Mapinda 6
6
Nsokezi ilekenkeene
1We mwana wane, kine waipeele kulipa mizia ya mwino,
kabili kine waalaile palwakua ozo muntu,
2Kine uteelue na biuliwalanda,
kabili kine ukwetue na twebo twa mu kanua kobe.
3We mwana wane, pakuti wipususie,
pantu waibiikile mu maboko a mwino, kita evi:
Endo wikeefie ni kumupaapaata mwino.
4Tekulekeela menso obe kunvua tulo,
ni nkopio yobe kuona.
5Iipususie nga kasia kapusuka mu minue ya mbwela,
ao nga koni kapusuka mu minue ya mutei.
6Endo waya pa lupazi we munanghani,
langakana nzila yakue ube ni mulangue.
7Lupazi teluli na kalombozi,
na mukulu-ao na kateeka.
8Inzi lulilwaibiikila bilio bya pa musita wa likungulu,
kabili lulilwaikolonghaniizia bilio pa musita wa buzombozi.
9We munanghani! Waya waleeleleele sie mpaka musitaki?
Ulikubuuka musitaki mu tulo tobe?
10 #
Map 24.33-34
Uliwalanda nangue, “Ndaalenkepo kaniini, nghonenkepo kaniini,
nkunzenkepo kuboko kaniini ni kutuuzia.”
11Ni evi bupabi bwakaba kukwizila nga kabooko,
ni kubulua kwakaba kukukonka nga kipoopoosi ali ni kilwilo.
12Muntu mubi, muntu wa mpuni,
aliwaendooka walimukulanda twebo twa bupompo.
13Aliwakapia na menso akue ni kusinia na makasa akue,
aliwakita tulangi na minue yakue.
14Mu mutima mwakue muli bupompo, aliwalangakana bubi musita onse,
ni kubyala mbezu ya bupusano.
15Ni pakako, bwavia bwaakamutulumukilila sie,
waakatulumukililua ni kutyonua pasili kumona ntuukilo.
16Kuli bintu mutanda bisuulilue na Yawe,
ee, bintu kilooba bilibyamukisia mutima.
17Menso a kiitoni, lulimi lulilwalanda bufi,
ni minue iliyazuumia mulopa usili na kafi,
18Mutima uliwalangakana malanga abi,
ni maulu angukile kubutukila ku bubi,
19Musininkizi wa bufi aliwalanda bufi,
ni olia aliwabyala mbezu ya mbiikizi mu lupua.
Nsokezi palua bukambue
20We mwana wane, konka milao yakua so,
kabili tekuti ukabe kulekela masambilizio akua noko.
21Kakilila milao lyonse mu mutima obe,
ivwale mu mukosi obe.
22Luuliwaenda, milao yaya yakulombwele,
lu-uliwalaala yaya ya kusungile.
Ni kukulanzia lu-uliwabuuka.
23Pantu ezi milao i musaniko,
aza masambilizio i kisue,
ni nsokezi ya masambilizio
i nzila ya bukose.
24I bya kukusunga ku mwanakazi mubi,
ni ku lubembo lwa mwanakazi mukambue.
25Tekutokamua mu mutima obe na kuwama kwakue,
kabili tekulekelela akubembe na nkopio ya menso akue.
26Pantu mwanakazi mukambue kuti waongua na mutengo wa kisoso kya mukate,
inzi pa muka nghwana aliwazeeziiziapo bukose bwine bwine.
27Eba, kubako muntu kuti wabiika mulilo mu nkulo,
ni bivwalo byakue pasili kuzia?
28Ao muntu kuti wanyanta lukasa pa mazekezeke a mulilo,
ni makasa akue pasili kuzia?
29Evi i vili muntu aliwaingila kwa muka nghwana,
kubalua muntu aliwamukumia takabula kukandua.
30Bantu tebezi kumufuupula kabooko
kine waibila kwikuta pantu ali ni nzala.
31Inzi kine wakwatua, alikubweziiziamo nghendo kilooba,
ni ye alikufumia bunonsi bonse bwa mu nghanda yakue.
32Inzi olia aliwakita bukambue na mwanakazi, tali na maano.
Olia aliwatona kwinoona mutima wakue mwine, i aliwakita evio.
33Wene waakaaluka ni bilonda ni busoni,
ni kulandilua bibiipile tekukapua.
34Pantu bunkua bulibwamuleetela mulume kipuki.
Ni ye takaba na nkumbu busiku bwa kukita kibwelezi.
35Takeetabila nfuto ata imo,
kabili takeetabila bituulilo anzia kine bikabe byavulile.
Currently Selected:
Mapinda 6: KBTP
Highlight
Copy
Compare
Share
Want to have your highlights saved across all your devices? Sign up or sign in
Kitaabua New Testament @The Word For The World Southern Africa. 2023.
