Amosi 5
5
Amosi wa-ana bantu balapile
1Mwe Baizraeli, twilizie totu twebo twa lwimbo lwa malilo lundimukumimbila.
2“Kinundue Izraeli aponene,
takikabuuka,
waasiilue waleele pansi,
tekuli wa kumukwasia kubuuka.”
3Yawe Kabezia Mpungu wa-ana Baizraeli nangue,
“Muzi waakatuma balukale 1,000 ku bului,
kwaakabwela sie balukale 100.
Muzi waakatuma balukale 100 ku bului,
kwaakabwela sie balukale lyanondo.”
4Yawe wabaana Baizraeli nangue,
“Nkebe mube ni bukose.
5Tekunkebe ku Beteli,
tekuye ku Gilgali,
tekwabuke kuya ku Bersheba.
Pantu Gilgali, kisinka waakaya mu buzia.
Ni Beteli waaka-alulua kuba mpuni.”
6Mukebe Yawe mube ni bukose,
kine te evio, Yawe waakapyanga bantu ba mu nghanda yakua Yusufu nga mulilo.
Ozo mulilo waakazizia Beteli,
tekuli muntu waakauzimia.
7Lisyamo lyenu mwe baliba-alulula nsambu kuba bwimba bululile,
ni kupooza nsambu pansi.
8 #
Yob 9.9; 38.31 Olia waakitile Bulimina ni Kipindabusiku pamo ni Orioni,
olia aliwa-alulula nfinzi kuba lukeelekeele,
ni musita wa koba kuba busiku,
olia aliwakuuta menda a lyezi ni ku-etila pa kyalo,
Liina lyakue i Yawe.
9Aliwainoona nghanda lubilo lubilo,
ni kutuuta byubo bya mizi.
10Basuulile olia aliwasasililana mu kilie,
baleebwile olia aliwalanda kisinka.
11Mulimwaabiibikizia bapabi,
ni kubeebila buzombozi mu kusonkia musonko.
Ni pakako, anzia kine mwaakuulile nghanda ya mabue,
temukeekalamo.
Anzia kine mwaalimine bukaba bwa mizabibu,
temukamina divai ya mizabibu.
12Pantu n'manine vivulile bilubo byenu
ni vitanine bibalo byenu.
Mulimwaemia bantu basili na kilubo ni kupoka bituulilo,
kabili mulimwatana bapabi nsambu mu kilie.
13Ni pakako, olia akengeele aliwatalala pa musita nga ozo,
pantu musita ubiipile.
14Kite biweme, tekuba bibiipile,
evi mube ni bukose.
Ni Yawe Leza wa Maka onse waakaba pamo nenu
nga vimulimwalanda nangue pa-ali.
15Suule bibiipile, tone biweme,
biike nsambu mu bilie.
Pange Yawe Leza wa Maka onse waakeeleela
bantu basyele bakosele ba mu luvyalo lwakua Yusufu.
16Ni pakako, Mulopue Yawe Leza wa Maka onse walanda evi,
“Kwaakaba malilo mu misebo yonse,
kuloosia kwa bulanda mu kubalua kisaakaanino kya bantu.
Balimi baakakuutua kwiza kulila,
ni ba kuloosia bakeeza kuloosia.
17Mu makaba onse a mizabibu mwaakaba malilo.
Pantu naakeeza kupita pakati kenu,”
koku i kulanda kwakua Yawe.
Busiku bwakua Yawe
18Lisyamo kuli mwe balibatokamua
busiku bwakua Yawe.
Mulimwatokaminuaki busiku bwakua Yawe?
Bobo busiku bwaakaba nfinzi, tekuba kisue.
19Kyaakaba nga muntu wabutuka nkalamu,
wasaakaana na kimbui,
wapanda ku kimbui, waingila mu nghanda yakue, ni kukikilizia kuboko kwakue ku kibumba,
wasumua na nzoka.
20Kubako busiku bwakua Yawe tebukaba nfinzi, pasili kuba kisue?
Kubako teikaba nfinzi ikata isili na minghenghe?
21 #
Isa 1.11-14
Yawe walanda nangue, “Nsuulile, ndeebwile nsikunkulu yenu ya mpupo,
nsiwamiinue na kulonghana kwenu.
22Anzia kili evio, mulimwandeetela ngelelo ya kuzizia ni bupe bwa bunga
nsikabipokelela.
Anzia kine mulimwaleeta bupe bwa mutende,
nsikabukentako. 23Lekele nsungu ya nghimbo yenu,
nsikatwilizia nghimbo ya bilimba byenu.
24Inzi lekele nsambu ipongoke nga mwenzi,
bulunghami bube nga kaezi kasili kakama.
25 #
Mii 7.42-43
“Kubako mwe Baizraeli, mwandeeteele ngelelo ni bupe
mu kaseeba mu elia myaka 40?
26Mwakilendula kitale kyakua likolo wenu,
Sukoti kateeka leza wenu,
ni Kiuni leza wenu wa lutanda,
bamwaikitiile mwe bene.
27Ni pakako, naakamitwala mu kyalo kya buzia, kule kupita ku Damaski,”
koku i kulanda kwakua Yawe, ali ni Liina lya Leza wa Maka onse.
Kitaabua New Testament @The Word For The World Southern Africa. 2023.