Mapinda 4
4
Kibwezia kya mulangue
1Mwe baana bane, unvue mafunde akua sinue,
kabili twilizie evi mube ni maano.
2Pantu ndimukumipeela mafunde aweme,
tekuti mukasie masambilizio ane.
3Lunaali mwana mu nghanda yakua tawe,
nakili kalala, mwana lyonga wakua yangu.
4Tawe waali wansambilizia walanda nangue,
“Mutima obe uye walanguluka twebo twane,
sunga milao yane, ni we ulikuya wali mukose.
5Ba wali ni mulangue, ba wali ni kyunvwila
tekulaba ao kukaana twebo twa mu kanua kane.
6Tekumusia mulangue, ni ye alikukulabukila,
mutone, ni ye alikukusunga.
7Ntendeko ya mulangue ni ezi: Ba wali ni mulangue.
Anzia uzeeziiziapo byonse bi-uli nabio, kya mponvu ba wali ni kyunvwila.
8Mukindike, ni ye alikukukindika.
Kine wamukumbatila alikukukindika.
9Alikukupeela buwame kuba kitambala ku mutue obe,
alikukufwanizia na ngala ya bulumba.”
10Twilizia we mwana wane, itabila bindimukulanda,
ni myaka ya bukose bobe ilikuvula.
11Nakusambilizia nzila ya mulangue,
nakulombola mu tusansaila twa bulunghami.
12Luuliwaenda, lutanfu lobe telukilinghaniiwa.
Kine wakunduka tewipuutala.
13Kwatisia mafunde, pasili ku-aleka aye,
akwatisia, pantu ene i bukose bobe.
14Tekwingila mu nzila ya babi,
tekukonka mibeele ya bantu babi.
15Leya ezio nzila, kabili tekwendamo,
isie uye mu nzila yobe.
16Pantu tebezi kulaala kine tebanakitenke bubi,
ni tulo tetwizi kuoneka kine tebanapuutazie muntu.
17Pantu bubi i bilio byabo.
Nghemo ikata i divai yabo.
18Nzila ya balunghami ili nga kisue kya ku makia,
kilikyailundilako mpaka bwakiililila.
19Inzi nzila ya babi ili nga nfinzi ikata,
ni kilikyabeepuutazia tebakimanine.
20We mwana wane, pooza maano ku bindimukulanda,
teya kutui ku twebo twane.
21Tekubifumia pa menso obe,
bisunge bwino mu mutima obe.
22Pantu i bukose ku muntu aliwabisyukila.
Kabili i kutuuka kwa mubili wakue onse.
23Sunga mutima obe kukila byonse biuliwasunga,
pantu i mulimwafuma byonse bi-uliwakita.
24Sunga kanua kobe ku twebo twa bukisanguka,
ni milomo ya kiitoni ibe kule ni wewe.
25Menso obe akente ku ntanzi,
ni nkopio yobe pasili kukapa.
26 #
Bae 12.13
Pooza maano mulimwapita makasa obe,
ni nzila yobe yonse iwamiiwe bwino.
27Tekupilibukila kulio ao kuso,
fumia kuulu kobe mu bubi.
Currently Selected:
Mapinda 4: KBTP
Highlight
Copy
Compare
Share
Want to have your highlights saved across all your devices? Sign up or sign in
Kitaabua New Testament @The Word For The World Southern Africa. 2023.
