Nehemia 4
4
Balwani balwisia miilo
1Sanibalati lu-aunvwile nangue twaali twalimukukuula paakale kibumba, waafiitilue ni kukisua mutima, ni kutendeka kubapunika Bayuda. 2Waalandile ntanzi ya balupua bakue, ni ntanzi ya balukale ba Basamaria nangue, “Kubako baba Bayuda bananghani kuti bakitaki? Eba, kuti baikuulila paakale kyubo? Kubako kuti baelelamo ni ngelelo? Kuti bapua mu busiku bumo? Kubako kuti babombia mabue elikiliilue na mului uziile wa bintu bituutikile?”
3Kupwako, Tobia Muamoni waali wali pepi nakue walanda nangue, “Keki kibalimukukuula paakale anzia kine mumbue waiza kuselapo, kuti wabunghumuna kibumba kyabo kya mabue.”
4Ni ne naapepele, “Twilizia we Leza wetu, pantu twakila kufuupulua. Ozu mufuupula ubabwelele bo bene, baleke bateekue buzia mu kyalo kya bweni, 5kabili tekuvimba bubi bwabo ao kweleela bibalo byabo, pantu bakikuluvia ntanzi ya balia balibakuula.”
6Ni pakako, fwefue twatwaaliliile kukuula paakale kibumba, kibumba kyonse twakikuulile mpaka pa bukata mu kutuuluka kwa kibumba, pantu bantu baali bali ni mutima wa kubomba miilo.
7Kabili Sanibalati ni Tobia, ni Ba-arabu, ni Ba-amoni, ni Ba-asidodi, lubaunvwile nangue miilo ya kukuula paakale kibumba kya Yeruzalemu itwaliliile, ni palia paali patuutikile pakizibua, baakilile kufiitua. 8Libumba lyabo lyonse, lyaabambile kukambila kuti beze balwisie Yeruzalemu ni kuleeta kinvulunghania mukati muzi. 9Inzi twaapepele kuli Leza wetu, ni kubiika bakalinda bakutukingilila busiku ni koba.
10Pa ozo wenka musita Bayuda baalandile evi,
“Maka a balia balibatwama bitwamo akeepa,
Kabili pali mului ukata wa bintu bituutikile bya kutwanzia kukuula paakale kibumba.”
11Balwani ni bo baalandile nangue, “Tebakaba kumana ao kumona musita utwakaba kwiza pakati kabo ni kubeepaya, pamo ni kulovia ozu mwilo wabo.” 12Bayuda baali baikeele pepi ni balwani betu lubaunvwile twebo twabo, baizile kutusoka nghendo lyanondo nangue, “Konse kumwaakaya, baakamisakukila.”
13Ni pakako, naabiikile bantu ku kyamba kya kibumba kiipi ni paali pali tepanakuulue, naabiikilepo bantu mubabeelele mu lupua lwabo, bantu baali bali ni bipanga byabo, ni mikuuki, pamo ni mata abo. 14Lunaamwene nangue bantu batooboka, naabaanine babiloolo, ni bemanizi, pamo ni bantu bange bonse nangue, “Tekutiine balwani benu, languluke vili bukulu bwakua Mulopue ni vi-ali ni maka. Kansi lue ni balwani benu pa mulandu wa lupua lwenu ni baana benu balalume ni banakazi, ni pa mulandu wa bakazi benu, pamo ni nghanda yenu.” 15Balwani betu lubainikile nangue twaunvua kale mpunda, ni kwinika nangue Leza wakiinoona mapange abo, fwe bonse twaabweleele ku kibumba kubalua muntu pa mwilo wakue.
16Kutula pa ozo musita, nsempu ya babombi bane baatwaliliile kubomba koku inge nsempu ya babombi yalimukubomba mwilo wa bukalinda batweme mikuuki, ni bisoolelo, ni mata, ni makanzu a byela. Babiloolo betu baali bali ku lubali lwa Bayuda 17baali bakuula kibumba. Balia baali batwama bitwamo bya makuule, kubalua muntu waali wabomba na kuboko kumo ni kunge wakwete kilwilo. 18Bakakuula ni bo, kubalua muntu waali wakuula wakakile kipanga mu kitungu. Ni wakulizia ntandala waali wali pepi ni nene.
19Naabaanine babiloolo, ni bemanizi, pamo ni bantu bange bonse nangue, “Miilo ivulile, kabili itanine, ni fwefue twakisalanghaniwa mu kibumba kubalua muntu kule ni mwinakue, 20lyonse kine mwaunvua ntandala yalila, palamineko, pantu Leza wetu alikutulwila.” 21Ni pakako, twaatwaliliile kubomba, bangepo pakati ketu baali batweme mikuuki kutula lukeelekeele mpaka musita wa kumoneka kwa ntanda.
22Ozo wenka musita, na-anine kubalua mwalalume pamo ni mubombi wakue bekale mu Yeruzalemu musita wa busiku, evi tuye twali ni bakutusunga musita wa busiku, ni musita wa koba baye batwaliliile kubomba. 23Ni pakako, nene ni lupua lwane, ni babombi bane, ni bakalinda baali bankonkele, tetwaavuulile ngubo yetu. Kubalua muntu waali waya ku kutapa menda watweme ni kilwilo kyakue.
Currently Selected:
Nehemia 4: KBTP
Highlight
Copy
Compare
Share
Want to have your highlights saved across all your devices? Sign up or sign in
Kitaabua New Testament @The Word For The World Southern Africa. 2023.
