Kutendeka 47
47
1Yusufu waile kumwana Farao nangue, “Tawe ni bakuluamwine kufuma ku Kanaani, bakiiza ni bisepe bya nghombe ni bya mikooko pamo ni bintu byonse bibali nabio. Evi bali ku Goseni.” 2Waatweme bakuluube basaano ni kuya kubalangisia kuli Farao. 3Farao waabeepuziizie babo bantu, “Mulimwabomba mwiloki?”
Baamwasukile Farao, “Fwefue tuli basungi ba nama nga vyaali babikolue betu. 4Twaiza twikale mu keno kyalo pantu mu kyalo kya Kanaani nzala yakila kubiipa, kabili ni bikusi bya kuliisia nama yetu tekuli. Ni pakako, twapaapaata utwitabizie kwikala ku Goseni.” 5Farao waamwanine Yusufu, “Kyawama pantu so ni bakuluubo bakiiza. 6Kyalo kya Misri kili mu maboko obe. Baleke bakuluubo pamo ni so bekale pa nkendo iwamiisie ya Goseni. Kabili kine umaninepo bantu bapamine, ukababiike pa busungi bwa nama yane.”
7Yusufu waile kumulangisia se Yakobo kuli Farao. Yakobo waamupaalile Farao. 8Farao waamwipuziizie Yakobo, “Uli na myaka inga?”
9Yakobo wa-asukile evi, “Ndi sie na myaka 130, kabili naali nakuukakuuka sie. Babikolue bane ni bo baali bakuukakuuka sie. Inzi bene baikeele myaka ingi, kabili ni bwikazi bwabo tebwaali bwabiipile nga bwane.” 10Kupwako, Yakobo wamupaala Farao ni kufumamo waya. 11Yusufu waamupeele se ni bakuluube nkendo yaali yawamiisie ya mu kyalo kya Misri pepi ni muzi wa Ramese nga mwa-aniinue na Farao. 12Yakobo ni baana bakue pamo ni luvyalo lwakue lonse, baali bapeelua bilio na Yusufu kukonkana ni bwingi bwa baana babo.
Kimina kya nzala
13Nzala yaakilile kubiipa mpaka bilio byapwililika mu kyalo kyonse, bantu ba mu Misri ni ba ku Kanaani baemiiziwe sana na nzala. 14Yusufu waakolonghaniizie nfolanga yonse yaamwenekele mu kyalo kya Misri ni mu kyalo kya Kanaani, ezio yaanonkelue lubaasisiizie nghano. Yusufu waatwele nfolanga mu nghanda yakua Farao. 15Nfolanga yonse luyaapwile mu kyalo kya Misri ni kya Kanaani, Bamisri baile kumwana Yusufu nangue, “Tupeele bilio tukeeza kufua na nzala pa ntanzi yobe pantu tetukili na nfolanga.”
16Yusufu waabaanine evi, “Kine temukwete nfolanga, n'mpeele nama yenu ni nene n'mipeele bilio.” 17Bamisri baamupeele Yusufu farasi, ni mikooko, ni mbuzi, ni nghombe, pamo ni punda. Ni wene waabapeele bilio bya kulia mwaka onse walingi.
18Mwaka waakonkelepo, baile kumwana Yusufu nangue, “Tetuvinda kukufiika kantu. We mukulu, nfolanga yetu yonse yapua, ni bisepe bya nama bitwaali nabio twaakupeele. Evi tetukili kabili na kantu ka kukupeela, inga sie mibili yetu ni kyalo kyetu. 19Tekutulekeela tufue pa ntanzi yobe, fwefue ni kyalo kyetu. Kansi twaipeela sie utusite fwefue benka ni kyalo kyetu na bilio, evi tuye twali bazia bakua Farao, twalomba utupeele bilio tulie tukafua, ni kyalo kyetu kikeeza kusyala kibolia.”
20Yusufu waamusitiile Farao kyalo kyonse kya Misri. Bamisri baasisiizie kyalo pa mulandu wa nzala yaakilile kubiipa. Kyalo kyonse kya Misri kya-alukile kyakua Farao. 21Yusufu waakuusiizie Bamisri kufuma mu mipaka yonse ya Misri ni kubaleeta mukati mizi. 22Inga sie nkendo yaali yaikeelemo babitambua i isyaasitilue pantu Farao waali wabapeela bilio bya kulia. Keki i kyaalengele tekuti basisie nkendo yabo. 23Yusufu waabaanine bantu nangue, “Unvue, kyalo pamo ni mwemue namusitila Farao. Ale poke mbezu ezi mubyale mu makaba enu. 24Pa musita wa kuzombola, mukabuulepo kimo kya pa bisaano ni kumupeela Farao, ni byaakasyalapo i bimwaakaba mwafumiapo mbezu ni bilio bimwaakaba mwalia ni baana benu pamo ni ba mu nghanda yenu.”
25Baalandile evi, “We mukulu, wabomba. Evi watupususia. Twaitabila kuya twali bazia bakua Farao.” 26Ozu mulandu Yusufu waukitile kuba muzilo nangue, kimo kya pa bisaano kiye kyapeelua likolo. Leli lifunde ni lenu kumo likiliko. Inga sie mu nkendo yaali yaikeelemo babitambua.
Kulomba kwa mpeelezio kwakua Yakobo
27Baizraeli baikeele ku Goseni mu Misri momo mubaanonkele, baasandulukile ni kukila kuvula. 28Yakobo waikeele mu Misri myaka lyanondo ni kilooba. Myaka yonse yaikeele Yakobo pa kyalo yaali 147. 29#Kut 49.29-32; 50.6Kufua kwakua Izraeli lukwaapaleeme, waamukuutile mwana wakue Yusufu wamwana nangue, “Kine wangitabizia, biika kuboko kobe kwinsina litanta lyane unkitile kiweme ni kisinka. Nakulomba tekuti ukanziike mu Misri. 30Inzi pankafua ntonene ukanziike kolia kwaaziikilue babikolue bane.”
Yusufu wa-asukile evi, “Nakaba kukita nga muwalandila.”
31Izraeli waalandile evi, “Ale ndapile.” Yusufu walapa. Kupwako, Izraeli wafwinamina pa bulita lya ku mitue.
Currently Selected:
Kutendeka 47: KBTP
Highlight
Share
Copy
Want to have your highlights saved across all your devices? Sign up or sign in
Kitaabua New Testament @The Word For The World Southern Africa. 2023.
