Kufuma 19
19
Baizraeli ku Lupili lwa Sinai
1-2Baizraeli baafumine ku Refidimumu, ni mu busiku bwa mambo bwa mwezi wa butatu pa kyamba kya kufuma ku Misri, baile kufika mu Kaseeba ka Sinai. Koko i kubaimikile mitanda yabo mwinsina Lupili lwa Sinai. 3Pa kyamba, Musa waaselele ku lupili aye asaakaane ni Leza.
Yawe waamukuutile ni kumwana nangue, “Peela aza mafunde ku Baizraeli, nvyalo yakua Yakobo ni kubaana nangue, 4‘Mwakimona vinakikita ku Bamisri, kabili mumanine vinakimitwama nga nzwiba atweme twana twakue pa mapaapi. Nene nakimipalamika mu kyeni kyane. 5#Mam 4.20; 7.6; 14.2; 26.18; Tit 2.14; 1 Pet 2.9Ni pakako, kine mwanakila kisinka lizui lyane ni kusunga kipingo kyane, mulikuya mwali bunonsi bwane bwa mponvu pa ntundu yonse anzia kine kyalo kyonse ni bunonsi bwane. 6#Nfy 1.6; 5.10Mulikuya mwali bukolo bwane bwa babitambua, kabili mulikuya mwali ntundu yane izuuke.’ Ezi i mpunda i wakaba kulanda ku Baizraeli.” 7Ni pakako, Musa waakookele kufuma ku lupili. Waakuutile masiiko a bantu ni kubalondolwela twebo tonse mwaalandiile Yawe. 8Ni bantu bonse baitabiile mwakimo balanda nangue, “Bintu byonse byalandanga Yawe tulikukita.” Kupwako, Musa waya kubwezia kapingu kuli Yawe.
9Yawe waamwanine Musa nangue, “Ndikukwizila mu lilezi litikeeme evi bantu beyunvwile ni kukuketekela lyonse musita undikuya nalanda nobe.”
Kupwako, Musa wamwana Yawe twebo twaalandilue na bantu. 10Kabili Yawe waamwanine Musa nangue, “Ale kooka uye uteanie bantu pa mulandu wa kwiza kwane, ubazuukie lelo ni lukeele ni kubaana bafule ngubo yabo, 11evi busiku bwa butatu bakabe kusangua baiteaniizie pantu bobo busiku nakaba kukookela pa Lupili lwa Sinai ni bantu bonse bamwene. 12#Bae 12.18-20Ukabe kusakilila lupili lonse ni kubaana tekuti bakabe kusela ku lolu lupili, ao kwezia kukumiako, kabili tekuti bakabe kutaaluka lusako. Kubalua muntu wakaba kukumia ku lolu lupili wakaba kwipawa. 13Ozo muntu wakaba kwipawa sie na kutootua mabue ao kulasua mivui pasili kukumiiwa. Anzia kine ni nama wakaba kwipawa evio nyenka. Inzi ntandala paikaba kulila yakonkeene, bantu bakabe kusela ku lupili.”
14Ni pakako, Musa waakookele kufuma ku lupili ni kuya kuzuukia bantu, ni bo baafulile ngubo yabo. 15Waabaanine bantu nangue, “Mu ezi nsiku itatu ikale mwaiteaniizie, kabili tekukumane na mwanakazi.”
16 #
Nfy 4.5; Mam 4.11-12 Busiku bwa butatu lukeelekeele, ku lupili kwaali kwali bimpenimpeni ni mitukumo pamo ni lilezi litikeeme, kabili kwaunvwikile lizui likata lya ntandala, ni bantu bonse baali mu mitanda baatutumine na mwezo. 17Musa waafumiizie bantu mu mitanda ni kubalombola kuti baye bakumane ni Leza. Baile kwimana mwinsina lupili. 18Lupili lonse lwa Sinai lwaakupilue na kyunsi pantu Yawe waakookeelepo wali mu mulilo. Kyunsi kyaafutumukile mu lupili nga kyunsi kya kikuka kikata kya mulilo. Lupili lonse lwaatentele bubi bubi. 19Lizui lya ntandala lulyaakilile kulila na maka, Musa waalandile, Leza ni ye waamwasukile mu mutukumo. 20Yawe waakookeele peulu Lupili lwa Sinai ni kumukuuta Musa aselepo. Musa ni ye waaselele pa lupili. 21Kabili Yawe waamwanine Musa nangue, “Kooka ubasoke bantu tekuti basakulule lusako ni kwiza kun'mona, pantu kine bakita evio, bengi pakati kabo nga balikufua. 22Babitambua balikun'mpalamina ni bo bapalile kwizuukia, kine te evio ndikubakanda.”
23Musa waamukanzile Yawe walanda nangue, “Bantu tebavinda kusela pa Lupili lwa Sinai pantu we mwine wakitusoka nangue, ‘Sakilile lusako lwazyungukiile lupili ni kuluzuukia.’”
24Yawe waamwasukile evi, “Kooka uye umutwame Haruni usele nakue. Inzi babitambua pamo ni bantu bonse bene tekuti bezie kukiluka lusako ni kwiza kuli nene, pantu nga ndikubakanda.” 25Ni pakako, Musa waakookeele ku bantu ni kuya kubaana nga mwa-aniinue Yawe
Currently Selected:
Kufuma 19: KBTP
Highlight
Share
Compare
Copy
Want to have your highlights saved across all your devices? Sign up or sign in
Kitaabua New Testament @The Word For The World Southern Africa. 2023.
