Kufuma 33
33
Yawe waana Baizraeli bafume ku Lupili lwa Sinai
1 #
Kut 12.7; 26.3; 28.13 Yawe waamwanine Musa nangue, “Ale fuma pano, wewe ni bantu bawaafumizie mu kyalo kya Misri, uye nabo mu kyalo kinalaile kupeela Abrahamu, ni Izaaki pamo ni Yakobo lunaalandile nangue keki i kyalo kinaakapeela nvyalo yobe. 2Naakatuma malaika wakuti akabe wamitangiliile, kabili naakakumba Bakanaani, ni Ba-amori, ni Bahiti, ni Baperizi, ni Bahivi pamo ni Bayebusi. 3Mwakaba kwingila mu kyalo kiizuzimo mabeele ni kapelo, inzi nene nsikaba kuya pamo nenu nkeeza kumiloviizia mu nzila pantu muli babisanguka ni bafinine mitima.”
4Bantu lubaunvwile ezio mpunda ibi, baalilile. Ni pakako, baavuulile bifwanizio byabo. 5Pantu Yawe waali wamwanine Musa abaane Baizraeli nangue, “Mwemue muli bantu bafinine mitima. Kine naezia kuya nenu, anzia kine ni kamusita kaniini, ndikumilovia. Kansi vuule bifwanizio byenu, evi n'mone vindikukita.” 6Ni pakako, kutula musita ubaafumine pa lupili lwa Horebu, Baizraeli te baavwele kabili bifwanizio byabo.
Liema lya kusaakaaninamo
7Musa waali ni mibeele ya kutwama liema ni kuliimika kunze, kule ni mitanda, ni lyo lyaali lyakuutua liema lya kusaakaaninamo. Kubalua muntu waali ni ka kumwipuzia Yawe, waali wafuma mu mitanda ni kuya mu liema lya kusaakaaninamo kunze ya mitanda. 8Musa lu-aali wafuma ni kuya ku lelio liema, kubalua muntu waali waimana mu mulyango wa ku mutanda wakue wakenteleele mpaka musita u-alikwingila mu liema. 9Musa lu-aaliwaingila mu liema, lipumpu lya lilezi lyaali lyakooka ni kwimana pa mulyango wa liema, Yawe lu-aali walanzyania ni Musa. 10Bantu bonse lubaali bamona lipumpu lya lilezi lyaimana pa mulyango wa liema, kubalua muntu waali waimana ni kupupa pa mulyango wa mutanda wakue. 11Yawe waali walanda bakenteene ni Musa nga muntu alimukulanzyania na kibuza wakue. Pa kyamba, Musa waali wafuma ni kubwelela ku mitanda. Inzi mulumendo Yoshua, mwana mwina Nuni, mubombi wakua Musa, taali wafuma mu liema.
Musa wamona bulumba bwakua Yawe
12Musa waamwanine Yawe nangue, “Unvua, wewe wakilanda evi, ‘Fumia baba bantu,’ inzi tewakinghana kine nani unakaba kuya nakue. Wakilanda sie nangue, ‘Nkumanine mu liina lyobe, ni evi nkwitabiile.’ 13Kansi evi kine ungitabiile, nsambilizie nzila yobe pakuti nkumane, ni kwitabilua ntanzi yobe. Nakulomba wizukile nangue ezi ntundu i bantu bobe.”
14Yawe waamwasukile evi, “Nakaba kuya pamo nobe ni kukupeela kutuuzia. Kubalua kantu kaakaba ka kuwamiine”
15Musa waamwanine evi, “Kine teukaba kuya pamo ni fwefue, tekuti ukabe kutufumia pano. 16Ale bantu kuti bamana syani nangue ungitabiziizie nene ni bantu bobe kine teuya pamo ni fwefue? Kine waya pamo ni fwefue ulikutulengia kuba bantu bebeeleeleko pa bantu bonse bali pa kyalo.”
17Yawe waamwanine Musa nangue, “Ndikukita evio vyenka muwalandila, pantu unghwamiine, kabili nkumanine mu liina lyobe.”
18Musa waalandile evi, “Nakupaapaata unangisie bulumba bobe.”
19 #
Bar 9.15
Yawe waamwasukile evi, “Nakaba kupisia buwame bwane bonse pa ntanzi yobe ni kusimikila Liina lyane ‘Yawe’ pa ntanzi yobe. Kabili nakaba kulangisia buwame ku onse unaakatona kulangisia buwame, ni kweleela onse unaakatona kweleela. 20Inzi wewe teuvinda kunkenta ku lukebu lwane, pantu muntu tavinda kumona lukebu lwane ni kusyala wakosele, 21inzi wewe imana nane pa ozu mwalala. 22Musita ulikupita bulumba bwane, ndikukuzindika mu mulale wa mwalala ni kupita nakuvimbiliile kuboko kwane. 23Pa kyamba nasyapitile, ndikukuvimbula kuboko kwane, ni we ulikumonako sie musana wane, inzi lukebu lwane teulumona.”
Currently Selected:
Kufuma 33: KBTP
Highlight
Share
Compare
Copy
Want to have your highlights saved across all your devices? Sign up or sign in
Kitaabua New Testament @The Word For The World Southern Africa. 2023.
