Rutu 3
3
Rutu walaala ku ntambalilo yakua Boazi
1Busiku bumo, Naomi waamwanine Rutu nangue, “Nene n'mpalile kukuufia evi ni we wikwatile nghanda yobe. 2Upalile kumana nangue ozu Boazi wakiba wabombelua na bakazyana bawakiba nabo, i kalubula wetu. Ale unvua, lelo kyungulo alikuya wauluzia nghano ku kyuluziizio. 3Ni pakako, nakwana usambe bwino wisube ni mafuta anunkiile, uvwale ngubo yobe i-umwene yawamiisie, mane uye wimane palia pa-alikuya wauluziizia. Inzi tekuti uye wilangisie kuli wene mpaka musita u alikuya kupwilapo kulia ni kumina. 4Upoozeko maano kumana pa-alikuya kulaala. Musita u alikuya kuona, uye umuvimbule ku makasa ni kulaala lya koko kwenka. Ni ye waya akwane vyakukita.”
5Rutu waamwaanine, “Naya nkite kubalua kantu kawanghana.”
6Rutu ni ye waile ku kyuluziizio ni kukita kubalua kantu mwamwaaniine nghinavyala. 7Boazi lu-aapwile kulia ni kumina, waasansamukile, waile kulaala mumbali mului wa nghano. Rutu waile buke buke, wamuvimbula Boazi ku makasa ni kulaala lya koko kwenka. 8Pakati busiku Boazi waatulumukile, mukwana nangue apilibuke, waapapile kumona mwanakazi waleele lya ku makasa akue. 9Boazi waamwipuziizie evi, “Uli ni?”
Wa-asukile nangue, “Ni nene mubombi obe Rutu, nvimbeko sie lupipi lwa ngubo yobe pantu wewe uli kalubula wetu. Nakulomba ube mulume wane.”
10Boazi waamwanine Rutu nangue, “We mwana wane, Yawe akupaale, pantu buwame buwakita, bwakila buwame buwaakitile pa mambo, pantu tewakibembua na balumendo, na bapabi ao na banonsi. 11Kansi we mwana wane tekutiina, nene ndikukukitila byonse muwalandila pantu bantu bonse mu ono muzi bamanine nangue uli mwanakazi wa mibeele iweme. 12#Rut 2.20Anzia kine nene ndi kalubula wa pepi, inzi kulanda kisinka, kuli ni unge kalubula apalamiisie kukila nene. 13Wewe pembela sie bono busiku bukie, kine ozo muntu wakaba kwitabila kukukitila mukipaliile mu lupua, kyakaba kuwama. Inzi kine akabe kukaana, nene nakaba kukukitila mukipaliile, nene nalapa mu Liina lyakua Yawe Mukose nangue nakaba kukupoozako maano. Ale laala sie bukie.”
14Kupwako, mwanakazi walaala ku ntambalilo mpaka ku makia. Waabuukile ku makia pa kamuntu uli ni, pantu Boazi waalandile nangue, “Tekipalile kimanike nangue ku kyuluziizio kwakiiza ni mwanakazi.” 15Boazi waamwanine evi, “Leeta ngubo i-uvwele u-ipanzike papa.” Ni ye waapanzikile. Boazi waamupongweleelepo nghano kukila pa kilo 20 ni kumutwika. Kupwako, Rutu waya ku muzi. 16Lu-aafikile ku nghanda, nghinavyala waamwipuziizie evi, “We mwana wane, ni syani?” Rutu waamubwilile byonse bi-aakitiilue na Boazi. 17Kabili waamwanine nangue, “Nghano i an'mpeelanga ezi. Walandanga evi, ‘Tekubwela minue kuli nokovyala.’”
18Nghinavyala waamwanine evi, “Ale teekamana sie upembele byakaba kukitika. Boazi tavinda kwikalapo sie pasili kupwisia ozu mulandu. Alikuupwisia lelo lyenka.”
Currently Selected:
Rutu 3: KBTP
Highlight
Share
Compare
Copy
Want to have your highlights saved across all your devices? Sign up or sign in
Kitaabua New Testament @The Word For The World Southern Africa. 2023.