Mateus 23

Hesus e Hatalamael Yalemat Hataingehiri Faülüül Farisi ma Lei Tanahori Faraü

(Markus 12.38-39; Lukas 11.43, 46; 20.45-46)

1Hesus e titiro ngariil marahara la moiye ihira ma marahara lei tabwer eda haüül bwa, 2“Lei tanahori Farau ma Farisi na e wol ppoul bwa labwe tapa nifaari Faraura yaari Moses. 3Haubwe faülüüni uruteri marahara la hauhemi bwa haubwe faülü, nga dari na hau tawai faülü iyahara la faülüüni bwanasahü na la tai tabweni ramahara la hori kaü. 4La hädi tarapari mar ssau lada hamasüyatahe uwawori talühüül yalemat lada hatapeilihilihi ifar, nga la tai kupeti bwa labwe tapangil lolor. 5La faülü uruteri faülümire bwa yalemat labwe habaühüül. Hau habaühü kalofari marahara räniyeri patari Farüförü Liya ra la hohongari faduhul ma paüül. Nga haubwe par habaühü kameseri hamahori üffael ra la hamasüngeri üffael! 6La masariye burukara e maho ifiri tarapari sänne ma räniyeri maato taitei räni iimweri uwolongolong, 7nga la masari na yalemat labwe haparüül ma wanisao nga la masari bwa yalemat labwe fadöngüngeriil bwa, ‘Tanaho’. 8Hami ra e tawol re ebwe fadöngüngerihami bwa, ‘Tanaho’, bwa hami ra hau ppari hafeiyaraho ma urutemi nga har demarü yami Tanaho. 9Nga e tawol demarü yalematara haubwe fadöngüngeri bwa, ‘Papa’ ma uwawori weidarop, bwa hara demarü na Tamami nga e mire weirengi. 10Nga e tawol re ebwe fadöngüngeri hemi bwa, ‘Mataffa’, bwa hara demarü Mesias na yami mataffa. 11Yalematara e taitei dewa ma uworumi ra ebwe lei yami haküröü. 12Yalemata-hara la hataiteiye demarul, ra labwe hatahitaroil, nga marahara la hatahitarowa tipael, ra labwe hataiteiil.

Hesus E Tapa Yael Tirobwat

(Markus 12.40; Lukas 11.39-42, 44, 52; 20.47)

13“Tarapari halofalof dewa na ebwe bwito iyolomi, hami lei tanahori Farau ma Farisi! Hami lei tirobwat! Hau tiiye masuye hatamari farüyeri weirengi ma iyoloil yalemat, nga hami nga hau tai itirango nga hau tai hatabwe ngariil iyahara la masari itirango bwa labwe itirango.

14[“Tarapari halofalof dewa na ebwe bwito iyolomi, hami tanahori Farau ma Farisi! Hami lei tirobwat! Hau halofolofael faifire hara e mori made liile, hauda pilani hapitehil, hauda hannahahami ni matael yalemat ifiri yami hakameseya yami sipesipe. Hahalihelira haubwe taraengari ra e hamatahütöhü dewa!]

15“Tarapari halofalof dewa na ebwe bwito iyolomi, hami tanahori Farau ma Farisi! Hami lei tirobwat! Hau talahi nimatawa nga hau iiti ilout hauda raho uwawori pipiyeri farüye bwa haubwe wehiti tiperi demarü yalemat bwa ebwe tabweya na yami moumou; nga eda wol re e tabwehami nga hauda par faaülü dewa yalematara bwa ebwe para itiraho dewa ma imowami eda wehami ra haubwe püngütiwo farüyeri yefi.

16“Tarapari halofalof dewa na ebwe bwito iyolomi, lei taburi matami ra hau yarael yalemat! Hau hori kaü bwa, ‘Nga sahü nga yalemat e hori Templo bwa yaar hatödü, ira nga e süya bwa e tawai faaülü titirowe e hatabotabo bwa ebwe faülü. Nga sahü nga eda hori kolt ra e mire räni Templo bwa yaar hatödü, ira nga hataingehir dewa bwa ebwe faaülü na eda mori hatabotabo bwa ebwe faaülü.’ 17Hami pabuseng ra e tabu matami! Iyefa e tarapar nifaar, ira kolt hale ira Templo ra e faaülü ra kolt bwa ebwe liya? 18Nga hauda para hori kaü bwa, ‘Nga sahü nga yalemat e hori altar bwa yaar hatödü, ira nga e süye bwa e tawai faaülü na eda mori hatabotabo bwa ebwe faaülü. Nga sahü nga eda hori ra ffahi ra e mire uwawori altar bwa yara hatödü, ira nga hataingehir dewa bwa ebwe faülü na eda mori hatabotabo bwa ebwe faaülü.’ 19E tabu dewa matami! Iyefa ra e tarapar nifaar, ira ffahi hale ira altar ra e faaülü ra ffahi bwa ebwe liya? 20Ira nga e haitina, yalematara e hori altar bwa yaar hatödü, ira nga e hori altar ma uruteri ffahi hara e mire uwawori altar bwa yaar hatödü. 21Nga sahü nga eda hori Templo bwa yaar hatödü, ira nga e hori Templo ma Dios ra e mire räni Templo bwa yaar hatödü. 22Nga sahü nga yalemat eda hädi weirengi bwa yaar hatödü, ira nga e hori räniyeri Dios, ma yalematara e maato uwawori räniyara bwa yaar hatödü.

