Mapinda 15
15
1Bwasuko bwa bufuuke bulibwafuukia kipuki,
inzi twebo twa kusasa tulitwaleeta kipuki.
2Lulimi lwa muntu wa mulangue lulilwaleeta bukengezi ni bulunghami,
inzi kanua ka kipuba kalikasalanghania bupuba.
3Menso akua Yawe amwene ponse,
akentele pa babi ni pa baweme.
4Lulimi lufuuke, i kimuti kya bukose,
inzi kiitoni kili mukati kilikyatoobola mutima.
5Kipuba aliwafuupula mafunde akua se,
inzi olia ali ni maano aliwakonka nsokezi.
6Mu nghanda mwa mulunghami muli bukonto bwingi,
inzi bunonsi bwa babi, bulibwaleeta lwinoono.
7Milomo ya ba mulangue, iliyasalanghania bukengezi,
inzi mutima wa babipuba te evio.
8Ngelelo ya mubi, kilubo kuli Yawe,
inzi mapepo a mulunghami, aliamusansamusia Yawe.
9Yawe asuulile nzila ya mubi,
inzi wene atonene olia aliwakonka bulunghami.
10Olia aliwasia nzila iweme, aliwakandua,
ni asitonene kusokua, aliwafua.
11Kine lufu ni lwinoono bili ku menso akua Yawe,
paliibufi mitima ya bantu.
12Muntu wa mufuupula, tezi kutona kulungikua,
kabili tezi kutona kwipuzia muntu wa maano.
13Mutima wa nsansa, uliwalangisia lukebu lwa nsansa,
inzi bulanda bwa mu mutima, bulibwalengia mweo kutooboka.
14Mutima wa maano uliwakeba bukengezi,
Inzi kanua ka babipuba kalikalia bupuba.
15Nsiku yonse ya muntu aliwaema, ibiipile,
inzi muntu wa nsansa, ali mu maliila lyonse.
16Kyawama kuba ni bunonsi buniini wali ni katiina kuli Yawe,
kukila kuba ni bunonsi bwingi wali ni lyemo.
17Kyawama kulia saasa palia pali ntono,
kukila kulia nghombe anonene palia pali kukendana.
18Muntu wa kipuki kikata aliwalengia mazibo,
inzi olia asiliwalenga kufiitua, aliwapwisia bikanza.
19Nzila ya munanghani isakiluemo myunga,
inzi nzila ya mulunghami iwamiiziwe.
20Mwana wa mulangue aliwamusansamusia se,
inzi kipuba aliwamufuupula nghina.
21Bupuba i nsansa ya muntu asili na maano,
inzi akengeele aliwawamia lwendo lwakue.
22Kine tekuli nsokezi, butantiko bulibwakilikilua,
inzi kine pali nsokezi ingi bulibwalunduluka.
23Muntu aliwawaminua na bwasuko buweme,
ni keebo kalikalandua pa musita upalile, kalikakila kuwama.
24Nzila ya muntu wa mulangue ilungi mwiulu ku bukose,
evi tekuti akookele kumbo.
25Yawe aliwatuuta nghanda ya olia ali ni kiitoni,
inzi aliwabiika mupaka wa musolo wa mwanakazi afwiliilue na mulume.
26Yawe asuulile malanga a babi,
inzi twebo tuweme tulitwamuwamina.
27Olia aliwatokamua bunonsi, aliwaemia lupua lwakue,
inzi olia asitonene bituulilo, waakaba mukose.
28Mutima wa mulunghami uliwalangakana musango wakwasukilamo,
inzi kanua ka kipuba kalikafumia bubi.
29Yawe ali kule ni babi,
inzi aliwaunvua mapepo a mulunghami.
30Kisue kya menso kilikyasansamusia mutima,
ni mpunda iweme iliyainia bikuza.
31Kutui kulikwatwilizia nsokezi iweme,
kulikwaikala pa balia bali ni mulangue.
32Olia aliwakaana masambilizio, aliwaisuula ye mwine,
inzi olia aliwaunvua lu-aliwasasililua, aliwakengela.
33Kutiina Yawe i masambilizio a mulangue,
ni bufuuke, bulibwatangilila mukinzi.
Currently Selected:
Mapinda 15: KBTP
Highlight
Copy
Compare
Share
Want to have your highlights saved across all your devices? Sign up or sign in
Kitaabua New Testament @The Word For The World Southern Africa. 2023.