Nehemia 6
6
Balwani bamukambila Nehemia
1Sanibalati, ni Tobia, ni Gesemi Muarabu, pamo ni balwani betu baali basyelepo lubaunvwile mpunda nangue, nakikuula paakale kibumba, kabili nangue tekusyele nkendo ituutikile, anzia pa ozo musita naali nsinabiike milyango, 2Sanibalati ni Gesemi baalaiziizie mikenzi ya kunghana nangue, “Iza mu muzi umo wa mu lulambe lwa Ono.” Inzi mapange abo aali a kunkitila kibiipile. 3Ni nene naalaiziizie mikenzi kwabo ya kubaana nangue, “Ezi miilo indimukubomba ni ikata, ni pakako, nene nsiizako. Ale kindikwimikila miilo pa mulandu wa kwiza koko ni kiki?”
4Ni bo baatwaliliile kulaizia nghendo yonse ina balanda sie twebo tumonke, ni ne nakaana sie.
5Kabili Sanibalati waatumine mubombi wakue watweme ni lupapulo tekuba lwaizeelue. Lolu lwaali lwendo lwa busaano. 6Mu lupapulo mwaali mwalembelue evi,
“Mpunda ilimukunvwika ku Bazima, ni Gesemi alimukusininkizia nangue wewe pamo ni Bayuda, mulimukukambila kwisangula. Ni pakako, i kimulimukukuulila paakale kibumba. Kukonkana ni ezio mpunda, wewe ulimukukeba kuba likolo wabo. 7Wewe usoobwele bakabika bakuti babikule pa mulandu obe mu Yeruzalemu nangue mu kyalo kya Yudea muli ni likolo, ni evi likolo wakaba kubwilua mubeeleele ezi milandu. Ni pakako tupalile kulanzyania.”
8Ni nene na-asukile nangue, “Bebi biwalanda tebiliko, walanda sie bya mu mutue obe.”
9Baba bonse balimukukeba sie kututiinia balanda nangue, “Bakaba kunakapo sie, ni miilo teikaba kubombeka.” Inzi naamulombele Leza nalanda, “Ale n'mpeele maka.”
10Busiku bumo naile ku nghanda yakua Semaia mwina Delaia, Delaia mwina Mehetabeli waali waizaliilue mu nghanda yakue. Ni ye waalandile nangue, “Twende tusaakaane mu Nghanda yakua Leza ni kwikiikilila pantu bakambiile kwiza kukwipaya. Ee, kwiza kukwipaya busiku.”
11Naalandile evi, “Kubako muntu ali nga nene kuti wabutuka? Kubako muntu ali nga nene kuti waingila mu Nghanda yakua Leza kuti epususie? Nene nsingilamo.”
12Kisinka nainikile nangue taatuminue na Leza, inzi waakitile sie ezi mbiko pa mulandu wane, pantu Tobia ni Sanibalati baamulipile. 13Baamulipile kuti eze antiinie, evi pa nduvia bamone mulandu ubi wa kunfuupwilapo.
14“We Leza wane languluka Tobia ni Sanibalati kukonkana ni bikitua byabo, kabili languluka ni Noadia kabika mwanakazi, ni bange bakabika basyelepo balimukukeba kuntiinia.”
Kibumba kyapua kukuulua paakale
15Kibumba kyaakuulilue nsiku 52, ni kyo kyaapwile pa nsiku 25 ya mwezi wa Eluli. 16Balwani betu bonse lubaunvwile evio, balia Bazima bonse baali batuzyungulukiile ni bo baatiinine ni kwitoobokelela bo bene, pantu bainikile nangue ezio miilo yaabombelue na bukwasi bwakua Leza wetu.
17Mu ezio nsiku, banombozi ba Bayuda baali bamutumiine Tobia mpapulo ingi, ni maasuko akua Tobia aali afika kuli bene. 18Mu Yudea mwaali bantu bengi baali balapile pa mulandu wakue, pantu waali muko wakua Sekania mwina Ara, ni Yohanani mwanaye waali waupile mwina Mesulamu mwina Berekia. 19Kabili baalandile bikitua byakue biweme kuli nene, ni ye baamwanine vinaalandile. Inzi Tobia ni ye waatwaliliile kuntumina mpapulo ya kuntiinia.
Currently Selected:
Nehemia 6: KBTP
Highlight
Copy
Compare
Share
Want to have your highlights saved across all your devices? Sign up or sign in
Kitaabua New Testament @The Word For The World Southern Africa. 2023.
