Acts 1
1
1 #
Luk 1.1–4. Kia Theophilus:
I taku mataki pepa, kuou ne kau tusia koa nea kaatoa a Jesus ne fai fekauaki, ma ne fakaako, mai te fakatafito ranga rei o ana fainga fekau, 2oko rei ki na vasia ku kavena ki te vaerangi. Oti kae kavena iei, koia ne faka atetea i te makeke o te Mauri Tapu ki na kau fai fekau ne faka patino. 3Ia tua o na mate ranga, koia ne faka sasa maso koia ia aso e fua faa koia ku ora, e rava rei ko ana fakatonu anga. Koia ne ratou ravea ina, ma ne nai araara fakina ko te Kainanga o Tupua kia ratou. 4#Luk 24.49.Ma vasia oratou ne taanaki ki roto iei, koia ne tautaufau atu kia ratou, “Kau see oro kese ma Jerusalem, kae fetari ki te sori a toku Mmana ne tongi kiei, ko te sori kuou ne faka ari atu kia kotou. 5#Mat 3.11; Mak 1.8; Luk 3.16; Jon 1.33.John ne faka uku uku kia vai, kae kia foi aso ka au, kotou ka faka uku ria ki te Mauri Tapu.”
Jesus ku saua ki te vaerangi
(Mak 16.19–20; Luk 24.50–53)
6Vasia o te kau fai fekau ku fekitei ki roto ma Jesus, koratou ne feesiri kiei, “Te Ariki ee, i te vasia nei ko kee ka kee fokisakina ko te Kainanga ki nga Israel?”
7Muna atu rei ko Jesus kia ratou, “Koa fakataunga ma vasia a toku Mmana e fai ki na kee manuu ia, kae siei ke kotou iroa ina. 8#Mat 28.19; Mak 16.15; Luk 24.47,48.Kae te vasia kotou ka nofo riaina e te Mauri Tapu o Tupua, ka nai faka makeke ria kotou, ma kotou ka rongo rongo saki ko aku taranga i Jerusalem, i Judea kaatoa rei, ma i Samaria, ma kia taangata kaatoa rei.” 9#Mak 16.19; Luk 24.50,51.Ia tua koia ne muna faka peinei, koia ku saua ina ki te vaerangi, ma koratou e pula kiei, ma te kauao ne nai funa ria ko aratou ono ono fanga.
10Ko aratou mata e koi pula rei ki te vaerangi i na vasia ku poi kese iei, i mo vasia a taangata e toka rua ku turaki ia ratou vasia, e fe urufi kia suru tea. 11Muna atu rei koraua, “Nga taangata o Galilee, sea natafito kotou e turaki o pula ki te vaerangi? Ko Jesus ku saua kese ki runga ma kotou ki te vaerangi, ka foki mai ia riu ara sokotasi ko kotou ku ono kiei e poi ki te vaerangi.”
Te siaki o Judas
(Mat 27.3–10)
12Tera te kau fai fekau ne foki oro ki Jerusalem mai te Maunga i Olive, iei si see mmao ma te noforanga lasi i Jerusalem. 13#Mat 10.2–4; Mak 3.16–19; Luk 6.14–16.Koratou ne fe urufi ki te noforanga, ma koratou ne oro ki ratou rota paito e fare iei: Peter, John, James ma Andrew, Philip ma Thomas, Bartholomew ma Matthew, James te tama a Alphaeus, Simon e ati te Patriot, ma Judas, te tama a James. 14Koratou e taanaki mau rei, o rotu taanaki ma nga maatua faafine, ma Mary te nana o Jesus, ma ana taina.
15Ia foi aso ki muri, te kano rotu ne taanaki e oko ki te tino te rau ma te tino rua (120), ma ko Peter ne tokai ake ki runga o araara. 16Muna rei koia, “Soavaka ma ee, te tusi ranga o te Pepa Tapu ke tonu rei, iei te Mauri Tapu o Tupua nai munakina kia David, nai araara fakina ko Judas, koia ka taki ia ratou ke puke ko Jesus. 17Ko Judas noko kau ia tatou kano faoa, natafito koia ne faka patino ria ke faka katoa ia tatou fainga fekau.”
18 #
Mat 27.3–8. (Kia mane a Judas ne nai saua ria i ana tukunga pariki, ne nai tauvia ria ko te kere tamate, i kuraa koia ne faka mate iei. Koia ne teka ki raro, tuakina rei na manava ki tua. 19Te kano fenua kaatoa e farenaki i Jerusalem ne fakarongo kiei, tera koratou ne ati ko te tofi ia ratou kee taranga: Akeldama, na atamai, “Te tofi o te toto”.) 20“Natafito e tusia ria i te Pepa o nga Psalms:
‘Tuku na paito ke tulaavaki.
Siei pe koai ke nai nofo ria.’
“Iei e tusia fokia,
‘Tuku se tangata ke sau i ana fainga fekau.’
21 #
Mat 3.16; Mak 1.9; 16.19; Luk 3.21; 24.51. “Tera e fetau fangatasi rei, ke faka patino se tangata ku nofo roa kotatou vasia te Ariki ko Jesus Christ noko fetau oro kotatou. 22E fakatafito rei mai ia faka uku uku ranga a John, ki te vasia o Jesus ku saua ina ki te vaerangi ma kotatou. Ki se tangata sokotasi ke faka katoa kia tatou, ke tatou araara fakina ko na masike ranga.”
23Tera koratou ne faka tuu koa taangata e toka rua: Joseph e ati ko Barsabbas (e iroa ina fokia ko Justus), ma Matthias. 24Tera koratou ne rotu, “Te Ariki ee, ko kee e kee iroa ina koa fatu manava o nga taangata kaatoa. Ta tera, te Ariki ee, faka patino mai kia matou ko te tangata sokotasi ia raua nei, ku kee faka patino ria. 25Ke sau ia fainga fekau a Judas pe te kau fai fekau, iei ko Judas ku faka oti ku poi ki na kee ngangea ia.” 26Tera koratou ne pee ko te taisi, ke faka patino ko se tangata ia raua nei. Te tangata ne faka patino ko Matthias, koia ne soko ki te kau fai fekau tino angafuru maa tasi nei.
© 2025 Wycliffe Bible Translators, Inc.