23“Tarapari halofalof dewa na ebwe bwito iyolomi, hami tanahori Farau ma Farisi! Hami lei tirobwat! Hau hädini uwari yami fatoh hauda hariye Tamoru hara töt ma werihin bwa fahiriyemi, nga irasahü söüri na hau faaülü ifiri uwari fatoh hara nifaari hanauri mwangaü ra mint ma dill ma cumin; nga hauda tai tabweya we hatödüri we e dölü Farau, bwa haubwe faülüngeriil yalemat titiro maho, nga hau mäni fahöü, nga hau mäni hatödü. Iyahara-mo hataingehiri-mo haubwe faülüüni, nga e paado sahü yami faülüüni iyahara palüül. 24Hami lei taburi matami ra hau yarael yalemat! Hau tibatawau raamu ma räni rumemi sarü hauda hatauya ra camel!

25“Tarapari halofalof dewa na ebwe bwito iyolomi, hami tanahori Farau ma Farisi! Hami lei tirobwat! Hau wasa rühüri yami tahahu ma yami tapiye, nga dari na e uulo marahara yami tahahu ma yami tapiye ifiri marahara hau hädini ifiri yami faiini ma yami tipemwiih. 26Heer Farisi ra e tabu matamu! Hobwe uhori wasa ra räni ira tahahu ma tapiye bwa ebwe süye bwa rühür nga ebwe faheya!

27“Tarapari halofalof dewa na ebwe bwito iyolomi, hami tanahori Farau ma Farisi! Hami lei tirobwat! Hau weya faülüri ribwa hara e maho hapaühür ira ruhur nga räni ribwahara ra e ulori ssiil lei made. 28Ira sahü souri na hau faülü. Hau hanangariil yalemat bwa hau maho, nga dari na faringörüngörümi ra e uulo ifiri tirobwat ma tammaü.

Hesus e Tapa Faülüri Hahalihelil

(Lukas 11.47-51)

29“Tarapari halofalof dewa na ebwe bwito iyolomi, hami tanahori Farau ma Farisi! Hami lei tirobwat! Hau faaülü mahowa ribwael profeta nga hau hamahere hamahori yapapalayel marahawe lei tipangahi, 30nga hau dölü bwa e weya me haubwe da mori fada retiperi nno hawe yael marahawe wotamami nga e tawau süya bwa haubwe faülü marahawe la faaülüni lada riil profeta. 31Meihira nga hau ngütahe bwa hami wonoul marahawe la riil profeta! 32Hau buwou hauda habwangi na marahawe sapitohomi la hapurotaheya. 33Hami rabuto ma rauri rabuto! Ebwe feita hauda rru bwa hau tawai püngütiwo farüyeri yefi? 34Meihira nga ibwe hauhami bwa ibwe hatalilatoho palüül profeta ma lei talamari tipayel ma tanaho, nga hami ra haubwe riil palüül nga hau hädiil palüül hauda siforungeriil kurus nga hau wautuul palüül ma räni iimweri uwolongolong nga hau tabwetalila raho räni pipiyeri wotawot. 35Ira sapir nga erau bwitiwo uwawomi hahalihelil marahawe la riil yalemat hawe e tawol tammaüül; ebwe hapurotahe ma ifiri-mo faiiniri Abel we e tawol tammaür eda tohotiwo ifiri faiiniri Sakarias we rauri Berekia we hau riiye ma nipatari Templo ma altar. 36Ibwe hau dewahami bwa hahalihelil marahawe la faülüüni faiini har ra ebwe bwitiwo uwawomi sawori lahireiye!

Hesus e Masariye Yerusalem

(Lukas 13.34-35)

37“Yerusalem, Yerusalem! Ho riil profeta nga ho hatingil marahara lei ikke namari Dios ra e hatalilatoho iyolomu! Faari pipiye yai masari bwa ibwe lopengil yaamu sawo eda weya marufaifini hayang ifiri yaar saongil raur fari paür, nga ho tai masari! 38Ira na sapir nga larau rihiti yaamu Templo eda pöür. 39Ibwe hauhami bwa meihira eda raho nga e tawau süya bwa haubwe para käkäneyai eda toho ngari na haubwe dölü bwa, ‘Dios e hafaiyemauye yalematara e bwitoho nga e hädi iiteri Tamoru.’ ”

Currently Selected:

Mateus 23: SOV

Highlight

Copy