Kutendeka 49
49
Yakobo wapaala baana bakue
1Yakobo waakuutile baana bakue wabaana nangue, “Ize munkolonghane n'myane bintu byaakamikitikila mu nsiku ya ku ntanzi.
2“Mwe bena Yakobo, kolonghane munvue.
Mutwilizie sinue Izraeli.
3“Rubeni, wewe uli libeli wane,
maka ane ni ntendeko ya kuluma kwane,
mukulu mu mukinzi, mukulu mu buvinde.
4Wewe uliwabiluluka nga menda.
Teukaba wakindeeme,
pantu waaselele pa bulita bwakua so
ni kubutiikaania.
5“Simeoni ni Lawi, ni benenke.
Bipanga byabo i bilwilo bya bubi.
6We mutima wane, tekwingila mu mapange abo a mu kafiso.
Bulumba bwane tekuti bwampane na kilie kyabo
pantu baipaile muntu na kipuki kyabo,
ni mubutaale bwabo baaputwile misipa ya nghombe ndume.
7Kikonko kyabo kitiipue, pantu kikilile kusasa,
ni kipuki kyabo pantu tekyaali na nkumbu.
Naakabakasania muli Yakobo.
Naakabasalanghania muli Izraeli.
8“We Yuda, ba kobe baakakutasia.
Kuboko kobe kwaakaba pa mukosi wa balwani bobe.
Baana bena so baakakukontamina.
9 #
Mpe 24.9; Nfy 5.5 Yuda, i nkalamu musoka
kufuma mu kwipaya nama, we mwana wane wakibwela.
Wene waakonteeme, waifiika nga nkalamu,
nga nkalamu mukota, nani waakamubuusia?
10Nfimbo teikafuma mu Yuda,
ao kabango ka bukolo mu maulu akue,
mpaka Shilo akeeze,
wene waakanakilua na ntundu.
11Wene waakakakila punda wakue ku muzabibu,
ni musoka wa punda ku muzabibu uwamiisie.
Waakufula ngubo yakue mu divai,
ni bivwalo byakue mu mulopa wa mizabibu.
12Menso akue akaba akasikile na divai.
Meeno akue aswetele na mabeele.
13“Zabuloni waakeekala mumbali lyezi,
ni ye waakaba kyabu kya maato.
Mipaka yakue yaakaba yafikile ku Sidona.
14“Isakari i punda alumine
aliwaifiika mu bipata bya mikooko.
15Amwene nkendo ya kutuuziapo paweme,
ni kyalo nangue kyaali kyafwaniine.
Akoosiizie kikoope kyakue kuti kitwame bitwamo,
ni kuya wali mubombi wa miilo ikolele.
16“Dani waakapingula bantu bakue
nga umo wa mu mikoa yakua Izraeli.
17Dani waakaba kizoka kya mumbali musebo,
kizoka kiniini kya mumbali nzila kili ni bwimba
kilikyasuma farasi ku kasinghino
ni aselelepo wapona kansenia.
18“We Yawe, n'mpembeele bupusuko bobe.
19“Gadi, waakasakukilua na libumba,
inzi wene waakabasakukila ni kubakonka.
20“Mu kyalo kya Aseri mwaakaba bilio bingi,
ni ye waakaba wafumia bya kulia biweme bya makolo.
21“Nafutali i mbazi asikakilue
aliwalanda twebo tuweme.
22“Yusufu i musambo wa mazabo,
musambo wa mazabo mumbali kasulo.
Misambo yakue itambaleele mu kibumba.
23Wene waasakukiilue na bantu bali ni mivui,
baamulasile mivui ni kumwemia.
24Inzi buta bwakue bwaasyele bwalumine,
maboko akue aalumiiziwe na maboko akua wa Maka onse, wakua Yakobo.
Wa-aalwilue musungi wa mikooko, libue lyakua Izraeli,
25Na Leza wakua so waakakukwasia.
Na Leza wa Maka onse waakakupaala.
Na mapaalo a mwiulu mu muulu,
mapaalo a mu biina bifikile pansi,
mapaalo a konsia ni a kwimita.
26Mapaalo akua so ni akata kukila
mapaalo a mpili ya kale,
kukila bintu bitonekele bya mpili ya muyayaya.
Bebi byonse biye byali pa mutue wakua Yusufu,
pa mpala yakua mulombozi pa bakuluube.
27“Benyamina i mumbue asasile.
Lukeelekeele alikulia mabingo, ni kyungulo alikukasania bi-aipayanga.”
28Ezi i mikoa lyanondo ni ibili yakua Izraeli, kabili evi i viba-aninue na sibo ni kubapaala kubalua muntu mapaalo akue.
Kufua ni kuziikua kwakua Yakobo
29Yakobo waabaanine baana bakue nangue, “Evi pasyankabe kufua ni kuya ku bantu bane. Mukabe kunziika mu kilibu kili mu bukaba bwakua Efuroni Muhiti, 30#Kut 23.3-20kilibu kili mu bukaba bwa ku Makipela lya ku kabanga ka Mamure mu kyalo kya Kanaani, kilibu kyaasitilue na Abrahamu pamo ni bukaba bwakua Efuroni Muhiti, evi iye yali nkendo ya kuziikamo bantu bakue. 31#Kut 25.9-10; 35.29Momo i mwaaziikilue Abrahamu ni mukazi wakue Sara, momo i mwaaziikilue Izaaki ni mukazi wakue Rebeka, kabili momo i munaaziikile mukazi wane Lea. 32Bobo bukaba pamo ni kilibu kilimo, byaasitilue ku bena Heti.” 33#Mii 7.15Yakobo lu-aapwile kulanda na baana bakue, waaleele pa bulita ni kufua. Waakolonghaniiziwe pamo ni bantu bakue.
Currently Selected:
Kutendeka 49: KBTP
Highlight
Share
Compare
Copy
Want to have your highlights saved across all your devices? Sign up or sign in
Kitaabua New Testament @The Word For The World Southern Africa. 2023.
