Mapinda 14
14
1Mwanakazi wa mulangue aliwakuula nghanda yakue,
inzi kipuba aliwatuuta nghanda yakue na minue yakue.
2Olia aliwaenda mu bulunghami bwakue, aliwatiina Yawe,
inzi olia asili mulunghami mu nzila yakue, aliwamufuupula.
3Mu kanua ka kipuba muli nfimbo ya kiitoni,
inzi twebo twa muntu wa mulangue tulitwamusunga.
4Kine tekuli nghombe, mu mukondo mulimwabula bilio,
inzi maka a nghombe alialeeta bilio.
5Musininkizi wa kisinka tavinda kulanda bufi,
inzi musininkizi wa bufi, mupuza wakue ni bufinke sie.
6Muntu wa kapuni aliwakeba mulangue, ni ye tezi kuusanga,
inzi bukengezi bulengele ku muntu aliwainika.
7Fuma ku menso a kipuba,
pantu ku milomo yakue teukonvuako maano.
8Mulangue wa muntu wa maano, kulangakana nzila yakue,
inzi bupuba bwa babipuba, bupomponke sie.
9Babipuba tebezi kusakamana lubalibabala,
inzi balunghami balibatona kweleelua na Leza.
10Mutima i umanine bulanda bwakue,
ni mweni tavinda kwampana nakue mu nsansa yakue.
11Nghanda ya mubi iliyaloviiwa,
inzi katanda ka mulunghami kalikabeelelela.
12 #
Map 16.25
Kuli nzila imwenekele yaweme ku menso a muntu,
inzi ku mpeleezio iliyatwala ku lufu.
13Anzia useka, mutima waya wali ni bulanda.
Nsansa luiliyapua, palipaiza bulanda.
14Olia aliwabwelela pa kyamba mu mutima wakue, aliwawaminua mu nzila yakue mwine,
ni mulunghami aliwalambulua na bikitua byakue.
15Kipuba aliwaitabila kubalua kantu,
inzi wa mulangue aliwakenta pa kunyanta.
16Wa mulangue aliwatiina Yawe ni kwikeka ku bubi,
inzi kipuba tezi kwisakamana, kabili aliwakita lubilo lubilo.
17Olia asiliwakokola kufiitua, aliwakita bya bupuba,
ni onse aliwakita bubi aliwasuulua.
18Babipuba balibapyana bupuba,
inzi ba maano balibavwala ngala ya bukengezi.
19Babi balibafwinama ku ntanzi ya balia balibakita biweme,
ni ba bibalo mu milyango ya balunghami.
20Mupabi aliwasuulua na mupabi nakue,
inzi munonsi ali ni babibuza bengi.
21Olia aliwapunika mwinakue, aliwaluvia,
inzi olia aliwaunvwila mupabi nkumbu, asyukile.
22Eba! Balia balibalangakana bibiipile tebezi kuluvia?
inzi ntono ni bukisinka bili na balia balibalangakana biweme.
23Kubomba na mute kulikwaleeta kibwezia,
inzi bulanzi bwa mpuni bulibwaleeta bupabi.
24Ngala ya ba mulangue, bunonsi bwabo,
inzi bupuba bwa babipuba, bupubanke sie.
25Musininkizi wa kiine aliwapususia mitima ya bantu,
inzi olia aliwabeepa, aliwaleeta bupompo.
26Aliwatiina Yawe ali ni maswapi alumine,
ni baana bakue baakaba ni kwa kubutukila.
27Kutiina Yawe i kasulo ka bukose,
kabili i kwikeka ku miteo ya lufu.
28Bulumba bwakua likolo, bwingi bwa bantu bakue,
inzi kukeepa kwa bantu, kwinooneka kwakua kateeka.
29Olia asiliwalenga kufiitua ali ni maano engi,
inzi olia ali ni mutima wa kasonto aliwalumba bupuba.
30Mutima wa mutende, uliwaleeta bukose bwa mubili,
inzi bunkua, bulibwabozia bikuza.
31Olia aliwakyuzia mupabi, aliwatuka Kabumba wabo,
inzi olia aliwaunvwila nkumbu muntu abulilue, aliwakindika Kabumba.
32Mubi aliwatintilua pansi pa mulandu wa bunkitatubi bwakue,
inzi mulunghami ali ni maswapi mu kufua kwakue.
33Mu mutima wa muntu ali ni mulangue i muli maano,
inzi tezi kusangua mu mutima wa babipuba.
34Bulunghami, bulibwakindamika ntundu,
inzi kibalo, kilikyaleeta lutiipu ku bantu bonse.
35Likolo aliwawaminua na mubombi aliwabomba na mulangue,
inzi kikonko kyakue kili pa olia aliwakita bintu bisipalile.
Currently Selected:
Mapinda 14: KBTP
Highlight
Copy
Compare
Share
Want to have your highlights saved across all your devices? Sign up or sign in
Kitaabua New Testament @The Word For The World Southern Africa. 2023.