Kufuma 37
37
Kukitua kwa Lisanduku lya Kipingo
(Kufuma 25.10-22)
1Besaleli waakitile Lisanduku lya Kipingo lya mbao ya kimuti kya kasiiya. Lyaali lyaleepele metre imo ni santimetre 25, mu bukata lyaali lyatanine santimetre 75, ni mu kutuuluka lyaali lyatuulukile santimetre 75. 2Waakupileko oro isambikile mukati ni panze, ni mumbali waazyungulusiiziemo lufito lwa oro. 3Waakitile bikobo bina bya oro ni kubibiika ku tufuli tuna twa lisanduku. Bibili ku bwala bumo ni bibili ku bunge bwala. 4Kabili waakitile mipingo ibili ya kimuti kya kasiiya ni kukupako oro. 5Mipingo ya kupingilako wai-ingiziizie mu bikobo bya ku lisanduku kumbali yonse ibili. 6Waakitile ntupiko ya oro isambikile. Ezio ntupiko yaali yaleepele metre imo ni santimetre 25, ni mu bukata santimetre 75. 7Waakitile makerubi abili atililue bwino ali a oro ni kuemika ku mpeleezio ibili ya ntupiko mu kuleepa. 8Waakitile likerubi limo ku mpeleezio imo, ni linge ku inge mpeleezio. Azo makerubi wa-akitiliile ku ntupiko ku mpeleezio yakue ibili. 9Azo makerubi aali alendwile mapaapi abo mu muulu lya pa ntupiko akupiliile lisanduku, ni nkebu yabo yakenteene lya pa ntupiko.
Kukitua kwa meza ya mikate ya kilangililo
(Kufuma 25.23-30)
10Waakitile meza ya kimuti kya kasiiya yaali yaleepele metre imo ni mu bukata yatanine santimetre 50, ni mu kutuuluka yaali yatuulukile santimetre 75. 11Waakupileko oro isambikile, ni mumbali waazyungulusiiziemo lufito lwa oro. 12Waazyungulusiizie lufito lwatuulukile santimetre mwanda, kusyali kupisia ni mukovio wa oro ku lufito. 13Waakitile bikobo bina bya oro ni kubibiika ku tufuli tuna twa meza lya palia pabeeleele mikonzo. 14Bebio bikobo byaabiikilue pepi na mbao ya pa muulu. Momo i mwaali mwakwingizia mipingo ya kupingilako meza. 15Waakitile mipingo ya kimuti kya kasiiya ni kukupako oro. Ezio mipingo yaali ya kupingilako meza. 16Kabili waakitile masaani, ni mpindi, ni bibakuli pamo ni makopo a kubombia ku bupe bwa bya kumina. Bebio bibombelo byonse bya pa meza waabikitile byali bya oro isambikile.
Kukitua kwa kya kuteekapo matala
(Kufuma 25.31-40)
17Waakitile kya kuteekapo matala kya oro itililue yasambikile bwino. Kya kwimikapo pamo ni mukonzo wakue, ni tubakuli twakue twaali twali nga maluba, ni mapingu akue pamo ni maani akue, byaali byalundeene kumo.
18Ku ozo mukonzo umo kwaali kwafumine misambo mutanda. Misambo itatu ku bwala bumo, ni inge itatu ku bunge bwala. 19Ku musambo umo kwaali kwali tubakuli tutatu tuli nga maluba a almonde ali ni mapingu pamo ni maani a azo enka maluba. Ku musambo unge ni ko baakitileko evio vyenka mpaka ku misambo yonse mutanda yaali yafumine ku ozo mukonzo. 20Ni ku mukonzo wa pa bukata uli pa kya kuteekapo kwaali kwali tubakuli tuna tuli nga maluba a almonde ni mapingu pamo ni maani a azo enka maluba. 21Ntanzi ya kufika pa misambo ibili paali pali lipingu lya liluba limo. Kyaali kyali evio ku misambo ibili ya mambo, ni ku misambo ibili ya bubili, pamo ni ku misambo ibili ya butatu 22Mukonzo ni misambo yakue yonse byaali byakitiliilue kumo ni kya kuteekapo. Kyonse kyaali kyali kya oro itililue yasambikile. 23Besaleli waakitile matala kilooba, ni nmano pamo ni bisaani na oro isambikile. 24Waakitile kya kuteekapo matala pamo ni bibombelo byonse na kilo 35 ya oro isambikile.
Kukitua kwa kitale kya kufunkiiziapo bubaani
(Kufuma 30.1-5)
25Waakitile kitale kya kimuti kya kasiiya kya kufunkiiziapo bubaani. Waakitile kyalingheene monse monse, kyaali kyali na santimetre 50 mu kuleepa ni mu bukata. Mu kutuuluka kyaali metre imo. Bintu bituulukile nga masengo byaali byalundeene na kitale. 26Peulu ni mumbali monse pamo ni ku mbao ituulukile nga masengo, ni ku mikonzo yonse ina waakupileko oro isambikile, ni peulu lya mumbali waazyungulusiiziemo mukovio wa oro. 27Waakitile bikobo bibili ku bwala bumo bwa kitale, ni binge bibili ku bunge bwala mwinsina olia mukovio wa oro. Mu bebio bikobo i mwaali mwakwingizia mipingo ya kupingilako. 28Waakitile mipingo ya kimuti kya kasiiya ni kukupako oro.
Kukitua kwa mafuta azuuke ni bubaani
(Kufuma 30.22-38)
29 #
Kuf 30.22-38
Kabili waakitile mafuta azuuke, ni bubaani buweme bwa mafuta anunkiile. Azo mafuta aakitilue na bantu bamanine ozo mwilo.
Currently Selected:
Kufuma 37: KBTP
Highlight
Share
Compare
Copy
Want to have your highlights saved across all your devices? Sign up or sign in
Kitaabua New Testament @The Word For The World Southern Africa. 2023.
