tua toku Mauri Tapu ia aso ai,
ma koratou ka rongo rongo saki taku taranga.
19Kuou ka fai ko aku furisanga i te vaerangi i runga,
ma a nea faka mate tino ia taangata nei:
I ngangea te toto ma te afi ma te usi afi lasi.
20Te raa ka faka kau pouri ria,
ma te marama ka tafuri pea toto,
kae oko mai raa ko te Aso taurekareka o te Ariki ka au iei.
21Ta tera pe koai e tapa ki te ingoa o te Ariki ka faka saofia.’
22“Fakarongo kia taranga nei, nga taangata o Israel! Jesus o Nazareth ku faka atetea ria kia kotou koia te tangata maori a Tupua ia furisanga ma nga fainga fekau ne faka ata ata e Tupua ia koia. Kotou maso kotou e kotou iroa ina, natafito a nea nei ne fai fekauaki kia kotou i kunei. 23#Mat 27.35; Mak 15.24; Luk 23.33; Jon 19.18.Tupua i na kee fifia rei ma tana fai maanatu rei, ku nai tukuna atu ko Jesus kia kotou, ma ku kotou tamatea ria, o tukuna ki nga taangata titisara ke ratou tukia ria ki te raakau. 24#Mat 28.5,6; Mak 16.6; Luk 24.5.Kae Tupua ne nai faka masike riaina koia mai te mate, ma ne nai faka maa maa ria ko na fakarongo neaisu anga i te makeke o te mate, natafito te mate si se ma fai ke nai pukea ria ko na tino. 25Natafito David ne muna faka peeraa kiei,
‘Kuou ne kau ravea ina te Ariki Tapu e mua i oku mua i nga vasia katoa.
Koia i toku faasi matau,
tera kuou ka see tooara.
26Tera rei toku fatu manava ku vaki vaki maatea,
ma aku taranga ku fai e mata mau,
ma toku tino faka tangata ka maanava i te paanaki soro,
27natafito ko kee ka see kee tiakina ria toku ora ki te Ngangea o te Mate.
Ka see kee tukuna ria tau fai fekau fakapoto ke para i te tano.
28Ku kee faka ari mai kia kuou ko te riu ara ki te ora,
ma i tou faasi, ka kee faia riaina kuou ke mata mau.’
29“Oku soavaka ee: kuou ke muna faka atetea atu ki tatou puna ko David. Koia ne mate ma ne tanumia, ma na tano e koi naa rei ia tatou oko rei ki te aso nei. 30Koia te ʻprophetʼ, ma koia ne nai iroa ina koa tongi sanga a Tupua ne vata vata kiei: Tupua ne faka rangi koia ka fai se tangata sokotasi ia afu o David ke Tii, fakapera rei pea David. 31David ne nai ravea ina pe nia ma Tupua ka fai, ma tera koia ne nai araara fakina ko te faka masike ranga o te Ariki Fakaroro, i vasia koia ne muna iei,
‘Koia si se ne tanumia ia taangata nei ki te Ngangea o te Mate;
ana tino si se ne maofa i te tano.’
32“Tupua ne nai faka masike riaina ko Jesus nei mai te mate, ma komatou kaatoa nei ne ono mata kiei. 33Koia ku faka masike ria ki te faasi matau o Tupua, ma ne nai saua riaina ko te Mauri Tapu pe na Mmana ne tongi. Ma pe nia mo tou e ono ma e fakarongo i vasia nei, tana sori mai kia matou. 34Natafito ko David maso koia se ne poi ki runga ki te vaerangi, kae koia ne muna,
‘Tupua ne muna ki toku Ariki:
Nofo ki kunei, ki toku faasi matau,
35oko rei ki te vasia ka kau tukuna ko ou tau firi firi pe te tuuranga i araro o au rafi vae.’
36“Tera, te kano fenua kaatoa o Israel ke ratou iroa ina laoi rei, ko Jesus nei ne kotou tukia ria ki te raakau, ko Tupua ne nai faia ria koia te Ariki ma te Ariki Fakaroro!”
37Vasia te kano fenua ne fakarongo kiei nei, koratou ku faka mataku taku maatea rei, ma ne mmuna atu kia Peter ma rake kau fai fekau, “Nia rei ia ma matou ka fai, taina ma ee?”
38Muna atu rei ko Peter kia ratou, “Kotou taki tasi ke tafuri kese mai otou sara, ma kotou kaatoa ke faka uku riaina ki te ingoa o Jesus Christ, tera otou sara ke faka ngaromia ina, ma ke kotou saua riaina ko te sori a Tupua, te Mauri Tapu. 39Natafito Tupua ne fai tana tongi kia kotou ma otou tamariki, ma kia ratou kaatoa e mmao kese rei, koratou kaatoa te Ariki tatou Tupua e nai karanga tia riaina kia koia.”
40Peter ne fai faka mate mate rei kia ratou, ma ana taranga ne fai faka poto rei kia ratou, e muna, “Faka sao maso kotou mai te fakkiro anga ka faia ria ki te kano fenua tukunga pariki nei!” 41E tokarava rei ia ratou ne fakatonu ki aana taranga, ma ne faka uku ria. E toru koa afe (3,000) o te kano fenua ne soko ki ratou kano faoa i te aso ai.
42Koratou ne tuku rei koratou vasia ke akona mai e te kau fai fekau, ne sosoa ki te sau rotu, ma ne vaevae ia ratou mo kai, ma te rotu.
Te ora ne faka somo ia ratou fenua fakatonu
43Faoa kaatoa ku maatea rei ratou faka mataku taku, ma ne maatea koa fai furisanga ma a ngangea faka mate tino ne fai fekauaki e te kau fai fekau. 44#Act 4.32–35.Te kano rotu kaatoa e mori o rotu taanaki, ma ne vaevae ia ratou kope kopenga, ne fe sori aki ki roto. 45Koratou ne fai tauvi ko aratou kope kopenga, ma ratou taufenua, ma e vaevae koa mane ia ratou kaatoa, tautari ki te fifia o tangata sokotasi. 46Nga aso kaatoa koratou e fekitei mau i te Paito Tapu, ma koratou e kkai taanaki rei ia ratou paito, e kkai ko aratou mo kai ma ratou fatu manava vaki vaki maori, 47ma ne rausapai ki Tupua. Te kano fenua ne vaki vaki maatea ki aratou tukunga laoi. Ma i nga aso katoa te Ariki e nai faka saofia ko rake faoa, ke soko ki ratou kano faoa.
Currently Selected:
Acts 2: TKP
Highlight
Copy
Compare
Share
Want to have your highlights saved across all your devices? Sign up or sign in
© 2025 Wycliffe Bible Translators, Inc.