Mapinda 31
31
Nsokezi yakua likolo Lemueli
1Bulanzi bwakua likolo Lemueli, bu-aasambiliziiziwe na nghina.
2We mwana wane, twilizia! Twilizia, we mwana wa munda mwane!
Twilizia, we mwana wane, we bwasuko bwa mapepo ane.
3Tekupeela banakazi maka obe,
ao nzila yobe ku balia balibavulunghania likolo.
4We Lemueli, makolo teapalile kumina divai,
Makolo teapalile.
Ao bakindami kutokamua bikolani.
5Bakeeza kukolua ni kulaba mizilo,
bakeeza kubiibikizia nsambu ya muntu aliwaema.
6Bwalua bululile, ni ku balia balimukuzeeza.
Ni divai, ni ku balia bali ni bulanda bukata mu mutima.
7Baleke bamine ni kulaba bupabi bwabo,
evi tekuti baye balanguluka nghemo yabo ata kaniini.
8Landilako bakameme bonse,
ni kusampulula balia basili na wa kubakwasia.
9Asamuna kanua kobe upingule mu nsambu.
Bapabi pamo ni babuliilue, ubapeele nsambu yabo.
Mwanakazi wa mibeele iweme
10Mwanakazi wa mibeele iweme alikumonekela pi?
Pantu mutengo wakue ukilile mabue a mutengo.
11Mutima wakua mulume wakue umuketekeele,
ni ye takabula kibwezia.
12Aliwamukitila biweme tekuba bibiipile,
nsiku yonse ya bukose bwakue.
13Aliwakeba sufu ni kitani,
ni kubomba miilo yakue na mutima onse.
14Wene ali nga bwato bwa makwebo.
Aliwaleeta bilio byakue kufuma kule.
15Aliwabuuka paakili lukeelekeele,
aliwapeela bilio ku bantu ba mu nghanda yakue,
ni babombi bakue banakazi miilo yabo.
16Aliwakenta bukaba ni kubusita.
Mu bikwatua bya mu minue yakue i mu-aliwabyalila bukaba bwa mizabibu.
17Aliwabomba miilo yakue na maka,
ni kulumia maboko akue.
18Aliwamona nangue makwebo akue ali ni kibwezia.
Musaniko wakue tewizi kuzima musita wa busiku.
19Aliwasuka nyunzi na minue yakue,
ni maboko akue akwatiliile.
20Aliwaolola maboko akue ku bapabi,
ee, aliwaolwela maboko akue ku babuliilue.
21Tezi kutiina kasama pa mulandu wa bantu ba mu nghanda yakue,
pantu bonse ba mu nghanda yakue bavwikilue ngubo ya kasi.
22Aliwaikitila ngubo ya pa bulita bwakue.
Aliwavwala ngubo ya kitani kiweme ni ya mukumino wa bulumbi.
23Mulume wakue amanikile mu milyango,
lu-aliwaikala pakati ka masiiko a kyalo.
24Aliwakita ngubo ya kitani ni kusisia.
Aliwasisia misipi ku basulu.
25Maka ni mukinzi i ngubo yakue.
Aliwasekelela pa mulandu wa musita uliwaiza.
26Aliwa-asamuna kanua kakue na mulangue,
ni mizilo ya buwame ili mu kanua kakue.
27Aliwakentesia nzila ya bantu ba mu nghanda yakue,
kabili tezi kulia bilio bya bunanghani.
28Baana bakue balibamukuuta lisyuko.
Mulume wakue aliwamukuuta evio vyenka, ni kumutasia walanda nangue,
29“Bakazyana bengi balibakita biweme,
inzi wewe ukilile bonse.”
30Monekelo iliyabeepa, ni kuwama kwa lukebu, ni kwa mpuni.
Inzi mwanakazi aliwatiina Yawe i aliwatasiiwa.
31Mukindike mu byonse bi-aliwakita na maboko akue,
ni miilo yakue imuleetela mukinzi ponse.
Currently Selected:
Mapinda 31: KBTP
Highlight
Copy
Compare
Share
Want to have your highlights saved across all your devices? Sign up or sign in
Kitaabua New Testament @The Word For The World Southern Africa. 2023.