Mapinda 2
2
Kilambu kya mulangue
1We mwana wane, kine waitabila twebo twane,
ni kusunga bwino mafunde ane mukati mobe,
2Pamo ni kuteya kutui kobe kuti kutwilizie mulangue,
ni kunvwisia mu mutima obe,
3Kisinka kine wamukuuta mulangue,
ni kumana wamuzanzwila lizui,
4Kabili kine wabakeba nga mutofue,
ni kubakebelezia nga bukonto bufiikilue,
5I paulikumana vya kumutiina Yawe,
ni kwinika vya kumumana Leza.
6Pantu Yawe aliwapeela bantu mulangue,
mu kanua kakue mulimwafuma bukengezi ni kumana.
7Aliwabiikila balunghami bukonto,
wene i kisoolelo kya balia balibaenda mu kisinka.
8Aliwalabukila nghendelo ya bantu balibakita bintu bya nsambu,
ni kusunga nzila ya bazuuke bakue.
9Kine wewe wantwilizia ulikwinika bulunghami ni nsambu pamo ni kisinka.
Ulikwinika kubalua nzila iweme.
10Pantu mulangue alikwingila mu mutima obe,
ni maano alikusansamusia bukose bobe.
11Kwinika kulikukusunga,
ni kumana kulikukulabukila.
12Mulangue alikukupususia mu nzila ya babi,
ni ku bantu balibalanda twebo tubi.
13Bantu balibasia nzila ilungi
pakuti bende mu nzila ya nfinzi,
14Bantu balibawaminua kukita bibiipile,
ni kusansamukila mu bupompo bwa bubi,
15Tusansaila twabo, ni twa mampetompeto,
ni nzila yabo teyololokele.
16Mulangue alikukupususia ku mwanakazi mukambue,
ku mwanakazi mweni ali ni twebo twa kubembia.
17Mwanakazi aliwasia kibuza wa mu bukazyana bwakue,
ni kulaba kipingo kyakua Leza wakue.
18Kisinka nghanda yakue ilungi ku lufu,
ni ku bafwile i kulungheeme nzila yakue.
19Bonse balibaya kuli wene, tepali aliwabwela,
ao kubwelela ku nzila ya bukose.
20Ni pakako upalile kuya waendela mu nzila ya bantu baweme,
ni kukonka mibeele ya balunghami.
21Pantu balunghami baakeekala mu kyalo,
ni basili na kabi baakeekalililamo.
22Inzi babi baakafumiiwa mu kyalo,
ni bankitatubi baakanukuluamo.
Currently Selected:
Mapinda 2: KBTP
Highlight
Copy
Compare
Share
Want to have your highlights saved across all your devices? Sign up or sign in
Kitaabua New Testament @The Word For The World Southern Africa. 2023.
